Read CHUYA QELLQA La Biblia en Quechua de Ayacucho 2012 Proverbios 26 Bible Online

Proverbios 26 - CHUYA QELLQA La Biblia en Quechua de Ayacucho 2012 bible

Proverbios 26

¹Imaynam poqoy tiempopi qasaqa mana allinchu, cosecha tiempopi parapas mana allinchu, chaynam mana yachayniyuq runata hatunchaypas mana allinchu.

²Imaynam pichinchu llutanpi pawan, imaynam wayanakuy muyun, chaynam yanqamantaqa ñakaypas mana pimanpas chayanqachu.

³Latigowanmi caballotaqa mansanchik, asnotañataqmi jaquimawan controlanchik, mana kasukuqkunataqa azotewanmi correginchik,

⁴mana yachayniyuqtaqa ama kutipaychu, yanqam qampas mana yachayniyuqpaq hapisqa kawaq.

⁵Mana yachayniyuqtaqa mana yachayniyuqta hina kutipay, chaynapi yachayniyuqpaq mana hapikurunanpaq.

⁶Mana yachayniyuq runata kunakuyqa chakita kuchukuruy hinam otaq sasachakuyman wichiykuy hinam

⁷Suchu runapa chakinkuna hina mana valeqmi mana yachayniyuqpa siminpi yachaywan rimaykunapas.

⁸Mana yachayniyuqta hatunchayqa warakaman rumita wataruy hinam.

⁹Imaynam machasqa runa makinta kichka tipaptin mana musyanchu, chaynam rikchanachiypas sonsopa siminpiqa mana entiendekunchu.

¹⁰Llapa purikuqta flecharuq runa hinam, wasinpi llamkapunanpaq sonso runata contrataq runaqa.

¹¹Imaynam allqo mikusqanta kutirachispan kaqllamanta mikurun, chaynam sonso runaqa mana tanteaspa ruwasqanta kaqllamanta ruwarun.

¹²Yachayniyuqpaq hapikuruq runamantaqa mana yachayniyuqmi aswan allinqa.

¹³Qella runaqa kaynatam nin: “Ñanpiqa leonmi kachkan, callepipas leonmi muyurichkan”, nispa.

¹⁴Imaynam bisagranpi punku muyun, chaynam qella runapas camanpi qochpan.

¹⁵Qella runaqa platoman makinta haywarichkaspapas siminman apaykuytaqa qellakunmi.

¹⁶Qella runaqa yachaysapapaqmi hapikun, yachaywan consejakuq qanchis runamantapas aswan yachaqniyuqpaqmi hapikun.

¹⁷Hukpa quejanman chapukuyqa allqota rinrinkunamanta hapiruy hinam.

¹⁸Imaynam locoyasqa runa wañuchikuq lenwachkaq flechakunata kacharin,

¹⁹chayna runamanmi rikchakun amigonta engañaruspan: “Asispallaymi ruwarqani” niq runapas.

²⁰Mana yanta kaptinqa ninapas wañurunmi, chaynam cuento qepi mana kaptinqa piñanakuypas tukurun.

²¹Imaynam ninata carbón mismichin, imaynam ninata yanta lenwarichin, chaynam peleollata kuyaq runapas piñanakuyta hatarichin.

²²Cuento qepi runapa rimayninqa miski mikuy hinam runapa sonqonman yaykun.

²³Qollqewan bañasqa allpa manka hinam, mana allin sonqoyuq runapa miskillaña rimayninqa.

²⁴Cheqnikuq runaqa siminwanmi cheqnikuyninta pakan, sonqonpim ichaqa tukuy mana allinkunata yuyaymanan.

²⁵Kuyakuyllawanña rimapayasuptikipas ama creeychu, sonqonqa mana allinpa huntasqanmi kakuchkan.

²⁶Cheqnikuyninta pakayta munaptinpas, mana allin ruwayninmi runakunapa qayllanpi rikurachikunqa.

²⁷Pipas trampata uchkuqqa kikillanmi chayman wichiykunqa, rumita kuchpaykuq runataqa kuchpasqan rumillam hawanta pasarunqa.

²⁸Llulla runaqa cheqap kaqtam cheqnin, hawa sonqolla rimapayakuqqa tuñichinmi.