Read CHUYA QELLQA La Biblia en Quechua de Ayacucho 2012 Proverbios 28 Bible Online

Proverbios 28 - CHUYA QELLQA La Biblia en Quechua de Ayacucho 2012 bible

Proverbios 28

¹Mana allin runaqa mana pipa qatisqallanmi ayqen, allin ruwaq runam ichaqa león hina hawka kawsakunqa.

²Mana allin ruwaypa huntasqan llaqtapiqa achkallañam kamachikuqkunapas, yachaywan kamachikuqmi ichaqa allinta takyachin.

³Wakchamasinta suwakuq runaqa kawsayta tukuruq loco para hinam.

⁴Kamachikuyta qepanchaqkunaqa mana allin ruwaqkunatam alaban, kamachikuyta kasukuqkunam ichaqa mana allin ruwaqkunapa contranpi churakunku.

⁵Mana allin runakunaqa allin ruwaytapas manam yachankuchu, Diosman hapipakuqkunam ichaqa tukuy imatapas yachanku.

⁶Huchallapi kawsaq apumantaqa, wakcha kaspapas allin kawsakuyniyuq kaymi aswan allinqa.

⁷Diospa kamachikuyninta kasukuq runaqa yachayniyuq warmam, kapuqninta yanqachaqkunawan hukllawakuqmi ichaqa taytanta penqayman churan.

⁸Qollqeta achka mirayniyuqpaq prestaspa qori-qollqeta huñuq runaqa, wakchakunata llakipayaq runapaqmi huñun.

⁹Sichum pipas, Diospa kamachikuyninta mana kasukuptinqa, Tayta Diospas manam mañakuyninta uyarinqachu.

¹⁰Allin kawsakuq runakunata mana allin ñanman tanqaqkunaqa trampa churasqankumanmi wichinqaku, allin kawsakuq runakunam ichaqa allin kaqta chaskinqaku.

¹¹Apuqa yachayniyuqpaqmi hapikun, wakcham ichaqa yachayninwan chaylla musyarunqa.

¹²Allin kawsakuq runakuna venceptinkuqa hatun fiestatam ruwanku, mana allin runakuna venceptinkum ichaqa runakunapas pakakunku.

¹³Huchanta pakaq runaqa manam allinqa kanqachu, huchanta willakuspa wanakuqmi ichaqa pampachasqa kanqa.

¹⁴Mayna kusisqam kanqa Diosta tukuy tiempo kasukuq runaqa, mana kasukuq runam ichaqa sasachakuyman wichiykunqa.

¹⁵Wakcha llaqtapi mana allin runa kamachikuspanqa qapariq leonman otaq yarqasqa ukumarimanmi rikchakun.

¹⁶Mana yachayniyuq runa kamachikuspanqa ñakariyllatam mirachin, apuyaruyllata cheqniqmi ichaqa unay watakunata kawsakunqa.

¹⁷Runamasinta wañurachiq runaqa mana pipa harkasqanmi wañuyman chayanankama ayqenqa.

¹⁸Allin kawsakuq runaqa salvasqam kanqa, mana allin kawsaypi puriqmi ichaqa sasachakuyman wichinqa.

¹⁹Chakranta llamkakuq runaqa achka mikunayuqmi kanqa, qella runam ichaqa wakchayaypi tukunqa.

²⁰Hapipakunapaq hina runaqa ancha bendecisqam kanqa, chaylla apuyaruyta munaqmi ichaqa chaylla huchaman wichiykunqa.

²¹Hukkaq runallaman sayapakuruyqa manam allinchu, runaqa parten tantaraykullapas sayapakunmi.

²²Imayuqpas karuyta munaqqa wañuy kawsaymi apuyaypi rin, ichaqa manam yachakunchu wakchayay hayparunantaqa.

²³Runaqa alabaqninmantapas mastaqa tiempopa risqanman hinaqa qaqchaqnintam kuyanqa.

²⁴Taytanta otaq mamanpa kaqta suwakuruspa “kayqa manam huchachu” niq runaqa, runa wañuchiqpa puriqmasinmi.

²⁵Apuyaruyllata maskaq runaqa peleollatam hatarichin, Tayta Diosman hapipakuqmi ichaqa allin kawsakunqa.

²⁶Kikillanpi hapipakuq runaqa mana yachayniyuq runam, yachaywan kawsakuqmi ichaqa librasqa kanqa.

²⁷Wakchata yanapaykuq runaqa manam wakchayayta reqsinqachu, mana yanapaykuqmi ichaqa ancha ñakasqa kanqa.

²⁸Millay runakuna hatariptinqa runakunam pakakunku, wañuruptinkum ichaqa allin ruwaq runakuna miranku.