Read CHUYA QELLQA La Biblia en Quechua de Ayacucho 2012 Salmos 52 Bible Online

Salmos 52 - CHUYA QELLQA La Biblia en Quechua de Ayacucho 2012 bible

Salmos 52

¹Takiqkunapa maestronpaq. Edom casta Doeg sutiyuq runam rey Saulman hamuspan willarqa: “Ahimelec sutiyuq sacerdotepa wasinmanmi Davidqa hamurun”, nispa. Chay pasakusqanmanta yuyaymanananpaqmi kayta David takirqa. Yaw, hatun tukuq runa, ¿imanasqataq mana allin ruwasqaykimanta alabakunki? ¡Diospa kuyapayakuyninqa mana tukuqmi!

²Mana allin ruwayllapim qamqa yuyaymananki, simikipas ñawchiyachisqa cuchillo hina llullalla rimaqmi.

³Allin kaqmantapas aswanqa mana allintam qamqa kuyanki, cheqap kaqmantapas aswanqa llullakuytam qamqa kuyanki.

⁴Qamqa nina qallu runam kanki, mana allin rimaykunatam kuyanki.

⁵Diosmi ichaqa wiñaypaq purmarachisunki, wasikimantam qamtaqa qarqorusunki, kawsaqkunapa chawpinmantam chinkarachisunki.

⁶Allin ruwaq runakunam chayta qawaspa manchakunqaku, ichaqa asikuspankum kaynata ninqaku:

⁷“Qawaychik Diospa kallpanchakuynin mana maskaq runata, tukuy ima kapuqninpi hapipakuspa mana allinta ruwaq runata”, nispanku.

⁸Ñoqam ichaqa Diospa wasinpi llanllarichkaq aceitunas sacha hina kachkani, Diospa kuyapayakuyninpim ñoqallayqa wiña-wiñaypaq hapipakuni.

⁹Dios Taytalláy, chaykuna ruwasqaykimantam wiña-wiñaypaq graciasta qoyki; akllakusqaykikunapa ñawpaqninpim qamllapi suyallasaq, qamqa llumpay kuyakuqmi kanki.