Read CHUYA QELLQA La Biblia en Quechua de Ayacucho 2012 Salmos 46 Bible Online

Salmos 46 - CHUYA QELLQA La Biblia en Quechua de Ayacucho 2012 bible

Salmos 46

¹Coreypa mirayninkunapa takin Diosmi pakaykuwaqninchikqa, payllam kallpanchawaqninchikpas, paymi sasachakuykunapi chaylla yanapawaqninchikpas.

²Chayraykum, kay pachaña kuyuptinpas, lamar qochapa chawpinmanña orqokuna wichiptinpas, manam manchakusunchu.

³Lamar qochaña qapariywan llimpamuptinpas, lamar qocha lloqsimuptin orqokuna katkatataptinpas, manam manchakusunchu.

⁴Huk mayum kallpaq yakunkunawan Diospa llaqtanta kusichin, Diospa yachanan chuya wasintam kusichin.

⁵Diosmi chay llaqtapa chawpinpi kachkan, chay llaqtaqa manapunim wichinqachu; achikyamuptinmi Diospuni kay llaqtata yanapanqa.

⁶Llapa nacionkunam qaparinku, llapa kamachikuqkunam katkatatanku; Dios qapariptinmi kay pacha chullurin.

⁷¡Tukuy Atiyniyuq Diosmi ñoqanchikwan kachkan! ¡Jacobpa Diosninmi pakaykuwaqninchikqa!

⁸Hamuspa, Tayta Diospa imam ruwasqankunata qawaychik, kay pachapi admirakuypaq ruwasqankunata qawaychik.

⁹Paymi guerrakunata kay pachapi kuchun-kuchun chinkarachin, flechapa arconkunatawan lanzakunatam pakiparun, guerrapaq carretakunatam kañarun.

¹⁰Tayta Diosmi kaynata nin: ¡Qasillalla kaychik, Dios kasqayta reqsiwaychik! ¡Ñoqaqa llapa nacionkunapa hatunchasqanmi kani! ¡Ñoqaqa kay pachapi yupaychasqam kani! nispa.

¹¹¡Tukuy Atiyniyuq Diosmi ñoqanchikwan kachkan! ¡Jacobpa Diosninmi pakaykuwaqninchikqa!