Read CHUYA QELLQA La Biblia en Quechua de Ayacucho 2012 Proverbios 8 Bible Online

Proverbios 8 - CHUYA QELLQA La Biblia en Quechua de Ayacucho 2012 bible

Proverbios 8

¹Yachayqa simin huntatam qayaykachakun, yuyayniyuq kaypas qapariynintam uyarichikun.

²Lliw qawanankupaqmi ñanpa patankunapi, calle chawpikunapi sayan,

³llaqtaman yaykuna punkukunapim qayakun, wasipa punkukunapim kaynata qaparin:

⁴¡Runakuna, qamkunatam qayachkaykichik! ¡Runakuna, qamkunatam rimapayachkaykichik!

⁵Pisi yuyayniyuq jovenkuna, yuyayniyuq kayta yachaychik; mana tanteoyuqkuna, allin tanteakuq kayta yachaychik.

⁶Uyariychik, sumaq kaqkunatam rimasaq, allin yachachikuytam rimasaq.

⁷Simiyqa cheqap kaqkunallata rimaqmi, mana allin kaqkuna rimaytaqa millakunim.

⁸Ñoqaqa allin kaqkunallamantam rimani, simiypiqa manam imayrikuqllapas llullakuyqa kanchu.

⁹Rimasqaykunapas entiendeqpaqqa allinmi, cheqap hinaspa mana kutipay atinam.

¹⁰Qollqemantapas mastaqa, yachachikuyniytayá chaskiy; akllasqa qorimantapas mastaqa yachayniyuq kaytayá maskay, nispa.

¹¹Yachayqa alhajakunamantapas mastam valen, yachaymanqa ima kuyayllapaqña kaqkunapas manam haypanmanchu.

¹²Ñoqa yachayqa, allin tanteakuywan kuskam yachani, yachayniyuq kaytawan allin yachachikuytam hatallini.

¹³Tayta Diosta kasukuyqa mana allin ruwayta cheqniymi. Ñoqaqa hatun tukuq runatawan hatunchakuytaqa cheqninim, mana allin kawsaytawan llullalla rimaytaqa cheqninim.

¹⁴Allin yachachikuytawan allin tanteakuytam hatallini, yachaypas atiypas ñoqapam.

¹⁵Ñoqa yanapaptiymi reykunapas munaychakunku, ñoqaraykum kamachikuqkunapas justiciata ruwanku.

¹⁶Ñoqaraykum reykunapas munaychakunku, ñoqaraykum juezkunapas alli arreglota ruwanku.

¹⁷Ñoqaqa kuyawaqniykunatam kuyani, maskawaqniykunaqa tariwanmi.

¹⁸Apuyaywan reqsisqa kaypas, kapuqniyuq kaywan allin ruwaypas, ñoqawanmi kachkan.

¹⁹Ñoqapa qosqayqa akllasqa qorimantapas aswan allinmi; ñoqapa hatallisqayqa qollqemantapas aswan allinmi.

²⁰Allin ñannintam ñoqaqa pusani, allin kawsaynintam ñoqaqa purichini.

²¹Kuyaqniykunamanqa allin herenciatam qoni, wasintapas qori-qollqewanmi huntachini.

²²Tayta Diosmi qallariymantapuni hatalliwarqaña, imatapas manaraq ruwachkaspanmi hatalliwarqaña.

²³Qallariymantapuni, kay pachapas manaraq kachkaptinraqmi, wiña-wiñaymantaraq karqaniña.

²⁴Lamar qochakunapas manaraq kachkaptinmi, pukyukunawan mayukunapas manaraq kachkaptinmi, ñoqaqa paqarirqaniña.

²⁵Orqokunapas moqokunapas manaraq kachkaptinmi, unanchasqa karqani.

²⁶Kay pachatapas tukuy imakunatapas manaraq unanchachkaptinmi, kay pachapa polvonkunapas manaraq kachkaptinmi, ñoqaqa paqarirqaniña.

²⁷Cielokunata unanchaptinpas, lamar qochapa muyuriqninta ruwaptinpas, chaypim karqani.

²⁸Cielokunata altokunapi takyachiptinpas, lamar qochapa yakunkunata takyachiptinpas, chaypim karqani.

²⁹Lamar qochapa linderonkunata churaptinpas, kay pachapa cimientonkunata churaptinpas, chaypim karqani.

³⁰Dioswan kuskam chaykunata takyachirqani, sapa punchawmi paypa kusikuynin karqani, tukuy tiempom ñoqapas paywan kusikurqani.

³¹Paypa unanchasqankunawanmi kusikurqani, runakunaraykum anchata kusikurqani.

³²Chaynaqa, warmakuna uyariwaychik: ¡Mayna kusisqam yachachisqayman hina kawsakuqkunaqa!

³³Yachachikuyniytayá uyariychik, yuyayniyuqyá kaychik, yachaytaqa amayá wischupakuychikchu.

³⁴Mayna kusisqam kanqa uyariwaqniy runaqa, wasiy punkukunapi sapa punchaw rikchan-rikchanlla maskawaqniy runaqa.

³⁵Pipas tariwaqniykunaqa, kawsaytawan Diospa kuyakuynintam haypanqa.

³⁶Ñoqamanta karunchakuruq runam ichaqa wañuyman kikillan churakurun, pipas cheqniwaqniykunaqa wañuytam kuyanku.