Read CHUYA QELLQA La Biblia en Quechua de Ayacucho 2012 Salmos 27 Bible Online

Salmos 27 - CHUYA QELLQA La Biblia en Quechua de Ayacucho 2012 bible

Salmos 27

¹Davidpa takin Tayta Diosmi kanchaykuqniypas salvaykuqniypas, ¿pitataq ñoqa manchakuyman? Tayta Diosmi amparaykuwaqniyqa, ¿pimantataq ñoqa manchakuyman?

²Mana allin runakunam, ñakarichiwaqniy runakunawan enemigoykunam, chinkarachiwanankupaq contraypi huñunakurunku, ichaqa kikillankum mitkaruspa wichiykunku.

³Tropakunaña contraypi muyuriruwaptinpas manapunim sonqoyqa manchakunqachu, guerraña contraypi hatarimuptinpas ñoqaqa manapunim hukmanyasaqchu.

⁴Kayllatam Tayta Diosta mañakurqani, chayllatam munallani: Wañukunaykama wasillanpi kawsakuyta, Tayta Diospa kuyayllapaq kayninta qawanaypaq, payta templollanpi yupaychanaypaq;

⁵ñakariy punchawkunaña chayamuptinpas yachanan wasipim payqa pakaykuwanqa, carpan ukupim tapaykuwanqa; hatun qaqapa hawanpim churaykuwanqa.

⁶Muyuwaqniy enemigoykunatam vencechiwanqa; ñoqañataqmi kusikuywan Diosnillayta hatunchasaq, carpanpa ñawpaqninpim sacrificiota ofrecesaq, kusikuywan takispam Tayta Diosta yupaychasaq.

⁷Dios Taytalláy, qayakamullasqaytayá uyariykullaway, llakipayariykuwaspayá contestaykullaway;

⁸sonqollaymi qanmanta niwan: “Tayta Diosta maskay” nispa. Chaynaqa, qamllatam maskallasqayki.

⁹Amayá ñoqamanta pakakuwaychu, amayá piñakuynikipiqa wischurullawaychu. Qamqa yanapaykuqniymi kanki; amayá sapallaytaqa saqerullawaychu, qamqa salvaqniy Diosmi kanki.

¹⁰Taytayña mamayña saqeruwaptinpas, Tayta Diosmi ñoqataqa hoqariykuwanqa.

¹¹Dios Taytalláy, ñannikita reqsichiway, allin ñanninta pusakuway, achkallañam enemigoykunaqa.

¹²Amayá enemigoykunamanqa qoykullawaychu, llulla rimaqkunawan mana allin runakunam contraypi hatarirunku.

¹³Chaywanpas yachakunim, kawsanay punchawkamaqa Tayta Diospa kuyapayakuynintam qawasaq.

¹⁴Tayta Diosman hapipakuy, kallpanchakuspa ama sonqoykipi hukmanyaychu. Arí, Tayta Diosman hapipakuspa suyay.