Read CHUYA QELLQA La Biblia en Quechua de Ayacucho 2012 Salmos 96 Bible Online

Salmos 96 - CHUYA QELLQA La Biblia en Quechua de Ayacucho 2012 bible

Salmos 96

¹Tayta Diosman musoq takikunata takiychik, kay pachapi yachaqkuna, Tayta Diosman takiychik.

²Tayta Diosman takiychik, sutinta qapaqchaychik. Salvacionninmanta sapa punchaw willakuychik.

³Ancha atiyninmanta lliw nacionkunaman willakuychik, admirakuypaq ruwasqanmanta lliw llaqtakunaman willakuychik.

⁴Tayta Diosqa ancha hatunmi, payllam yupaychana Diosqa, dioskunamantapas aswan manchakuna Diosmi.

⁵Llaqtakunapa diosninkuqa idolokunallam; Tayta Diosmi ichaqa hanaq pachata unancharqa.

⁶Payqa anchatam kancharichkan, chuya wasinpas atiyninwan sumaq kayninwan huntarisqam kachkan.

⁷Llapachallan llaqtakunapi ayllukuna, Tayta Diosta qapaqchaychik, takikunawan atiyninmanta hatunchaychik;

⁸Tayta Diosta pim kasqanmanta hatunchaychik, ofrendakunata payman apamuychik.

⁹Tayta Diosta chuya kasqanmanta hatunchaychik, kay pachapi llapallan yachaqkuna, paypa ñawpaqninpi qonqorakuychik.

¹⁰Nacionkunaman willaychik: “¡Tayta Diosmi Reyqa!” nispaykichik. Paymi kay pachata mana kuyunanpaq takyachirqa; llaqtakunapipas mana pimanpas sayapakuspam kamachikun.

¹¹Hanaq pachapas kusikuchun, kay pachapas kusikuchun; lamar qochapas qaparichun, chaypi kaqkunapas qaparichunku.

¹²Purunkunapas kusikuchun, chaypi kaqkunapas kusikuchunku. Montepi sachakunapas kusikuymanta qaparichunku.

¹³Kay pachata juzgananpaq hamuq Tayta Diospa qayllanpi takiychik; payqa llaqtakunatapas cheqap kayninman hinam juzganqa, mana pimanpas sayapakuspam juzganqa.