Read CHUYA QELLQA La Biblia en Quechua de Ayacucho 2012 Proverbios 25 Bible Online

Proverbios 25 - CHUYA QELLQA La Biblia en Quechua de Ayacucho 2012 bible

Proverbios 25

¹Kaykunapas Salomonpa rimarisqan yachayniyuq rimaykunam; kaykunatam Judá nacionpa reynin Ezequiaspa serviqninkuna qellqarqaku.

²Diospa hatunchakuyninqa imapas pakasqa kaqkuna waqaychayninmi, reypa hatunchakuyninñataqmi chay pakasqa kaqkunata yachaykuypi riy.

³Hanaq pachapa sayayninwan, kay pachapa uku-uku kayninwan, reykunapa imam tanteasqanqa mana haypay atiymi.

⁴Qollqepa akasqanta siksirusqaqa alhaja ruwaqpa makinmantam kuyayllapaq alhaja lloqsimun.

⁵Reypa qayllanmanta mana allin runata qarqoruptikiqa trononpas allin arreglo ruwaypim sapinchakunqa.

⁶Reypa qayllanpiqa ama alabakuychu, amataq ancha reqsisqa runakunapa kasqanpipas sayaychu.

⁷“Kayman qespimuy” nisuynikim aswan allinqa, reqsisqayki kamachikuqkunapa qayllanpi penqayman churasqa kanaykimantaqa.

⁸Quejamanqa amayá chayllaqa kallpaychu, yanqañataq runamasiki penqayman churarusuptiki mana ima ruwaytapas atiwaqchu.

⁹Yanqamanta tumpasuqniki runapa qayllanpiqa rimarikuyá, hukpa willasusqaykitaqa amayá willakachakuychu;

¹⁰yanqañataqmi uyariqniki penqayman churasunkiman, penqaypi kaynikita manaña allichay atinaykikama.

¹¹Qollqewan adornasqa qorimanta manzana hinam tupaqninpi sumaq rimaykunaqa.

¹²Qorimanta anillo hinam, akllasqa qorimanta collar hinam, kasukuq runata yachaywan qaqchaykuyqa.

¹³Rupay tiempopi ritipa chiriykuynin hinam willakuyta apachikunapaq runaqa, chayna runaqa kamachiqninpa sonqontam kusichin.

¹⁴Wayrapa apanan mana parayuq puyu hinam mana imallantapas qokuykuchkaspa “qorqanim” nispa alabakuq maqlla runaqa.

¹⁵Kamachikuqpa piñakuynintaqa pacienciawanmi tanichina, sumaq rimayqa rumi sonqotapas pakinmi.

¹⁶Abejapa miskinta tarispaqa atisqallaykitayá mikuy, yanqañataq aminaykikama mikuruspa kutirachiwaq.

¹⁷Vecinoykipa wasinmanqa amayá kutitikraychu, yanqañataq amirususpayki cheqnipakurusunkiman.

¹⁸Runamasinpa contranpi llullakunata rimaq runaqa martillo, espada, hinaspa ñawchi puntayuq flecha hinam.

¹⁹Sasachakuy tiempo chayamuptin iskay uya runapi hapipakuyqa moqasqa chakiyuq puriy hinam, otaq utu kirupa nanakuynin hinam.

²⁰Llakisqa runata takipayayqa vinagreta heridaman talliykuy hinam, chiri tiempopi pachata llatanakuruy hinam.

²¹Enemigoyki yarqaymanta kaptinqa mikuykachiy, yakumanta kaptinpas tomaykachiy.

²²Chaynata ruwaspam uyanta penqakuymanta ruparichinki, Tayta Diosñataqmi pagapusunki.

²³Norte lawmanta hamuq wayraqa paratam apamun, cuento qepi runapa rimayninñataqmi runata piñachin.

²⁴Mana allin warmiwan hatun wasipi yachaymantaqa altospa kuchunpi yachaymi aswan allinqa.

²⁵Imaynam yakunayasqapaq chiri yaku, chaynam karumanta chayamuq allin willakuypas.

²⁶Putka yakuyuq pukyu hinam allin ruwaq runaqa mana allin runapa qayllanpi katkatatayninqa.

²⁷Abejapa miskinta achkanpi mikuyqa manam allinchu, alabasqa kayta maskaypas manam allinchu.

²⁸Mana cercoyuq tuñisqa llaqta hinam genionta mana sujetay atiq runaqa.