Read CHUYA QELLQA La Biblia en Quechua de Ayacucho 2012 Proverbios 5 Bible Online

Proverbios 5 - CHUYA QELLQA La Biblia en Quechua de Ayacucho 2012 bible

Proverbios 5

¹Churilláy, yachachikuyniyta sumaqta uyariy, consejasqaykunata sumaqta uyariy,

²chaynapi llutanta ama rimanaykipaq, aswanqa yachaywan rimanaykipaq.

³Qosanta engañaq warmipa rimayninqa mielmantapas aswan miskiraqmi, aceitemantapas aswan llampuraqmi,

⁴tukupayninmi ichaqa ajenjo hina qatqe, iskay filoyuq espadamantapas aswan kuchukuqmi.

⁵Chayna warmipa ñanninqa wañuymanmi apakun, payqa wañuqkunapa kasqanmanmi pusakun

⁶payqa kawsay ñantapas wischupakunmi, manam maynin purisqantapas musyakunchu, ñanninpas paypaqqa urmachikuqmi.

⁷Chaynaqa, churilláy uyariwaspayá nisqaykunamanta ama rakikuychu.

⁸Chayna warmimantaqa anchurikuy, ama punkunmanpas asuykuychu,

⁹chaynapi mana reqsisqakunawan kallpaykitapas ama tukunaykipaq, wataykikunatapas millay runakunawan ama usuchinaykipaq,

¹⁰yanqañataq mana reqsisqakuna kallpaykiwan saksakunmanku, llamkasqaykipas mana reqsisqapa wasinpi tukunman.

¹¹Chaynapiqa machuyaspaykim kallpayki pisiptin qepa punchawkunata ñakakuwaq,

¹²yanqañataq ñakakuspa niwaq: “Imapaqraq rimapayawasqankuta qepancharqani, imapaqraq anyawasqankuta wischupakurqani,

¹³yachachiwaqniytapas manam kasurqanichu, consejawasqantapas manam uyariqpas tukurqanichu,

¹⁴kunanqa llaqtamasiykunapa qayllanpim yaqalla sasachakuyman chayaruni”, nispa.

¹⁵Yakutapas kikikipa pozoykimanta tomakuy, pukyuykimanta lloqsiq yakuta tomakuy.

¹⁶Pukyuykipa yakuntaqa ama usuchiychu, amataqyá callekunamanpas yanqaqa usuchiychu.

¹⁷Pozoykipa yakunqa qamllapaqyá kachun, amayá mana reqsisqakunamanqa qoychu.

¹⁸Pukyuykiqa Diospa bendecisqanyá kachun, joven kaspa casarakusqayki warma yanallaykiwanyá kusikuy,

¹⁹payqa ancha kuyayllapaq sumaq luwichu hinam; kuyakuynillanwan tukuy tiempo contentakuy, paypa kuyakuynillanpi tukuy tiempo kusikuy.

²⁰Churilláy, ¿Imapaqtaq hukpa warminwan wichiwaq? ¿Imapaqtaq hukpa warminta abrazawaq?

²¹Runapa ñanninqa Tayta Diospa qayllanpim kachkan, imayna kawsasqantapas qawachkanmi.

²²Mana allin runataqa mana allin ruwayllanmi chaqnarunqa, kikinpa huchallanmi waska hina teqorunqa,

²³mana kasukuyninmi wañurachinqa, mana yachaywan ruwayninmi chinkarachinqa.