Read CHUYA QELLQA La Biblia en Quechua de Ayacucho 2012 Proverbios 20 Bible Online

Proverbios 20 - CHUYA QELLQA La Biblia en Quechua de Ayacucho 2012 bible

Proverbios 20

¹Vinoqa runatam manaña penqakuqta ruwan, aqañataqmi yanqakuna rimaqta ruwan; macharuspaqa ima ruwasqantapas manam yuyakunchu.

²Reypa piñakuyninqa malta leonpa qapariynin hinam, reyta piñachiq runaqa vidantam wañuyman qaykukuchkan.

³Runapa alabakuyninqa piñanakuymanta asurikuymi, mana yachayniyuqmi ichaqa piñanakuyta hatarichin.

⁴Qella runaqa tarpuy tiempopipas manam tarpukunchu, chayraykum cosecha tiempopi mañakuspapas mana tarinqachu.

⁵Runapa tanteasqankunaqa lamar qocha hina uku-ukum, yachayniyuq runam ichaqa imaynam hayparuytapas yachan.

⁶Achkaqmi kuyapayakuq kasqankumanta alabakunku, chaywanpas confiakunapaq hina runataqa, ¿pitaqsi tarinman?

⁷Allin ruwaq runaqa allin kawsakuypim purin, churinkunapas pay hina kawsaspankuqa ancha kusisqam kanqaku.

⁸Juzganan trononpi rey tiyaykuspanqa qawariyllanwanraqmi ima mana allintapas tarirun.

⁹Manam pipas ninmanchu: “Sonqoyta chuyancharusqayraykum mana huchayuqña kani” nispaqa.

¹⁰Tayta Diosqa cheqninmi mana cabal pesotawan suwakuq balanzataqa.

¹¹Huk jovenpa allin kawsasqanqa ruwayninkunapim qawachikun.

¹²Uyarikunapaq rinritapas, qawakunapaq ñawitapas, iskaynintam Tayta Dios unancharqa.

¹³Ama puñuyta kuyaychu, wakchayaruwaqmi, ñawikita kicharispaqa tantawanmi saksanki.

¹⁴Rantiqqa ima rantisqantapas “kayqa manam valenchu” ninmi, pasaruspanñataqmi rantirusqanmanta alabakun.

¹⁵Yachaywan rimaqqa qorimantawan alhajakunamantapas aswan valorniyuqmi.

¹⁶Mana reqsisqa runata garantizaqtaqa pachanta qechuspa prendapaq apakuchunku.

¹⁷Runaqa anchallatañam munan engañaspa ganasqan mikuytaqa, ichaqa siminmi aqopa huntasqan rikurirunqa.

¹⁸Allin consejowanmi ima ruway munasqapas allinqa qespin, allinta tantearispam guerramanqa yaykuna.

¹⁹Cuento qepi runaqa pakasqa kaqtapas willakachakurunmi, cuento qepi runawanqa ama hukllawakuychu.

²⁰Tayta-maman ñakaq runaqa manchakuypaq tutayaypim wañunqa.

²¹Qallariyninpi imapas chaylla armasqa kaqkunaqa qepa punchawkunapim sasachakuyta apamun.

²²Ama niychu: “Vengakurusaqmi” nispaqa, Diosllapi hapipakuy paymi rantikipi ruwanqa.

²³Tayta Diosqa millakunmi mana cabal pesotawan suwakuq balanzataqa.

²⁴Runataqa Tayta Diosllam maymanpas pusan, manam pipas yachakunchu imayna tukuruytapas.

²⁵Mana allinta tantearispa Tayta Diosman imatapas prometekuchkaspa qepataña ñakakuyqa manam allinchu.

²⁶Yachayniyuq reyqa mana allin runakunata cheqerachispam ruedawan ñitirachin.

²⁷Runapa espiritunqa Tayta Diospa mecheron hinam, paymi runapa sonqonta kuchun-kuchun reqsin.

²⁸Reytaqa waqaychan cheqap kaywan kuyapayakuymi, llakipayakuyñataqmi trononta takyachin.

²⁹Jovenkunapa hatunchakuyninqa kallpanmi, yuyaqkunapa hatunchakuyninñataqmi soqo chukchayuq kaynin.

³⁰Azotepa nanayninqa mana allin runatam hampin, castigoqa runapa sonqontam chuyanchan.