Read CHUYA QELLQA La Biblia en Quechua de Ayacucho 2012 Proverbios 19 Bible Online

Proverbios 19 - CHUYA QELLQA La Biblia en Quechua de Ayacucho 2012 bible

Proverbios 19

¹Wakcha kaspapas allin sonqoyuq kaymi aswan allinqa, mana yachayniyuq kaspa yanqamanta tumpakuq kanamantaqa.

²Mana sumaqta tantearispa imapas ruwayqa manam allinchu, hawanpi-ukunpi imatapas ruwayqa pantachikunmi.

³Mana yachayniyuq runaqa mana allin ñanman wichiykuspam Tayta Diospaqraq piñakunpas.

⁴Apu runapaqqa achkallañam amigonkunapas, wakcha runamantam ichaqa amigonkunapas karunchakunku.

⁵Mana allin testigoqa castigasqapunim kanqa, llullallata rimaq runaqa manam lluptinqachu.

⁶Sumaq sonqo runamanqa achkam llunkukunku, imallanpas qokuykuq runapaqqa lliwmi amigollan.

⁷Sichum wakcha runata wawqenkuna cheqniptinkuqa, aswanraqchiki amigonkunaqa qepancharunqaku, paykunamantaqa yanapakuytapas manam tarinqachu.

⁸Yachayniyuq runaqa kikintam kuyakun, yachayta waqaychaqqa allin kaqtam tarirun.

⁹Mana allin testigoqa castigasqapunim kanqa, llulla rimaq runaqa chinkanqapunim.

¹⁰Mana yachayniyuq runataqa alhajakunapa chawpinpi kawsayninqa manam tupanchu, reypa churinkunapi huk criadopa munaychakuyninpas manam tupanchu.

¹¹Pacienciakuyqa yachayniyuqpa ruwayninmi, alabasqa kayqa runamasinpa pantarusqanta mana kaqpaq hapiymi.

¹²Reypa piñakuyninqa malta leonpa qapariynin hinam, kuyapayakuyninñataqmi pastokunapi sulla hina.

¹³Mana yachayniyuq warmaqa taytantam llakichin, piñanakuyllata kuyaq warmiñataqmi parapi sutuq wasi hina.

¹⁴Wasiwan qori-qollqeqa tayta-mamapa herencia qokuyninmi, yachayniyuq warmiñataqmi Tayta Diospa qokuynin.

¹⁵Qellakuyqa miskillatañam puñuchikun, qella runaqa yarqaymantam ñakarinqa.

¹⁶Kamachikuyta kasukuqqa vidantam waqaychakun, Tayta Diospa yachachikuyninta wischupakuqmi ichaqa wañunqa.

¹⁷Wakchaman prestaspaqa Tayta Diosmanmi prestachkan, chay qosqantaqa Tayta Diosmi kutichipunqa.

¹⁸Warmaykitaqa manaraq imamanpas chayaruchkaptinyá corregiykuy, wañuyman chayaruptin ama ñakakunaykipaq.

¹⁹Chaylla piñakuruq runaqa castigasqam kanqa, piñakuyninmanta hawkayachiqqa aswantam piñachin.

²⁰Consejasusqaykita uyarikuy, rimapayasusqaykita chaskikuy, hinaspaqa yachayniyuqmi rikurinki.

²¹Runapa sonqonpiqa tukuy rikchaq piensaykunam tarikun, chaywanpas Tayta Diospa munasqallanmi takyanqaqa.

²²Runamantaqa suyanchik hapipakunapaq hina kanantam, llulla runamantaqa wakcha runam aswan allinqa.

²³Tayta Diosta kasukuyqa kawsaymanmi apakun, Dioswanqa pipas hawkam kawsakunqa manam ima sasachakuypas chayanqachu.

²⁴Qella runaqa makintam platoman haywarin, ichaqa manam imallatapas siminman apaykunchu.

²⁵Burlakuq runata castigaptikiqa mana yuyayniyuqpas yuyaytam hapinqa, yachayniyuqta qaqchaptikiqa aswan yachayniyuqmi rikurinqa.

²⁶Taytanpata suwaspa, mamantañataq qarqoruq warmaqqa penqakuypaq mana allin warmam.

²⁷Churilláy, corregisqa kayta mana munaspaykiqa allin yachachikuykunamantapas sapaqchakurunkim.

²⁸Mana allin testigoqa justiciamantapas asikunmi, mana allin runapa siminqa millakuypaq kaqkunallatam riman.

²⁹Burlakuq runapaqqa castigopas listom kachkan, mana yachayniyuqpa wasanpaqpas azotem kachkan.