Read CHUYA QELLQA La Biblia en Quechua de Ayacucho 2012 Isaías 10 Bible Online

Isaías 10 - CHUYA QELLQA La Biblia en Quechua de Ayacucho 2012 bible

Isaías 10

¹¡Ay, imaynaraq kankichik, mana allin kamachikuykuna decretaqkuna, ñakarichinaykichikpaq kamachikuykunata qellqaqkuna!

²Qamkunaqa wakchakunatapas manam nanachikunkichikchu, llaqtaypi ñakariqkunapaqpas manam allin arreglotaqa ruwankichikchu, viudakunapa kapuqnintam suwakunkichik, mana tayta-mamayuqkunapa kapuqnintam qechunkichik.

³¿Imatataq castigo punchawpi ruwankichik? ¿Karumantaraq sasachakuy hamususqaykichik punchawpi, pimantaq yanapasunaykichikpaq hapipakunkichik? ¿Maypitaq qori-qollqekichikta saqenkichik?

⁴Preso pusasqakunawan kuska mana humillakuspaqa wañuymanñam wichinkichik. Chaywanpas Tayta Diosqa hinallam piñasqa kachkan atiyninwan castigananpaq.

⁵¡Ay, imaynaraq kanqa Asiria nacionpa reynin! Payqa castiganaypaq makiypi kaspim, piñakuyniytam makinman churani.

⁶Paytaqa kamachini, mana kasuwaspa qepanchawaqniy llaqtapa contranpim, piñachiwaqniy runakunamanta qori-qollqenkuta suwaspa qechumunanpaqmi, callepi mituta hina sarumunanpaqmi.

⁷Chaywanpas Asiria nacionpa reyninqa manam chaynatachu tantean, sonqonpipas manam chaynatachu yuyaymanan. Aswanqa achka nacionkunata tuñichispa chinkachiyllatam munan.

⁸Paymi nin: Nacionkunapa reyninkunaqa nisqayta ruwaqkunallam.

⁹Ñoqapaqqa Calno llaqtapas Carquemis llaqta hinallam, Hamat llaqtapas Arfad llaqta hinallam, Samaria llaqtapas Damasco llaqta hinallam, chay llaqtakunaqa vencenay llaqtakunallam.

¹⁰Achka-achka idolokunata yupaychaq nacionkunatam hapikuykurqani. Jerusalén llaqtamantapas Samaria llaqtamantapas, aswan achka idoloyuq nacionkunatam hapikuykurqani.

¹¹Imaynam Samaria llaqtata chaynataq idolonkunatapas ruwasqayta hinam Jerusalén llaqtata chaynataq idolonkunatapas ruwarusaq, nispa.

¹²Tayta Diosñataqmi Sión moqopi hinaspa Jerusalén llaqtapi ruway munasqankunata tukuruspan, Asiria nacionpa reyninta, hatun tukuq kayninwan ruwasqanmanta, alabakuspa, hatunchakuspa ruwasqanmanta castiganqa.

¹³Asiria nacionpa reyninmi nirqa: “Atiyniywanmi chaykunata ruwarqani, yachayniywan hinaspa yuyaysapa kasqayrayku. Nacionkunapa linderonkunatam asuchirqani, qori-qollqenkutam qechurqani. Ñoqaqa munaychakuq hinam kamachiqninkutapas wischurqani.

¹⁴Qesanpi saqesqa runtukunata hurqochkaq hinam runakunapa qori-qollqenta hapikuykuni, mana pipa sayapakusqantam llaqtakunapi munaychakuruni, manam pipas rapranta kicharirqachu manataqmi tuspakunta kicharispa chilakyaqpas karqachu”, nispa.

¹⁵¿Yaqachu hacha alabakunman paywan kuchuqmanta masta? ¿Serruchopas hatun tukunmanchu paywan kuchuqninpa contranpi? ¿Kaspimanta tawnaqa yaqachu kamachinman apaqninta?

¹⁶Chayraykum Tukuy Atiyniyuq Diosqa kallpasapa runankunata eqoyachinqa, hatu-hatunllaña kaynintam lenwachkaq ninawan hina ruparachinqa.

¹⁷Israelpa achkiqnin Tayta Diosmi lenwachkaq ninaman tikrakunqa, huk punchawllapi ruparuspam nacionpi tukuy rikchaq kichkakunatawan qorakunatapas chinkarachinqa.

¹⁸Sumaqllaña montekunatawan tukuy imapa wiñanan chakrakunatapas pasaypaqtam chinkarachinqa, manaña kallpayuq onqosqa runata hinam saqerunqa.

¹⁹Montepi sachakunapas asllañam puchurunqa, warmapapas yupanallanñam kanqa.

²⁰Chay tiempopiqa, Israel castakunamanta puchuqkunapas, Jacobpa mirayninkunamanta lluptiqkunapas wichichiqninkupiqa manañam hapipakunqakuñachu, aswanqa Señorllapiñam hapipakunqaku, Israelpa Chuya Diosllanpiñam hapipakunqaku.

²¹Jacobpa castanmanta as puchuqkunallam Atiyniyuq Diosman kutirikunqaku.

²²Israel miraykuna, qamkunamanta lamar qochapi aqo hinaña kachkaspapas, asllañam kutimunqaku. Citasqañam kachkankichik allin arregloman hina chinkachisqa kanaykichikpaq.

²³Tukuy Atiyniyuq Tayta Diosmi tantearun chayna chinkachiytaqa. Imam tanteasqantaqa lliw nacionpim ruwanqa.

²⁴Tukuy Atiyniyuq Tayta Diosmi kaynata nin: Sión moqopi yachaq llaqtalláy, Asiria runakunataqa ama manchakuychikchu, Egipto runakuna hina tawnawan waqtasuptikichikpas.

²⁵Manapas unaymantam contraykichikpi piñakuyniy tukurunqa, piñakuyniyqa enemigoykikunatañam pasaypaqta chinkachinqa, nispa.

²⁶Tukuy Atiyniyuq Tayta Diosmi Asiria nacionta castiganqa, Madián runakunata Oreb sutiyuq qaqapi castigasqanta hina. Egipto nacionmanta hamusqanku ñanpi lamar qochapa hawanman tawnan hoqarisqanta hinam castiganqa.

²⁷Chay punchawpim wasaykiman llasaq qepi churkususqayki qechusqa kanqa, servichikusunaykipaq matankaykiman yugo churasusqaykipas pakisqam kanqa, qamqa akllakusqay llaqtay kasqaykirayku.

²⁸Enemigom Ajat llaqtaman chayaramun, Migrón llaqtakamam pasaramun, Micmas llaqtapim tropanta yupaykun.

²⁹Mayuta chimparuspam Geba llaqtapi samarunku, Ramá llaqtapi runakunam katkatatachkanku, rey Saulpa llaqtan Gabaapi kaqkunam ayqekuchkanku.

³⁰Galim llaqtapi warmikuna qapariychik, Lais llaqtapi yachaqkunapas uyarinankukama. Anatot llaqtapi yachaqkuna ¡imaynaraq kankichik!

³¹Madmena llaqtamantam lluptiypawan lloqsinku. Gebim llaqtapi yachaqkunam pakakuchkanku.

³²Kunanpunim enemigoqa Nob llaqtapi samaykun, Sión llaqtatawan Jerusalenta atacananpaqmi makinta hoqariykun.

³³Tukuy Atiyniyuq Tayta Diosta qawariychik, manchakuypaq atiyninwanmi sachakunata kallmanqa, hatunnin sachakunatam kuchunqa, takyasqa sachakunatam pampaman kumparunqa.

³⁴Montey-montey sachakunatam hachawan chaqorunqa, Líbano orqom qaparillawanña wichinqa.