Read CHUYA QELLQA La Biblia en Quechua de Ayacucho 2012 Salmos 78 Bible Online

Salmos 78 - CHUYA QELLQA La Biblia en Quechua de Ayacucho 2012 bible

Salmos 78

¹Yachachinapaq Asafpa takisqan Kuyasqay llaqtalláy, yachachikuyniyta uyariy, rimapayasqayta kumuykuspa uyariy.

²Rikchanachiykunatam rimarisaq, ñawpaqmanta pakasqa kaqkunatam rimarisaq.

³Chaykunataqa uyarispam yacharqaniku ñawpaq tayta-mamaykum willawarqaku.

⁴Chaykunataqa mirayninchikkunamanpas mana pakaspam willasunchik, hamuq miraykunamanpas Tayta Diospa atiyninmantam willasunchik, admirakuypaq ruwasqankunamantam willasunchik.

⁵Jacobmanmi kamachikuyta qorqa, Israelmanmi allin kawsakuyta yachachirqa, ñawpaq taytanchikkunatam mirayninkunaman yachachinanpaq kamachirqa;

⁶chaynapi hamuq miraykunapas yachanankupaq, paykunapas mirayninkumanta mirayninkukama yachanankupaq;

⁷Diosllapi hapipakuspa paypa ruwasqankunata ama qonqanankupaq, kamachikuyninkunata kasukunankupaq,

⁸manaña ñawpaq taytanku hina kanankupaq. Ñawpaq taytankuqa mana kasukuq, mana yachayniyuq, Diosta qepanchaq iskay uya runakunam karqaku.

⁹Efrainpa mirayninkunaqa allin flechaqkunam karqaku, ichaqa guerraman rispankum manchakuymanta ayqerqaku.

¹⁰Diospa pactontapas manam waqaycharqakuchu, kamachikuynintapas manam kasukurqakuchu.

¹¹Diospa admirakuypaq ruwasqankunata rikusqankutapas qonqarurqakum.

¹²Ñawpaq taytankupa qayllanpim Tayta Diosqa, Egipto nacionpi tarikuq Zoán pampapi hatun milagrokunata ruwarqa.

¹³Lamar qochata iskayman rakispam chayninta pasachimurqa, yakutam perqata hina sayarachirqa.

¹⁴Punchawmi puyuwan pusarqa, tutanñataqmi ninapa kanchariyninwan.

¹⁵Chunniqpim qaqakunata iskayman chitqarqa, paykunamanmi yakuta achkanpi tomachirqa.

¹⁶Qaqamantam yakuta achkanpi pawachimurqa, mayuta hinañam kallpachirqa.

¹⁷Chaywanpas runakunaqa sapa kutillam Diospa contranpi huchallikurqaku, Tukuy Atiyniyuqpa contranpim chunniqpi hatarirqaku.

¹⁸Munasqanku mikuyta mañakuspankum Tayta Diosta tentarqaku.

¹⁹Diospa contranpim kaynata ninakurqaku: ¿Yaqachu mikuyta kay chunniqpipas qoykuwachwan?

²⁰Arí, qaqata chitqaspam yakuta pawachimurqa, allpata nuyunankamam mayuta hinaña kallpachirqa, ichaqa ¿yaqachu tantatawan aychata qoruwachwan? nispanku.

²¹Chayta uyarispam Tayta Dios piñakururqa, Jacobpaqmi nina hina ratarirurqa, Israelpaqmi sinchita piñakururqa;

²²Chaynaqa, pasakurqa Diospi mana hapipakusqankuraykum, yanapakuyninpipas mana creesqankuraykum.

²³Chaywanpas Diosqa puyukunatam kamachirqa, cielokunapa punkunkunatam kicharirqa.

²⁴Maná sutiyuq tantatam parachimurqa, hanaq pacha trigotam parachimuspa mikuchirqa.

²⁵Angelkunapa mikunantam runa mikurqa, Diosqa saksanankukamam mikuchirqa.

²⁶Cielomanta intipa qespimunan lawmanta wayrachimuspam, atiyninwan sur lawmanta wayrata pukuchimuspam,

²⁷llaqtanpaq allpata hinaña aychata parachimurqa, lamar qochapi aqota hinañam pawaq animalkunata qomurqa.

²⁸Maymi yachasqankupa chawpinmanmi, carpankupa muyuriqninmanmi wichichimurqa.

²⁹Saksanankukamam mikurqaku, chaynatam munasqankuta Dios qorqa.

³⁰Ichaqa manaraqpas saksachkaptinkum, mikusqankupas siminkupiraq kachkaptinmi,

³¹paykunaman Diospa piñakuynin wichiykamurqa, kallpasapa runakunatam wañurachirqa, Israelpa akllasqa runankunatam chinkarachirqa.

³²Chaywanpas kasqallanmi huchallikurqaku, admirakuypaq ruwasqankunatapas mana kaqpaqmi hapirqaku.

³³Chayraykum waspiyta hinalla paykunata chinkarachirqa, mancharikuypaq ñakariywanmi wañurachirqa.

³⁴Paykunamanta kaqkunata wañuchiptillanmi Diostaqa maskaqku, kutirikuspankum mana samaykuspa maskaqku.

³⁵Chayraqmi Diosqa waqaychaqninku kasqanta yuyariqku, chayraqmi tukuy imapa hawanpi munaychakuq Diosqa salvaqninku kasqanta yuyariqku;

³⁶ichaqa simillankumantam sumaqllataña rimapayaqku, qallunkuwanñataqmi llullakuqku,

³⁷hawa sonqollam kuyaqku, pactontapas manam kasukurqakuchu.

³⁸Chaywanpas Diosqa kuyapayaykuspam, huchankumanta pampachaykuspam, mana puchukarachirqachu; achka kutitam piñakuynintapas asurichirqa, manam piñakuyninwanqa apachikurqachu.

³⁹Tayta Diosqa, wañuq runalla kasqankutam yuyarirqa, chinkaruq wayra hinalla kasqankutam yuyarirqa.

⁴⁰Achka kutitam Diospa contranpi hatarirqaku, chaynatam chunniqpi llumpayta llakichirqaku.

⁴¹Tayta Diostam ñataq-ñataq pruebarqaku, Israelpa chuya Diosnintam llakichirqaku.

⁴²Manam yuyarirqakuchu ñakarichiqninkupa makinmanta atiyninwan Diospa hurqomusqantaqa;

⁴³manam yuyarirqakuchu, Egipto nacionpi milagrokuna ruwasqanmantapas, Zoán pampapi admirakuypaq kaqkuna ruwasqanmantapas.

⁴⁴Mayukunatam yawarman tikrarurqa, Egipto runakuna mana tomanankupaq.

⁴⁵ Nana-nanaq kachukuq chuspikunatam kachamurqa, tukurunanpaqmi achka-achka karyakunata kachamurqa.

⁴⁶Tarpuyninkutam urukunawan tukuchirqa, llamkasqankupa ruruntam aqaruwaywan tukuchirqa.

⁴⁷Uvasninkutam runtu parawan tukurachirqa, higos sachankutam qasarachirqa.

⁴⁸Animalninkutam runtu parawan wañurachirqa, uywankunatam rayokunawan wañurachirqa.

⁴⁹Sinchi piñakuyninpim paykunaman kacharirqa; hatun sasachakuyta, piñakuyninta hinaspa ñakariyta. Chaykunam karqa ñakarichikuq tropankuna.

⁵⁰Piñakuynintam llutanpiña kachaykurqa, mana llakipayaykuspam peste onqoywan wañurachirqa.

⁵¹Egipto nacionpi piwi churikunatam wañurachirqa, Cam castakunapa piwi churinkunatam carpakunapi wañurachirqa.

⁵²Israelpa mirayninkunatam ovejakunata hina hurqomurqa, llaqtantam chunniqninta pusamurqa.

⁵³Allinta waqaychaspam mana manchakunankupaq pusarqa, enemigonkunatam ichaqa lamar qocha pamparurqa.

⁵⁴Diosmi chuya allpanman llaqtanta pusamurqa, atiyninwan vencespa qechusqan orqokunamanmi pusamurqa.

⁵⁵Israelpa ñawpaqninmantam nacionkunata qarqorqa, allpankutapas sapa ayllumanmi rakinarqa, carpankutapas Israel ayllukunamanñam qoykurqa.

⁵⁶Ichaqa paykunam pruebaman churaspa tukuy imapa hawanpi munaychakuq Diosta piñachirqaku, kamachikuyninkunatapas manam kasukurqakuchu.

⁵⁷Aswanqa ñawpaq taytanku hinam Diosninkuta qepanchakururqaku, flechapa mana allin ruwasqa arcon hinam qewikururqaku.

⁵⁸Idolokunata yupaychanankupaq moqokunapi capillakunata ruwaspankum Diosta piñachirqaku.

⁵⁹Chaykunata qawaspam Tayta Diosqa llumpayta piñakurqa, Israel runakunatam pasaypaqta cheqnipakururqa.

⁶⁰Silo llaqtapi santuariontapas runakunawan yachanan carpantapas saqerurqam.

⁶¹Atiyninta qawachikunan Arcatapas enemigonkunawanmi qechurachirqa.

⁶²Runankunapaqmi anchallataña piñakururqa, guerrakunawanmi paykunata wañuchirqa.

⁶³Jovenkunam kañasqa wañurqaku, sipaskunapas manañam casarakuy takita takirqakuñachu.

⁶⁴Sacerdotenkunapas espadapim wañurqaku, viudankupas manam waqarqakuchu.

⁶⁵Tayta Diosmi ichaqa puñusqanmanta rikcharichkaq hina rikcharirurqa, sinkasqanmanta kallpasapa qari mallaqyachkaq hinam qaparirqa,

⁶⁶hinaspam enemigonkunata venceruspan ayqechirqa, wiñaypaqmi penqayman paykunata churarurqa.

⁶⁷Joseypa miraynintam qepancharurqa, Efraín ayllutapas manam akllarqachu.

⁶⁸Payqa Judá ayllutam akllarqa, kuyasqan Sión moqotam akllarqa.

⁶⁹Chuya wasintam cielota hina hatunta ruwachirqa, kay pachata takyachisqanta hinam wiñaypaq takyachirqa.

⁷⁰Serviqnin Davidtam akllarqa, oveja michisqanmantam hurqomurqa.

⁷¹Ovejakunapa qepanmantam, llaqtanta michinanpaq pusamurqa, Israel llaqtanta michinanpaqmi pusamurqa.

⁷²Davidmi Diospa llaqtanta michirqa, allin yachaywan cheqap sonqowanmi paykunata michirqa.