Read CHUYA QELLQA La Biblia en Quechua de Ayacucho 2012 Salmos 50 Bible Online

Salmos 50 - CHUYA QELLQA La Biblia en Quechua de Ayacucho 2012 bible

Salmos 50

¹Asafpa takin Sapallan Diosmi, dioskunapapas Diosninmi rimarin; kay pachapi runakunatam qayarun intipa qespimunan lawmanta intipa seqaykunan lawkama.

²Ancha sumaq Sión llaqtamantam Dios kancharimun.

³Diosninchikmi hamuchkan, ichaqa manam upallallachu; ñawpaqnintam kañakuq nina hamuchkan, muyuriqnintañataqmi wayra-para qaparispa hamuchkan.

⁴Hanaq pachatawan kay pachata testigopaq churaykuspam llaqtanta juzganqa.

⁵“Chuya runaykunata huñumuychik, animalkunata sacrificaspa ñoqawan pacto ruwaqkunata huñumuychik”.

⁶Cielokunam willakunqa Diosqa mana pimanpas sayapakuq juez kasqanta.

⁷Israel, kuyasqay llaqtalláy, contraykipi rimarisqayta uyariy: ¡Ñoqam Dios kani! ¡Ñoqam Diosnikiqa kani!

⁸Qaqchaykiqa manam animalkuna ofrecewasqaykimantachu, nitaqmi sapa punchaw kañapuwasqaykimantachu.

⁹Manam mañakuyki corralnikipi malta toroykikunatachu, nitaqmi kanchaykipi chivatoykikunatachu,

¹⁰purun animalkunapas ñoqallapam, orqokunapi waranqantin-waranqantin animalkunapas ñoqallapam;

¹¹orqokunapi pawaq animalkunatapas reqsinim, purunpi animalkunapas ñoqallapam.

¹²Sichum yarqawaptinqa manam qamtachu mañaykiman, kay pachapas, chaypi tukuy ima kaqkunapas ñoqallapam.

¹³¿Yaqachu torokunapa aychanta mikuyman? ¿Yaqachu chivatokunapa yawarninta tomayman?

¹⁴Diosmanyá qoy reqsikuy taki ofrendata, tukuy imapa hawanpi munaychakuq Diosman prometekusqaykita cumpliy.

¹⁵Sasachakuy punchawpi qayakamuway, ñoqam librasqayki qamñataqmi yupaychawanki.

¹⁶Ichaqa mana allin runatam Dios kaynata nin: “¿Ima uyaykiwantaq kamachikuyniykunamanta chaynataq pactoymanta rimawaq?”

¹⁷Qamqa qaqchasqa kaytapas manam munankichu, rimapayasqaykunatapas qepanchankim.

¹⁸Suwata rikuspaykipas paymanmi kuskanchakuykurqanki, waqllikuqkunawanmi hukllawakurqanki.

¹⁹Simikiwanpas mana allinkunatam rimarqanki, qalluykiwanñataqmi engañarqanki.

²⁰Tiyaykuspam wawqekita yanqamanta cargocharqanki, mamaykipa wawanmantam yanqakunata rimarqanki.

²¹Chaykunata ruwachkaptikipas ñoqaqa upallaykurqanim, chaymi piensarqanki qam hina huchasapa kasqayta, aswanqa chaykunamanta qaqchaspaymi huchaykikunata qawachisqayki.

²²Tayta Diosta qonqaruqkuna kayta uyariychik, qamkunayá allinta yuyaymanaychik, yanqañataq mana pipa harkakusqanta tisaparuykichikman.

²³Pipas reqsikuspa yupaychawaqniyqa ñoqatam hatunchawan, munasqayman hina allin ñanpi kawsaqtaqa ñoqam salvaykusaq, nispa.