Read CHUYA QELLQA La Biblia en Quechua de Ayacucho 2012 Proverbios 30 Bible Online

Proverbios 30 - CHUYA QELLQA La Biblia en Quechua de Ayacucho 2012 bible

Proverbios 30

¹Kaykunam Masá lawpi yachaq Jaquepa churin Agurpa yacha-chisqan simikuna. Agurmi Itieltawan Ucalta kaynata yachachirqa:

²Ñoqaqa lliw runamantapas aswan mana yachayniyuqmi kani, ñoqaqa mana tanteoyuqmi kani.

³Yachaytapas manam hayparqanichu, manataqmi Diosmantapas yachanichu.

⁴¿Pitaq hanaq pachaman qespiruspa uraykamurqa? ¿Pitaq wayrakunata makinwan putqorqa? ¿Pitaq yakukunata latapawan wisirqa? ¿Pitaq kay pachapa linderonkunata churarqa? ¿Yachaptikiqa imataq paypa sutin hinaspa churinpa sutin?

⁵Diospa Chuya siminkunaqa cheqapmi; Diosman hapipakuqkunataqa paymi waqaychan.

⁶Paypa siminkunamanqa amayá imatapas yapaychu, chaynapi llullapaq hapisqa kaspa mana qaqchachikunaykipaq.

⁷Diosnilláy, iskayllatam mañakuyki, manaraq wañukuchkaptiyá qoykullaway:

⁸Engañotawan llullakuytayá ñoqamanta sapaqchay, ama qowaychu apuyayta nitaq wakchayaytapas, aswanqa mikunaypaq kamaqllata qoykullaway.

⁹Yanqañataq saksanaykama mikuruspa qamta qepanchaspay niyman: ¿Pitaq Tayta Diosqa? nispay; otaq wakchayaspay suwakuyman, hinaspay sutikita penqayman churayman.

¹⁰Huk esclavotaqa amayá patronninpa qayllanpiqa acusaychu, yanqañataq ñakasuptiki castigasqa kawaq.

¹¹Kanmi taytanta ñakaq miraykuna, kantaqmi mamanta mana bendiceq miraykunapas.

¹²Kanmi mana huchayuqpaq hapikuruq runakuna, huchankumantaqa manam chuyanchakunkuchu.

¹³Kanmi hatun tukuq runakuna, runamasintapas winkullamanraqmi qawanku.

¹⁴Kanmi espada kiruyuq miraykuna, kanmi cuchillo waqoyuq runakuna, chaywan kay pachapi wakchakunata mikurunankupaq, allin sonqoyuqkunata tukurunankupaq.

¹⁵[1]Sanguijuela urupa iskay wawankunaqa “qoway-qoway” niyllatam yachanku. Kimsam manaña haykapipas saksariqkuna, tawa kaqpas manam ninchu “saksaruniñam” nispaqa.

¹⁶Chaykunam sepultura, mana wachakuq warmi, mana yakuta saksaq allpa, chaynataq ninapas.

¹⁷Taytanta burlakuq runataqa, mamanta mana kasukuq runataqa, cuervokunayá ñawinta hurqoruchun, ankakunayá mikuruchun.

¹⁸Kay kimsam mana yachasqay kaqkuna, tawa kaqtapas manam reqsinichu:

¹⁹Alton pawaq ankapa yupinta, qaqapi maqta urupa yupinta, lamar qochapi barcopa yupinta hinaspa warmiwan qaripa kakurusqanta.

²⁰Qosanta engañaq warmiqa kaynatam ruwan: Mikuruchkaspapas siminta pichakuruspam “manam ima mana allintapas ruwanichu”, nisparaq.

²¹Kay kimsawanmi allpa katkatatan, kay tawa kaqwanñataqmi ñakarin:

²²Rey kayman huk esclavo chayaruptin, mana yachayniyuq runa saksaruptin,

²³wischupakusqa warmi huktawan casarakuruptin patronanpa qosanta esclavan qechuruptin.

²⁴Kantaqmi kay pachapi tawa taksa animalchakuna paykunaqa llumpay yachaysapam kanku:

²⁵Sisichakuna, paykunaqa manam kallpayuqchu ichaqa cosecha tiempopim mikunankuta huñukunku.

²⁶Vizcachakuna, paykunaqa mana kallpayuq kaspapas raqchikunapim wasinkuta ruwakunku.

²⁷Aqaruwaykuna, mana reyniyuq kaspapas ichaqa tropa-tropam lloqsinku.

²⁸Arañakuna, makiwan hapiy atina kachkaspankupas reypa palacionpiraqmi yachanku.

²⁹Kay kimsañataqmi kuyayllapaqta purinku, tawa kaqpas qarillañam purin:

³⁰León, payqa llapallan animalkunamanta manchakuypaqmi manam imatapas manchakunchu.

³¹Hatun tukuq utulu, cabrakunapa yayannin chipu, tropankunapa ñawpaqninta riq reypas.

³²Sichum mana yachayniyuq hina hatunchakuspayki mana allinta ruwanaykipaq tantearuspaykiqa allinta tanteakuykuy.

³³Pipas lecheta qaywispaqa mantequillatam hurqonqa, pipas kallpawan senqanta pichakuqqa yawartam hurqokurunqa, pipas runamasinwan piñanakuqqa takanakuypim tukurunqa.