Read CHUYA QELLQA La Biblia en Quechua de Ayacucho 2012 Proverbios 23 Bible Online

Proverbios 23 - CHUYA QELLQA La Biblia en Quechua de Ayacucho 2012 bible

Proverbios 23

¹Kamachikuqwan mikuspaykiqa sumaqta qawakuykuy pipa qayllanpi kasqaykita.

²Llumpayta yarqasuptikiqa, cuchillotapasyá kunkaykiman churakuy.

³Maynaña miski mikuynintapas ama munapayaychu, chay mikuyqa pantayman apakuqmi. -7-

⁴Ama apuyayllata maskaychu, aswanqa chaypi yuyarayayta saqey.

⁵Allinta qawariptikiqa mana kaqllam rikurirun; raprayuqpas kanman hinam ankapa pawakusqanta hina pawarun. -8-

⁶Maqlla runawanqa ama mikuychu, maynaña miski mikuynintapas ama munapayaychu.

⁷Chayna runaqa sonqonman hinam imatapas nisunki. “Mikuykuy, tomaykuy” nisuspaykipas hawa sonqollam nisuchkanki.

⁸Mikusqaykitapas chayllam kutirachinki, miskillaña rimasqaykipas yanqapaqmi kanqa. -9-

⁹Mana yachayniyuq runataqa ama rimapayaychu, payqa maynaña sumaq rimasqaykitapas asikuspam wischupakunqa. -10-

¹⁰Ñawpaqmantaraq churasqa linderotaqa ama asuchiychu, mana tayta-mamayuqpa herenciantapas ama hapikuruychu.

¹¹Paykunata nanachikuqqa Atiyniyuq Diosmi, contraykipi hatarispam paykunataqa valechinqa. -11-

¹²Sonqoykipiyá yachayta waqaychay, yachachikuyta sumaqta uyariy. -12-

¹³Warma corregiytaqa ama manchakuychu, azoteruptikiqa manam wañurunqachu;

¹⁴azotespaqa almantam wañunanmanta libranki. -13-

¹⁵Churilláy, yachayniyuq kaptikiqa ñoqapas sonqoypim anchata kusikusaq;

¹⁶yachaywan rimasqaykita uyarispaymi ukuypi kusikusaq. -14-

¹⁷Huchallikuq runataqa amayá envidiakuychu, aswanyá Tayta Diosta tukuy tiempo kasukuy;

¹⁸hinaspaqa qepa punchawkunapim kusisqa kawsakunki. -15-

¹⁹Churilláy, allinta uyariy, yachayniyuqyá kay; allin ñanpiyá sonqoykita takyachiy.

²⁰Machakuqkunawanqa ama hukllawakuychu, mikuysapakunawanqa ama kuskanchakuychu.

²¹Machakuqkunawan mikuysapakunaqa wakchayaypim mana imayuq tukunqaku, qellakunaqa pachanmantapas usunqakum. -16-

²²Taytaykipa nisusqaykita uyariy, mamaykimantapas payayaruptinqa ama penqakuychu.

²³Cheqap kaqtawan yachayta rantiy, yachachikuytawan yuyayniyuq kayta rantiy, hinaspa ama rantikuychu.

²⁴Allin kawsakuq warmapa taytanqa anchatam kusikunqa, yachayniyuq warmapa taytanqa churinmantam alabakunqa.

²⁵Qamraykuyá tayta-mamayki kusikuchun, qamraykuyá wachakusuqniki kusikuchun. -17-

²⁶Churilláy, sonqoykitayá qoykuway ñawikipas ñanniykunatayá qawachun.

²⁷Chuchumika warmiqa uku-uku pozo hinam qosanta engañaq warmiqa mana yaykuy atina uchku hinam.

²⁸Payqa suwa hinam wateqan, achka qarikunatam wichichin. -18-

²⁹¿Pipaqtaq ñakariyqa? ¿Pipaqtaq nanayqa? ¿Pipaqtaq piñanakuyqa? ¿Pipaqtaq quejanakuyqa? ¿Pipaqtaq yanqamanta maqanakuyqa? ¿Pipaqtaq ñawi qoyuyachinakuyqa?

³⁰Chaykunaqa machakuyman qokuruqkunapaqmi, rikchaqmana tragota maskaqkunapaqmi.

³¹Amayá qawaychu poqosqa vinopa pukayasqantaqa, nitaq copapi kancharisqantapas, vinoqa llampullatam simiman yaykuykun;

³²ichaqa maqta uru hinam kachukun, venenoyuq maqta uru hinam nanayta apamun.

³³Ñawikikunapas mana kaqkunatam rikunqa, tukuy imata tanteaspam muspaypi hina rimankipas.

³⁴Lamar qochapa chawpinpi puñuchkaq hinam tarikurunki, barcopa kaspinpa puntanpi puñuchkaq hinam rikurirunki.

³⁵Hinaspam ninki: “Maqaruwaptinkupas manam nanawanchu, azotewasqankutapas manam musyakurqanichu; rikchariruspaymi huktawan trago maskaq pasasaq”, nispa. -19-