Read CHUYA QELLQA La Biblia en Quechua de Ayacucho 2012 Proverbios 31 Bible Online

Proverbios 31 - CHUYA QELLQA La Biblia en Quechua de Ayacucho 2012 bible

Proverbios 31

¹Massá lawpi rey Lemuelpa rimarisqankuna; kay rimariykunawanmi Lemuelta maman yachachirqa:

²Wawalláy, wachakusqalláy, Tayta Diosta mañakuptiy qowasqan wawalláy, ¿imatawanraqtaq nikiman?

³Ama warmikunapi kallpaykita tukuychu, chayna warmikunaqa reykunatam tuñichinku.

⁴Lemuel, manam allinchu reykunapa vino tomayninqa manam allinchu kamachikuqkunapa aqa upyayninqa;

⁵yanqañataqmi kamachikuyta qonqaruspa wakchakunapa derechonta qewirunmanku.

⁶Vinoqa llakisqa sonqoyuqkunapaqmi, aqapas piñakuypa huntasqan sonqoyuqkunapaqmi;

⁷Paykunayá chayta upyaspa sasachakuyninkutawan ñakariyninkuta qonqachunku.

⁸Qamqa mana rimarikuqkunapa rantinpiyá rimariy, mana pipapas nanachikusqan kaqkunatayá nanachikuy;

⁹kallpawan rimarispayá justiciata ruway, wakchakunatawan mana piniyuqkunatayá nanachikuy.

¹⁰Allin warmiqa sasa tarinam, alhaja rumimantapas aswan valorniyuqmi.

¹¹Chayna warmipiqa qosanpas tukuy sonqonwanmi confiakun, manam imanpas pisinqachu.

¹²Payqa kawsanan punchawkamam allinllata ruwaspan qosanta kusichinqa.

¹³Chayna warmiqa millwatawan linota maskaspanmi kusikuyllawanña tukuy imata ruwan.

¹⁴Payqa negociantepa barcon hinaraqmi mikuytapas karumantaraq apamun.

¹⁵Tutaraq hatarispanmi wawankunamanwan criadankunaman mikuchin.

¹⁶Allinta qawaykuspanmi chakratapas rantin, hinaspam ganakusqan qollqewan uvasta plantan.

¹⁷Weqawninta sumaqta watakuykuspanmi ganasllawanña llamkan.

¹⁸Negocio ruwasqantam allinta nanachikun, sinchi tutakamam llamkanpas.

¹⁹Huknin makinwanmi kallapanta hapiykun hukninwanñataqmi puchkatilluta tinkan.

²⁰Wakchakunamanwan mana piniyuqkunamanmi imallantapas qoykun.

²¹Ritimuptinpas ayllunmantaqa manam llakikunchu, ayllunkunaqa rakta pachayuq kasqanrayku.

²²Payqa llikllakunatam awan, pachankunapas fino telamantam.

²³Qosanpas llaqtapa punkunkunapiqa ancha reqsisqam, llaqtapa ancianonkunawan kuskam tiyanpas.

²⁴Chayna warmiqa pachakunata siraspanmi rantikun, chumpikunata awaruspanmi negociantekunaman rantikun.

²⁵Kallpawan chaynataq respetasqa kaywanmi pachallikun, payqa hamuq punchawkunamantapas asikunmi.

²⁶Payqa yachaywanmi imatapas riman, ancha kuyakuywantaqmi yachachimpas.

²⁷Ayllunkuna imaynam kawsasqantam sumaqta qawan, mana llamkayninpa chanintaqa manam mikunchu.

²⁸Wawankunapas hatarispankum ¡ancha kusikuyniyuq! nispa sutichanku, qosanpas alabaspam nin:

²⁹Allin warmikunaqa achkallañam, qanmi ichaqa llapallanta masyarunki, nispa.

³⁰Kuyayllapaq kaywan buenamoza kayqa tukuruqllam, Tayta Diosta respetaq warmim ichaqa alabasqa kanqa.

³¹Tukuy ima ruwasqantayá lliw runa yachachun, llaqtapa punkunkunapiyá ruwayninkunamanta alabachunku.