Read CHUYA QELLQA La Biblia en Quechua de Ayacucho 2012 Proverbios 6 Bible Online

Proverbios 6 - CHUYA QELLQA La Biblia en Quechua de Ayacucho 2012 bible

Proverbios 6

¹Churilláy, runamasikita garantizaspaykiqa, otaq hukpa rantinpi palabraykita qospaykiqa,

²kikikipa rimasqallaykiwanmi toqllawan hina watarachikunki.

³Chaynaqa churilláy, runamasikipa makinman wichiykusqaykimanta librakunaykipaqyá kayta ruway: Rispayki qayllanpi uchuychakuspa garantizanaykipaq rimasqaykita chinkachimuy.

⁴Amayá puñuytapas tariychu, nitaq ñawikitapas wichqaykuychu;

⁵lazoqninmanta lluptichkaq luwichu hinayá lluptikuy, trampamanta lluptiruq urpi hinayá ayqekuy.

⁶Yaw, qella runa, sisita qaway, imam ruwasqanta qawaspa yachayta chaskiy.

⁷Sisiqa mana capitanniyuq kachkaspapas, mana kamachiqniyuq kachkaspapas,

⁸rutuy tiempopim mikunanta huñukun, cosecha tiempopim mikunanta taqekun.

⁹Yaw, qella runa, ¿ima horakamataq puñunki? ¿Haykapitaq puñusqaykimanta hatarinki?

¹⁰Puñunaykikamam, puñuywan hapichikunaykikamam, makikita oqllapakuykuspa samanaykikamam,

¹¹yanqa purikuq qella runa hina wakchayay chayaramusunki, armayuq suwa hinam yarqaypas hayparamusunki.

¹²Mana allin runaqa, millakuypaqta ruwaq runaqa, llullakunallata willakachakustinmi purin;

¹³engañananpaqmi ñawinkunata qemchityachin, chakinkunawanmi señaschan, dedonkunawanmi tuksin;

¹⁴sonqonpipas mana allinkunallam tarikun, mana allinllatam tukuy tiempo yuyaymanan, cheqninakuyllatam hatarichin.

¹⁵Chayraykum qonqaymanta sasachakuypi tarikunqa, qonqaymantam pasaypaqta puchukarunqa.

¹⁶Soqta huchakunatam Tayta Dios cheqnin, qanchis kaqtañataqmi pasaypaqta millakun:

¹⁷Hatun tukuyta, llullakuyta, mana huchayuq runa wañuchiyta,

¹⁸mana allinkunallata tanteaq sonqota, mana allin ruwayman chaylla kallpaqta,

¹⁹llulla rimaq testigota, wawqentinta peleanachiqta.

²⁰Churilláy, taytaykipa kamachisusqaykita kasukuy, mamaykipa yachachisusqaykita ama qonqaychu.

²¹Sonqoykipi waqaychay, collarta hina kunkaykiman wallqakuy.

²²Chaykunam puriptikipas pusasunki, puñuruptikipas waqaychasunki, rikchariptikipas rimapayasunki.

²³Kamachikuykunaqa mechero hinam, yachachikuykunaqa achkiy hinam; anyasqa kaywan consejasqa kayñataqmi kawsayman pusakuq ñan hina.

²⁴Chaykunam mana allin warmimanta waqaychasunki, qosanta engañaq warmipa miskillaña rimayninmantam harkaykusunki.

²⁵Amayá kuyayllapaq kaynintaqa munapayaychu, amataq qawasusqaykiwanpas sonqoykita suwarachikuychu.

²⁶Chuchumika warmiqa tantanraykullam qarita munapayan, qosanta engañaq warmim ichaqa qaripa vidanta maskan.

²⁷¿Yaqachu pipas ninata qasqonpi rupachiptin pachan mana kañakurunman?

²⁸¿Yaqachu pipas nina sansa hawanta puriptin chakin mana pusllukurunman?

²⁹Runamasinpa warminwan puñuruq runaqa, cheqaptapunim castigasqa kanqa.

³⁰Yarqayninta tanichinallanpaq suwakuq runataqa manam pipas imananchu;

³¹chaywanpas suwakusqanpi hapirachikuspaqa qanchis kuti mastam paganqa, wasinpi lliw kapuqninwanmi paganqa.

³²Hukpa warminwan huchallikuq runaqa mana yachayniyuq runam; chayta ruwaq runaqa kikillanmi tuñichikuchkan.

³³Chayna runaqa maqachikuspam tukuyta nichikunqa, penqayman wichisqanqa manam haykapipas chinkanqachu.

³⁴Celoso runaqa lenwachkaq nina hinam, vengakuyta munaspaqa manam pampachanqachu.

³⁵Imataña qoptinpas manam chaskinqachu, imataña pagaptinpas manam pampachanqachu.