Read CHUYA QELLQA La Biblia en Quechua de Ayacucho 2012 Salmos 72 Bible Online

Salmos 72 - CHUYA QELLQA La Biblia en Quechua de Ayacucho 2012 bible

Salmos 72

¹Salomonpaq Davidpa takisqan Diosnilláy, reymanyá yachaynikita qoykuy allin arreglokuna ruwananpaq, Diosnilláy, reypa churintayá yanapaykuy mana pimanpas sayapayakuspa allin arreglota ruwananpaq.

²Llaqtaykita allinta juzgananpaq, wakchakunapaqpas allinkunallata ruwaspa munaychakunanpaq.

³Chaynapim orqokunapas hawka kawsakuytaña llaqtaykiman apamunqa, moqokunapas allin ruwaytaña apamunqa.

⁴Llaqtapi wakchakunapaqyá allin arreglota ruwachun, mana imayuqkunapa churinkunatayá salvachun, ñakarichikuqkunatayá sarupachun.

⁵Intipas killapas kanankamaqa miraymanta miraykamayá reyqa unayta kawsakuchun.

⁶Payqa ikllirimuq pastokunapa hawanman chayamuq para hinayá kachun, allpata nuyuq sulla hinayá kachun.

⁷Munaychakusqan punchawkunapiyá hawkayaywan allin ruway kachun, killapas manaña kanchanankamayá chayna kachun.

⁸Reyqa lamar qochapa patanmanta-patankama munaychakuchun. Eufrates mayumanta qallaykuspa kay pachapa patankama kamachikuchun.

⁹Chunniq lawpi yachaqkunam paypa ñawpaqninpi qonqorakunqaku, enemigonkupapas ñutu allpatam llaqwanqaku.

¹⁰Tarsis lawpi reykunam, lamar qocha patanpi yachaq reykunam, regalokunata apamunqaku. Sabá nacionpi, Seba nacionpi reykunam kuyakuyninkuta apamunqaku.

¹¹Llapallan reykunam ñawpaqninpi kumuykunqaku, llapa nacionkunam payta servinqaku.

¹²Qayakuqnin wakcha runatam libraykunqa, mana piniyuq runatam yanapaykunqa.

¹³Mana piniyuqkunatawan wakchakunatam llakipayanqa, wakchakunapa kawsakuynintam salvaykunqa.

¹⁴Sasachakuymantawan ñakariymantam paykunata libraykunqa. Reypa llumpay kuyasqanmi paykunapa kawsakuyninqa.

¹⁵¡Kawsachun rey! Sabá lawpi qorita payman qochunku, Diosta paypaq sapa kutilla mañakuchunku, sapa punchawyá bendecisqa kachun.

¹⁶Kay nacionninchikpa allpankunapiwan orqonkunapipas achkallaña trigo qespichun, Líbano orqopi hinayá ruruchun, purunpi qorakuna hinañayá qespichun.

¹⁷Reypa sutinyá wiñaypaq takyachun, ancha reqsisqa kayninpas inti hinayá takyachun. Payraykuyá llapallan nacionkuna bendecisqa kachunku, llapa nacionkunapas “ancha kusikuyniyuq” nispam sutichanqaku.

¹⁸Tayta Diosyá qapaqchasqa kachun, Israelpa Diosninyá hatunchasqa kachun, payllam admirakuypaq kaqkunataqa ruwan.

¹⁹Atiyniyuq sutinyá wiñaypaq qapaqchasqa kachun, atiyninyá kay pachaman huntaykuchun. ¡Chaynapuniyá kachun!

²⁰Kaypim Isaipa churin Davidpa mañakuynin tukun.