Read CHUYA QELLQA La Biblia en Quechua de Ayacucho 2012 Cantares 6 Bible Online

Cantares 6 - CHUYA QELLQA La Biblia en Quechua de Ayacucho 2012 bible

Cantares 6

¹Llapallan warmikunamanta kuyayllapaq, ¿maymantaq warma yanayki pasakun? ¿Maylawmantaq kuyay-yanayki pasarun? Kuskanchikyá maskaramusun.

²Warma yanayqa huertanmanmi pasakun, miski asnaq plantakunapa kasqanmanmi pasarun, huertanpi michispa amanqaykunata pallakunanpaqmi pasakun.

³Ñoqaqa kuyay yanaypam kani, payñataqmi ñoqapa. Payqa amanqay waytakunapa chawpinpim michin.

⁴Kuyakusqalláy, mayna kuyayllapaqmi qamqa kanki, Tirza llaqta, Jerusalén llaqta hina kuyayllapaqmi qamqa kanki. Guerraman lloqsiq tropakuna hina qawapasmi qamqa kanki.

⁵Ñawichaykita suchuchiy ñoqamanta llumpaytañam presocharuwan, chukchaykikunapas Galaadpa qechqankunata pukllastin uraykamuchkaq cabrakuna hinam.

⁶Kiruykikunapas, millwanta ruturuspa chayllaraq bañarusqa ovejakuna hinam, iskaytakama wachakuq oveja hinam manam hukllapas qolluqqa kanchu.

⁷Veloykipa qepanpi uyaykipas iskayman partesqa granada hinam.

⁸Reypaqa soqta chunkam reinankunapas, pusaq chunkam uywanakusqan warminkunapas, mana yupay atinam sipaskunapas.

⁹Chaywanpas urpichallayqa sapachallanmi, mamanpa sapachallan wawanmi, wachakuqninpa ancha kuyasqanmi. Sipaskunapas rikuruspaqa alabankum, reypa warminkunapas alabankum, reypa uywanakusqan warmikunapas alabankum.

¹⁰¿Pitaq wak warmiqa tutapay inti hinaraq kancharimun? Killa hina kuyayllapaqmi, inti hina kancharichkaqmi, guerraman lloqsiq tropakuna hina qawapasmi.

¹¹Nogal sachakunapa kasqanmanmi uraykurqani wayqo patanpi verde sachakunata qawaykuq, uvaskuna ikllisqanta qawaykuq, granadakuna waytasqanta qawaykuq.

¹²Ichaqa mana musyakustinmi kamachiqniypa carretanpi rikurirurqani.

¹³¡Kutikamuy Sulamita, kutikamuy! ¡Kutikamuy, qawaykuytam munaykiku! ¿Imatataq Sulamitapi qawayta munankichik? Campamentopi runakuna qaylla tusunantam.