Read CHUYA QELLQA La Biblia en Quechua de Ayacucho 2012 Eclesiastés 10 Bible Online

Eclesiastés 10 - CHUYA QELLQA La Biblia en Quechua de Ayacucho 2012 bible

Eclesiastés 10

¹Wañusqa chuspiqa perfumepa maynaña miski asnaynintapas chinkarachinmi, chaynam sumaq kawsakuq yachayniyuq runapa pantaruyninpas tukuy ima allin ruwayninta chinkarachinman.

²Yachayniyuq runapa sonqonqa allin kaqkunallapim yuyaymanan, mana yachayniyuq runapa sonqonmi ichaqa mana allin kaqkunallapi yuyaymanan.

³Mana yachayniyuq runaqa ruwayninkunawanmi mana yachayniyuq kasqanta qawachikun, rimayllanwanmi mana yachayniyuq kasqanta reqsichikun.

⁴Kamachikuqña qampaq piñakuruptinpas qasillalla kaspa pacienciakuy, pacienciakuymi ima pantaypaqpas hampiqa.

⁵Kay pachapim mana allinta rikurqani, chay mana allinqa kamachikuqkunamantam hamun:

⁶Mana yachayniyuq runakunataraqmi hatun llamkaykunaman churanku, yachayniyuq runakunatañataqmi taksan llamkaykunaman churanku.

⁷Rikurqanim esclavokunata caballopi puriqta, rikurqanitaqmi reypa churinkunatapas criado hina chakiwan puriqta.

⁸Pipas uchkuta ruwaqqa chay uchkumanmi wichiykunqa, pipas perqa taqmaqqa maqta uruwanmi kachurachikunqa.

⁹Rumita pakiqqa, rumiwanmi katurachikunqa; pipas yantata chitqaqqa, waqtakurunmanmi.

¹⁰Hacha laqoyaruptin mana ñawchiyaykachispa llamkayqa kallpapaqmi, imatapas yachaywan ruwaymi aswan allinqa.

¹¹Maqta uruta manaraq allinta mansoyachichkaptin mansoyachiqninta kachuruptinqa manam imapipas servinqachu.

¹²Yachayniyuqpa rimasqankunaqa uyarinapaq hinam; mana yachayniyuqpa rimasqanmi ichaqa kikintapunipas sasachakuyman apan,

¹³payqa mana pasaqkunallata rimayta qallaykuspanmi llutan rimaykunawanña tukurun.

¹⁴Mana yachayniyuq runaqa ancha rimaysapam. Imam pasakunanta mana pipas yachachkaspaqa, ¿pitaq willanman paymanta qepaman imam pasakunantaqa?

¹⁵Mana yachayniyuq runataqa llamkasqanpas llumpaytam pisipachin, llaqtaman riq ñantapas payqa manam reqsinchu.

¹⁶¡Imaynaraq kanqa! Jovenllaraq reyniyuq nacionqa, kamachiqninkunapas convidollapi sapa punchaw kaptinkuqa.

¹⁷¡Mayna kusisqam kanqa, allin sonqoyuq reypa kamachisqan nacionqa! ¡Mayna kusisqam kanqa kamachiqninkuna horallanpi mikuspa mana machakuptinkuqa!

¹⁸Qella kasqaqa wasipa qatanpas tuñirunmi, mana llamkasqaqa wasipas tuñirunmi.

¹⁹Convidoqa saksasqa kanapaqmi, vinopas kusisqa kanapaqmi, qollqeñataqmi tukuy imatapas ruwanapaq.

²⁰Reymantaqa amayá sonqollaykipipas mana allintaqa tanteaychu, apumantaqa amayá sapallaykipipas mana allintaqa rimaychu, yanqañataq rimasqaykita uyarispa alton pawaq urpikuna willaykamunmanku.