Read CHUYA QELLQA La Biblia en Quechua de Ayacucho 2012 Eclesiastés 8 Bible Online

Eclesiastés 8 - CHUYA QELLQA La Biblia en Quechua de Ayacucho 2012 bible

Eclesiastés 8

¹¿Pitaq yachayniyuq runa hinaqa kanman? ¿Pitaq imakunatapas entiendeqqa kanman? Yachayqa runapa uyantam kanchaykun, qaqchu uya kaynintam tikraykun.

²Reyta kasukuy, chaynatam Diospa qayllanpi jurarqanki.

³Qayllanmantaqa amayá utqaymanqa lloqsiruychu. Mana allin ruwaykunamanqa amayá chapukuychu. Reyqa imatapas munasqantam ruwan.

⁴Reypa nisqanqa atiyniyuqmi, pitaq payta ninman: “¿Imatataq ruwachkanki, nispa?”

⁵Kamachikuyninkuna kasukuqtaqa manam imapas pasanqachu; yachayniyuq runaqa yachanmi haykapim hinaspa imaynatam ruwaytapas.

⁶Tukuy ima munasqanchikpaqmi tiempo kan, haykapim imaynatam ruwanapaqpas kanmi tiempo; chaywanpas runapa hatun sasachakuyninqa,

⁷imakunam pasakunanmanta hinaspa haykapim pasakunanta mana yachayninmi. ¿Pitaq payman chaykunamanta willanman?

⁸Manam pipapas kawsakuyninqa rantisqachu kawsakuyninta takyachinanpaqqa, wañuytaqa manam pipas harkanmanchu. Wañuymantaqa manam pipas lluptinmanchu, qari tukuqtaqa, qari tukuq kayninpas manam libranqachu.

⁹Kay pachapi tukuy ima ruwasqankuta yachaypi rispaymi rikurqani huk runa runamasinta ñakarichinanpaq atiyniyuq kasqanta.

¹⁰Rikurqanim mana allin ruwaq runata wañuruptin hatunchaspanku waqakuywan pampasqankuta. Diosta kasukuq runatam ichaqa yachasqan llaqtapipunipas chaylla qonqarunku. Chayqa manam allinchu.

¹¹Runata mana allin ruwasqanmanta mana chaylla castigaruptinkuqa, wakin runakunapas chayllam mana allin ruwayman qokurunqaku.

¹²Kanmi runakuna pachak kutikamaña mana allinta ruwachkaspapas unayta kawsaqkuna, yachanitaqmi Diosta manchakuqkunapas allin kawsakusqankuta.

¹³Mana allin runakunam ichaqa sasachakuyllapi kanqaku, manam unaytachu kawsanqakupas; Diosta mana kasukusqankuraykum llantuy hinalla chinkarunqaku.

¹⁴Kay pachapiqa mana pasaq kaqkunallam pasakun; kanmi allin ruwaq runakuna ichaqa mana allin ruwaqkuna hinam ñakarinku. Kantaqmi mana allin runakunapas ichaqa allin ruwaqpas hinaraqmi hawka kawsakunku. Nisqayman hinaqa yanqapaqmi chaykunaqa.

¹⁵Chayraykum ñoqaqa kusikuyman sayapakuni. Runapa kay pachapi allin ruwayninqa mikukuspa, tomakuspa kusikuymi. Diospa kawsay qosqan punchawkunapi llamkasqanmantaqa chayllatam hurqonqa.

¹⁶Kay pachapi tukuy ima ruwasqankuta yachaypi rispaymi chaynataq yachayta haypaypi rispaymi, tutapas punchawpas mana puñuyta atirqanichu.

¹⁷Chaynapim Diospa tukuy ima ruwasqanta rikurqani, kay pachapi tukuy ima ruwasqantaqa manam runaqa haypayta atinmanchu. Maynataña llamkaspapas otaq maskaspanpas manam tarinqachu; yachayniyuq runapas “reqsinim” nichkaspanpas manam haypayta atinqachu.