Read CHUYA QELLQA La Biblia en Quechua de Ayacucho 2012 Isaías 21 Bible Online

Isaías 21 - CHUYA QELLQA La Biblia en Quechua de Ayacucho 2012 bible

Isaías 21

¹Lamar qochapa hichpanpi chunniq lawpa contranpim Isaías kaynata nirqa: Imaynam Neguev lawninta sinchi wayra hamun, chaynam manchakuypaq chunniq lawmanta enemigo hamuchkan.

²Llumpay manchakuypaqmi Diospa qawachiwasqanqa: Iskay uyakunam traicionachkanku, wichichiqkunam tuñichichkanku. ¡Elam llaqta hatariy! ¡Media runakuna, Babilonia llaqtata chinkachinaykichikpaq muyuriychik! Ñakariytam puchukachisaq.

³Chaymi cuerpoyta nanay huntaykun, wachakuywan ñakarispa qewipakuq warmita hinam nanawachkan, mancharisqallaña chaynataq llakisqa kaspaymi, mana imatapas rikunichu nitaq uyarinichu.

⁴Muspaypi hinam rikuriruni, mancharikuymantam katkatatachkani, kusikuyllawanña tutaykunanta suyasqay tiempom manchakuypaqña rikurirun.

⁵Mesaman mantelta mastaykuspankum mikukuypi tomakuypi kakuchkanku. ¡Tropa kamachiqkuna, sayariychik! ¡Escudoykichikta wiraychik!

⁶Tayta Diosmi kaynata niwarqa: Llaqta cuidaqta churamuy, chaynapi imapas rikusqanta willakamunanpaq.

⁷Caballokunapa chutasqan carretakunata rikuspaqa, chaynataq runakunatapas asnokunapiraq, camellokunapiraq sillada hamuqta rikuspaqa, llaqtaman willakamunanpaq, nispa.

⁸Llaqta cuidaqñataqmi qaparispan kaynata willakamurqa: Señor, qawanaypaq maymi churawasqankupim ñoqaqa tuta punchaw sayachkani.

⁹Waqaya caballokunapa aysasqan carretapi runakuna hamuchkan. ¡Babilonia naciontam vencerunku, idolonkunapas pampakunapiñam ñutupasqa wischurayachkan! nistin.

¹⁰Erapi trillasqa trigo hina llaqtalláy, Israel llaqtapa Diosninmanta, Tukuy Atiyniyuq Tayta Diosmanta uyarisqaytam willaykichik.

¹¹Duma llaqtapa contranpim nirqa: Seir orqomantam hukkaqnin kaynata qayamuwachkan: ¡Yaw, llaqta cuidaq! ¿Yaqañachu achikyaramunqaña? ¡Yaw, llaqta cuidaq! ¿Yaqañachu achikyaramunqaña? nispa.

¹²Llaqta cuidaqñataqmi nin: Chaylla achkiramuspapas ñataqmi tutaykunqaña. Tapukuyta munaspaqa tapukuychik, huktawan tapukuq kutimuychik, nispa.

¹³Arabia runakunapa contranpim nirqa: Dedán lawmanta illaqkuna, Arabia law pukyu sachakunapi tuta samakuqkuna,

¹⁴yakunayachikuqman qonaykichikpaq yaku aparisqa lloqsiychik, Tema llaqtapi yachaqkuna, lluptimuqkunaman taripaykuspa mikuyllaykichiktapas qoykuychik.

¹⁵Paykunaqa guerrapi wañuymantam ayqekamuchkanku, espadawan flechawan wañuchisqa kanankumantam lluptimuchkanku, manchakuypaq guerramantam ayqemuchkanku.

¹⁶Señormi kaynata niwarqa: Kaymanta huk watamanmi, imaynam llamkapakuqpa contrato ruwasqan punchaw tukurun, chaynam Cedar castapa ancha reqsisqa kayninpas tukurunqa.

¹⁷Cedar castamanta flechawan peleaq tropakunapas aschallañam puchurunqa, nispa. Tukuy Atiyniyuq Tayta Diosmi chaynata nin.