Read CHUYA QELLQA La Biblia en Quechua de Ayacucho 2012 Eclesiastés 6 Bible Online

Eclesiastés 6 - CHUYA QELLQA La Biblia en Quechua de Ayacucho 2012 bible

Eclesiastés 6

¹Kanmi kay pachapi llapa runakunata ñakarichiq sasachakuy:

²Diosmi qon runaman qori-qollqeta, tukuy imata chaynataq reqsisqa kaytapas, imaña munasqanpas mana pisinankama; ichaqa chaykunawan kusikunanta Dios mana munaptinmi, mana reqsisqa runakuna chaykunamanta munaychakun. Chayqa yanqallam, manchakuypaq mana allinmi.

³Sichum huk runa pachak churiyuq kaspa unay watakunata kawsanman, ichaqa unay watakuna kawsachkaspapas allin kaqwan mana kusikuspa wañuruspa mana pampasqa kaptinqa, chay runamantaqa sullusqa wawaraqmi aswan allinqa.

⁴Chay sullusqa wawa kay achkiq pachata mana rikuspa mana reqsisqa kaptinpas,

⁵intita mana rikuspa mana imata yachachkaspapas, chay runamantaqa chay wawam hawkayayta tarirun.

⁶Sichum chay runa iskay waranqa watataña kawsaruspan allin kaqkunawan mana kusikuptinqa, ¿manachum iskayninku huk sitiollaman rinqaku?

⁷Runaqa llamkan mikunallanpaqmi, ichaqa maynataña mikuptinpas manam sonqon tiyanchu.

⁸¿Imapitaq yachaysapa runa mana yachayniyuq runata masyan? ¿Imataraqtaq wakcha runa hurqokun kay pachapi kawsasqanmanta sapaqta?

⁹Mana rikuy atina kaqmantaqa rikuy atina kaqmi aswan allinqa. Chaypas yanqallam, wayrata hapirunapaq qatikachay hinallam.

¹⁰Kunan kaqkunaqa ñawpaqmantaraqmi sutichasqaña karqa, runapa imaynam kasqanpas ñam yachasqaña karqa. Manam pipas peleanmanchu paymanta aswan atiyniyuqwanqa.

¹¹Cheqaptapunipas achka rimayqa mana allin rimaykunatam mirachin, chayqa manam imapipas runata yanapanchu.

¹²Chinkaruq waspiy hinallam runapa kawsayninqa, watankunaqa pasarunpas llantuy hinallam. Runapa kawsayninpaq imam allin kasqantaqa ¿pitaq yachan? Wañukusqanpa qepanta imakunam pasakusqantapas ¿pitaq payman willanman?