Read CHUYA QELLQA La Biblia en Quechua de Ayacucho 2012 Salmos 44 Bible Online

Salmos 44 - CHUYA QELLQA La Biblia en Quechua de Ayacucho 2012 bible

Salmos 44

¹Coreypa mirayninkunapa takin Diosnillayku, rinriykuwanmi uyarirqaniku, taytaykum ñawpaq tiempokunapi imakunam ruwasqaykita willawarqaku.

²Qanmi mana allin nacionkunata makikiwan qarqorqanki, llaqtakunatam ñakarichispa wischurqanki, paykunapa rantinpim taytaykuta churarqanki.

³Paykunaqa manam espadankuwanchu chay allpataqa hapikuykurqaku, manataqmi kallpankuwanchu vencerqaku, aswanqa atiynikiwanmi, alleq makikiwanmi paykunataqa yanaparqanki, allin ñawikiwan qawarispaykim paykunawan kusikurqanki.

⁴Diosnilláy, qanmi reyniyqa kanki, qamllam Jacobta vencechinki.

⁵Qanmi enemigoykuta vencechiwarqankiku, sutikipim atacawaqniykuta sarurqaniku.

⁶Manapunim flechaypiqa hapipakunichu, espadaypas manam vencechiwanmanchu.

⁷Qamllam enemigoykumanta waqaychawarqankiku, cheqniqniykutam penqayman churarqanki.

⁸Diosllapim tukuy tiempo hatunchakusaqku, wiña-wiñaypaqmi sutikita hatunchasaqku.

⁹Ichaqa qanmi ñoqaykuta wischuruwarqankiku, penqaymanmi churawarqankiku, manañam tropaykuwanpas lloqsinkiñachu,

¹⁰chaymi enemigoykupa qayllanmanta ayqerqaniku, cheqniwaqniykum tukuy imaykutapas apakurqaku.

¹¹Ovejakunata hinam wañuyman qaykuykuwarqankiku, huchasapa nacionkunamanmi cheqerachiwarqankiku.

¹²Mana imallapaqmi llaqtaykitaqa rantikuruwarqankiku, rantikuwasqaykikumantaqa manam imatapas chaskirqankichu.

¹³Muyuriqniykupi llaqtakunapa qayllanpim penqayman churawarqankiku, muyuriqniykupi kaqkunam muchkiykachaspa asipayawaqku.

¹⁴Watuchita hina nacionkunapa rimakunantam ruwaruwankiku, rikuwaqniykum umankuta aywispa burlakuwanku.

¹⁵Sapa punchawmi penqaypi tarikuni, penqakuymantam kurkuykachani.

¹⁶Chaynaqa, kachkani insultawaspa kamiwaqniy runaraykum, vengakuqniy enemigoyraykum.

¹⁷Kaykunaqa pasawanku manam qamta qonqarusqaykuraykuchu, nitaqmi qanwan pacto ruwasqaykuta saqerusqaykuraykuchu.

¹⁸Qanmantaqa manam rakikurqanikuchu, ñannikimantapas manam karunchakurqanikuchu.

¹⁹Ichaqa qanmi atoqkunapa yachananman wischuykuwarqankiku, sinchi tutayaywanmi pampaykuwarqankiku.

²⁰Diosnillayku, sichum sutikita qonqaruymanku karqa, mana reqsisqayku dioskunataña yupaychaymanku karqa,

²¹hinaptinqa ¿manachum qam yacharuwaq karqa? Qamqa sonqopi pakasqa kaqkunatapas yachankim.

²²Ichaqa qamraykum sapa punchaw wañuypa patanpi kachkaniku; nakana ovejakunata hinam qawawanku.

²³Señorlláy, ¡rikchariy! ¿Imanasqataq puñunki? Señorlláy, ¡rikchariy! Amayá wiñaypaqqa qepancharuwaykuchu.

²⁴¿Imanasqataq ñoqaykumanta pakakunki? ¿Imanasqataq ñakariyniykutawan sasachakuyniykuta qonqarunki?

²⁵Pasaypaq penqayman churasqam kachkaniku, cuerpoykupas allpaman wischusqam kachkaniku.

²⁶¡Hatarispa yanapaykuwayku! ¡Kuyapayakuq kasqaykirayku salvaykuwayku!