Read CHUYA QELLQA La Biblia en Quechua de Ayacucho 2012 Salmos 5 Bible Online

Salmos 5 - CHUYA QELLQA La Biblia en Quechua de Ayacucho 2012 bible

Salmos 5

¹Kay takiqa qenakunawan takinam Dios Taytalláy, kay rimariyllaytayá uyariykullaway, waqakuyniytayá qawariykullaway.

²Reynilláy, Dios Taytalláy, qayakamusqayta uyariykullaway, qamllatam mañakamullayki.

³Dios Taytalláy, tutapaytam uyariykullawanki. Achikyaqtam willakamullayki, contestaykuwanaykitam suyallachkani.

⁴Diosnilláy, qamqa mana allinkunatam cheqninki, mana allin runakunaqa qanwan kuskaqa manam yachanmanchu.

⁵Hatun tukuqkunapas ñawpaqnikimanqa manam yaykunqachu, mana allin ruwaqkunataqa manam rikuytapas atinkichu.

⁶Dios Taytalláy, llulla runakunataqa chinkarachinkim, wañuchiqtawan iskay uyakunataqa millakunkim.

⁷Ñoqam ichaqa kuyakuynikirayku wasikiman yaykullasaq, hatun manchakuywanmi temployki lawman qawaspay yupaychasqayki.

⁸Dios Taytalláy, achkallañam enemigoykunaqa, munasqaykipi kawsachikuway, allin ñanninta pusakuway.

⁹Paykunaqa mana cheqap rimaqkunam, sonqonkupi mana allin tanteaqkunam, kunkankupas asnaq sepultura hinam, qallunkupas llullalla rimaqmi.

¹⁰Diosnilláy, paykunatayá castigay, mana allin tanteasqankumanta tuñichiy, mana allin ruwasqankumanta wischuy, paykunaqa contraykipim hatarirqaku.

¹¹Qampi hapipakuqkuna kusikuchunku, waqaychasqaykirayku kusikuymanta wiñaypaq takichunku. Qamraykum kuyasuqnikikuna kusikunku.

¹²Dios Taytalláy, qamqa allin ruwaqtam bendecinki, kuyakuynikiwan muyuriykuspam waqaychaykunki.