Read CHUYA QELLQA La Biblia en Quechua de Ayacucho 2012 Proverbios 10 Bible Online

Proverbios 10 - CHUYA QELLQA La Biblia en Quechua de Ayacucho 2012 bible

Proverbios 10

¹Kaykunam Salomonpa rimarisqan yachachikuykuna: Yachayniyuq warmaqa taytantam kusichin, mana yachayniyuqñataqmi mamanta llakichin.

²Yanqapaqmi mana allinta ruwaspa apuyayqa, allin ruwaymi ichaqa wañuymanta librakun.

³Tayta Diosqa allin ruwaq runataqa manam yarqaypi kanantaqa saqenqachu, mana allin ruwaq runatam ichaqa yarqaymanta ñakarichinqa.

⁴Qella kayqa wakchayaytam apamun, llamkakuq runam ichaqa apuyanqa.

⁵Cosecha tiempopi huñukuq runaqa yachayniyuqmi, cosecha tiempopi puñukuq runam ichaqa hatun penqay.

⁶Allin ruwaq runaqa bendecisqam kanqa, millay runam ichaqa runamasin wañuchiyllata munan.

⁷Allin ruwaq runaqa yuyarispa bendecisqam kanqa, mana allin runañataqmi chaylla qonqarachikunqa.

⁸Yachayniyuq runaqa kamachikuytam kasukun, kutipakuq runañataqmi mana allinpi tukunqa.

⁹Allin ruwaq runaqa hawkam kawsakun, mana allin ruwaq runam ichaqa mana allinpi tukunqa.

¹⁰Runamasin qemchiq runaqa sasachakuytam apamun, mana yachaywan rimaqñataqmi mana allinpi tukunqa.

¹¹Allin runapa rimayninqa kawsachikuq yaku hinam, mana allin runapa siminñataqmi wañuchinakuyllata riman.

¹²Cheqninakuyqa piñanakuyllatam qosnirichin, kuyakuymi ichaqa maynaña huchatapas tapaykun.

¹³Yachayniyuqpa siminpiqa yachaymi tarikun, azoteñataqmi mana yachayniyuq runapa wasanpaq.

¹⁴Yachayniyuqkunaqa yachaytam taqekunku, mana yachayniyuqkunapa siminñataqmi sasachakuyta apamun.

¹⁵Apukunapa nanachikuqninqa apukayninmi, wakchakunapa wichichiqninñataqmi wakcha kaynin.

¹⁶Allin ruwaq runapa pagonqa kawsaymi, millay runapa pagonñataqmi hucha.

¹⁷Yachachikuyta kasukuqqa kawsaymanmi richkan, yachachikuyta wischupakuqñataqmi chinkayman richkan.

¹⁸Llulla runaqa cheqnikuynintapas pakanmi, mana yachayniyuq runaqa cuento qepim.

¹⁹Rimaysapa runaqa pantanpunim, siminta wichqakuy yachaqmi ichaqa yachayniyuq.

²⁰Allin ruwaq runapa rimayninqa akllasqa qollqe hinam, mana allin runapa sonqonmi ichaqa mana imapaq valeq.

²¹Allin runapa siminqa achkaqtam yachachin, mana yachayniyuqñataqmi mana yachayniyuq kayninpi wañun.

²²Diospa bendicionninqa apuyachikuqmi, Diospa bendicionninqa manam llakikuytaqa apamunchu.

²³Mana yachayniyuq runaqa mana allin ruwayninpim kusikun, yachayniyuq runañataqmi yachaywan kusikun.

²⁴Mana allin runataqa imapas manchakusqan kaqraqmi pasarun, allin ruwaq runapaqmi ichaqa imam munasqanpas cumplikun.

²⁵Mana allin runaqa sinchi wayra hina chinkaruqllam, allin runam ichaqa wiña-wiñaypaq takyan.

²⁶Kamachiqninpaqpas qella runaqa kirupaq vinagre hinam, ñawi waqachiq qosni hinam.

²⁷Tayta Diosta kasukuq runaqa unay punchawkunam kawsakunqa, mana allin runapa kawsayninmi ichaqa menosyachisqa kanqa.

²⁸Allin ruwaq runakunapa suyayninqa kusikuymi, mana allin runapa suyayninmi ichaqa chinkarunqa.

²⁹Tayta Diosqa allin ruwaqkunatam waqaychan, mana allin ruwaq runakunatam ichaqa tuñichin.

³⁰Allin ruwaq runaqa manam haykapipas kuyurinqachu, mana allin runam ichaqa kay pachapipas mana takyanqachu.

³¹Allin runapa siminmantaqa yachaymi lloqsimun, mana allinllata rimaqtam ichaqa qalluntapas kuchurunqaku.

³²Allin ruwaq runaqa sumaq kaqkunallatam riman, mana allin runam ichaqa mana allinllata riman.