Read CHUYA QELLQA La Biblia en Quechua de Ayacucho 2012 Salmos 86 Bible Online

Salmos 86 - CHUYA QELLQA La Biblia en Quechua de Ayacucho 2012 bible

Salmos 86

¹Davidpa mañakusqan Dios Taytalláy, ñakariypim, llakikuypim kallachkani, utqayman uyariykullaway.

²Qamllapim hapipakuni waqaychaykuway. Diosniymi kanki, kay serviqnikiqa qamllapim hapipakuni, salvaykullaway.

³Dios Taytalláy, llakipayariykullaway, sapa punchawmi qayakamullayki.

⁴Señorlláy, kay serviqnikipa sonqollantayá kusiykachiy, qamllatam tukuy almallaywan mañakamullayki.

⁵Señorlláy, qamqa ancha kuyakuqmi kanki, hucha pampachaqmi kanki; haykam qayakusuqnikitaqa kuyapayaykuqmi kanki.

⁶Dios Taytalláy, mañakullasqayta uyariykullaway, qayakullasqayta chaskiykullaway.

⁷Uyariwasqaykiraykum sasachakuyniy punchawpi qayakamullayki.

⁸Señorlláy, manam ima diospas qam hina Diosqa kanchu, ruwasqaykikunata hinaqa manam pipas ruwanchu.

⁹Señorlláy, llapallan nacionkunatam unancharqanki, paykunam hamuspanku yupaychasunki, sutikitapas hatunchanqakum.

¹⁰Qamqa hatun atiyniyuq Diosmi kanki, admirakuypaq kaqkunatam ruwanki; ¡sapallaykim Diosqa kanki!

¹¹Dios Taytalláy, ñannikita reqsichillaway cheqap kaqnikipi purinaypaq, allin sonqotaña qoykullaway sutikita hatunchanaypaq.

¹²Dios Taytalláy takipullasqaykim, tukuy sonqoywanmi yupaychasqayki, wiñaypaqmi sutikita hatunchasaq.

¹³Ñoqallaypaq kuyakuynikiqa ancha hatunmi, wañusqakunapa kasqanmantam hurqoykullawarqanki.

¹⁴Diosnilláy, hatun tukuqkunam contraypi hatarirunku, mana allin runakunam wañuchiwayta munachkanku, paykunaqa manam qamtapas manchakusunkichu.

¹⁵Señorlláy, qanmi ichaqa llakipayakuq, kuyapayakuq kanki, mana chaylla piñakuruqmi kanki, ancha kuyakuqmi kanki, cheqap Diosmi kanki.

¹⁶Qawariykamuwaspa llakipayariykullaway, kay serviqllaykiman atiynikita qoykullaway, siervaykipa wawanta waqaychaykullaway.

¹⁷Kuyakuynikitayá qawachillaway, cheqnikuwaqniykuna qawaspa penqakunankupaq, Dios Taytalláy, qanmi yanapaykuwaspayki sonqollayta tiyaykachinki.