Read CHUYA QELLQA La Biblia en Quechua de Ayacucho 2012 Eclesiastés 2 Bible Online

Eclesiastés 2 - CHUYA QELLQA La Biblia en Quechua de Ayacucho 2012 bible

Eclesiastés 2

¹Sonqoypim nirqani: “Kunanqa munasqayta ruwaspayá kusikusaq”, nispay. Ichaqa chaypas waspiy hinallam kasqa.

²Hinaspaymi yacharurqani asikuyqa mana yuyayniyuqpa ruwaynin kasqanta; kusikuyñataq mana imapaqpas valeq kasqanta.

³Yachayta sonqoyman churaykuspaymi tantearurqani aychayta vinowan kusichiyta, hinaspam upyakuyman qokururqani, kay pachapi pisi kawsayninpi llapa runa tukuy ima ruwasqanmanta imatam hurqosqankuta yachanaypaq.

⁴Hatun kaqkunatam ruwarqani, palaciokunatam ruwakurqani, uvaskunatam plantakurqani.

⁵Chakrakunatawan huertakunatam ruwakurqani, chaypim tukuy rikchaq frutakunata plantarqani.

⁶Plantasqay sachakunata parqonaypaqmi pozokunata yakupaq ruwakurqani.

⁷Criadokunata criadakunatam rantirqani, karqam wasiypi naceq criadoykunapas. Ñoqamanta ñawpaqta Jerusalenpi yachaqkunamantaqa, vacaykunawan ovejaykunapas achkallañam kapuwarqa.

⁸Qorita qollqetam montokururqani, llapa reykunapa huklaw llaqtakunapa kapuqninkunatam huñukururqani. Takiqkunatapas qarikunata warmikunatam huñururqani, tukuy rikchaq tocanakunatam ruwakururqani, runakuna aychanta kusichinanpaq ruwasqanta hina ruwaspaymi ñoqapas kusikurqani, warmiykunapas achkallañam karqa.

⁹Ancha reqsisqam rikurirurqani, ñoqamanta ñawpaqta Jerusalenpi kaqkunamantapas aswan kapuqniyuqmi rikurirurqani, chaywanpas ancha yachayniyuqmi karqani.

¹⁰Tukuy ima munasqayta ruwaspaymi aychayta tukuy imawan kusichirqani, chaykuna ruwasqaywanmi sonqoy kusikurqa, chay kusikuymi llamkasqaypa pagon karqa.

¹¹Chaymantam tukuy ima ruwasqayta qawarirqani, pisipaywan llamkasqaytam qawarirqani, hinaspam yuyaymanarqani chaykunaqa tukuruqlla kasqanta, runata ñakarichispa chinkaruqlla kasqanta.

¹²Chaymantam yuyaymanarqani yachayniyuq kaymanta, mana yachayniyuq kaymanta hinaspa mana tanteoyuq kaymanta. ¿Imataraqtaq qepay hamuq rey ruwanman? Manam imatapas ruwanqachu, aswanqa ruwasqa kaqkunallatam.

¹³Kaytam rikurqani: Imaynam achkiypas tutayaymantaqa aswan allin, chaynam yachayniyuq kaypas mana yachayniyuq kaymantaqa aswan allin.

¹⁴Yachayniyuq runaqa ñawintam allinta kicharin, mana yachayniyuqmi ichaqa tutayaypi purin. Ichaqa iskayninkutam hina chaynallata imapas pasanqa.

¹⁵Chaymi sonqoypi nirqani: “Mana yachayniyuqta pasasqanchá ñoqatapas pasaruwanqa, chaynaqa ¿imapaqtaq allin yachayniyuq kayniypas?”, nispay. Chaypas yanqapaqmi.

¹⁶Yachayniyuqtapas mana yachayniyuqtapas lliwmi qonqarunqaku; tiempopa risqanman hinam imapas qonqasqa, yachayniyuqpas mana yachayniyuqpas chaynallam wañunqaku.

¹⁷Chayraykum kawsayniytapas cheqnirurqani, kay pachapi tukuy ima ruwaypas amiruypaqña kasqanrayku. Tukuy imapas huk qawaykuyllam, waspiy hinallam.

¹⁸Kay pachapi tukuy ima ruwasqaykunatapas cheqnipakururqanim, qepay hamuqman saqenayta yuyaymanarispay.

¹⁹¿Pitaq yachan qepay hamuqqa yachayniyuq otaq mana yachayniyuqpas kanayta? Ichaqa paymi, kay pachapi yachayniyta tukuspa ñakariywan tukuy ima llamkasqaypi munaychakunqa. ¡Chaypas yanqallapaqmi!

²⁰Chaymi kay pachapi tukuy ima ruwasqayta qawarispa, pisipaywan llamkasqaymanta ñakakurqani.

²¹Runaqa yachaywan, yuyaywan, sumaqta tanteaspa ruwasqantam, mana imallapipas yanapaykuqninman saqeykunqa. ¡Chaypas yanqallapaqmi!

²²¿Imatataq runa hurqokun kay pachapi tutatapas punchawcharispa ñakariywan llamkasqanmanta?

²³Runapa kawsakuyninqa nanaypa ñakariypa huntasqanmi, tutapas yuyaymanarispanmi mana puñuyta tarinchu. ¡Chaypas yanqallapaqmi!

²⁴Runapaqqa allinqa kanman mikukuspa tomakuspa llamkayninpa rurun-wan kusikuymi. Tukuy kaykunaqa Diosmantam hamun.

²⁵Mana Dioswanqa ¿pitaq mikunman hinaspa kusikunman?

²⁶Kuyasqan runamanqa Diosmi qon yachayta, yuyayniyuq kayta hinaspa kusikuyta. Huchasapa runamanñataqmi qon llamkaspa tukuy ima montosqanta Diospa kuyasqan runaman saqenanpaq. ¡Chaypas yanqapaqmi hinaspa runata ñakarichiqllam!