Read CHUYA QELLQA La Biblia en Quechua de Ayacucho 2012 Salmos 51 Bible Online

Salmos 51 - CHUYA QELLQA La Biblia en Quechua de Ayacucho 2012 bible

Salmos 51

¹Davidpa takin Dios Taytalláy, kuyapayakuynikiman hinayá llakipayariykullaway; sinchi llakipayakuynikiman hinayá mana kasukusqayta mayllaykullaway.

²Mana allin ruwasqaymanta mayllaykullaway, huchallaymanta chuyanchaykullaway.

³Mana kasukusqaytam reqsikullani, huchallayqa ñawpaqllaypim kachkan.

⁴Qampa contraykipim huchallikurullani, qayllaykipim mana allinta ruwarullani; imam kaqmantam juzgawankipas, mana huchayuqpaqqa manam hapikuymanchu.

⁵Mamaypa wiksanmantapunim huchayuq kallani, huchallikuqtam mamallaypas wiksayakuykullawarqa.

⁶Qamqa cheqap sonqoyuq runatam kuyanki, pakasqallapim yachayta qoykuwanki.

⁷Hisopowan chuyay-chuyayta mayllaykuway, hinaptinqa limpioñam kasaq; mayllaykuwaptikiqa ritimantapas aswan yuraqraqmi kasaq.

⁸Kusikuywan huntaykullaway, llakipa intusqanña kaptiypas kusiykachillaway.

⁹Huchallaykunamanta uyallaykita pakaykuy, mana allin ruwallasqaymanta mayllaykullaway.

¹⁰Dios Taytalláy, chuya sonqotaña ruwaykapullaway, espiritullayta musoqyaykachiy.

¹¹Qayllaykimantaqa amayá wischurullawaychu, Chuya Espirituykitaqa amayá qechurullawaychu.

¹²Salvacionnikipa kusikuyninta kutiykachillaway, kuyakuq Espirituykiwan uywakullaway.

¹³Mana kasukuqkunaman qanmanta yachachimunaypaq, chaynapi huchasapakuna qanman kutirikamunankupaq.

¹⁴Dios Taytalláy, runa wañuchiq kanaymanta libraykullaway, salvawaqniy Diosnilláy, allin ruwaq kasqaykimantam takillasaq.

¹⁵Señorlláy, simillayta kichaykullaway, qamllaman takillanaypaq.

¹⁶Qamqa lliw kañana sacrificiota ofrecemunaytapas manam munankichu, chayta munaptikiqa qoykuykimanmi.

¹⁷Diosnilláy, qampaq hina ofrendaqa tukuy sonqonmanta uchuychakuymi, uchuychakuspa sonqonmanta wanakuqtaqa manam qepanchankichu.

¹⁸Kuyapayakuynikiman hinayá Sión llaqtata allichaykuy, Jerusalén llaqtapa murallankunata musoqmanta hatariykachiy,

¹⁹chaynapiqa ofrendakunawan lliw kañana sacrificiokunatapas chaskinkim, malta torokunatam altarnikipi ofrecenqaku.