Read CHUYA QELLQA La Biblia en Quechua de Ayacucho 2012 Isaías 24 Bible Online

Isaías 24 - CHUYA QELLQA La Biblia en Quechua de Ayacucho 2012 bible

Isaías 24

¹Qawariychik, Tayta Diosmi kay pachata purmachispa chunnichinqa, chaypi yachaqkunatam cheqechinqa.

²Runakunatawan sacerdotekunatapas, criadontawan patronnintapas, criadantawan patronantapas, rantiqnintawan rantikuqtapas, prestakuqtawan prestaqnintapas, lliwtam cheqechinqa.

³Tayta Diosmi kaynata nin: Kay pachaqa pasaypaqtam chunninqa, pasaypaq mana imayuqñam kanqa, nispa.

⁴Kay allpam chakiruspan qawirun, lliw kay pacham pasaypaqta qawiruspa chakirun, ancha reqsisqa runakunam hukmanyarun.

⁵Kay pachatam llapa runa millakuypaqta ruwarunku, kamachikuykunata mana kasukuspanku, allin ruwayta saqeruspanku, wiña-wiñaypaq pacto ruwasqankuta saqeruspanku.

⁶Chayraykum kay pachata ñakay intuykun runankunapas chinkanankukama; kay pachapi yachaqkunam qollurun, aschallañam puchurunku.

⁷Vinom pisirun, uvas plantakunam qawirun, kusikuyllapi kawsaqkunam llakipi rikurirun.

⁸Tamborwan kusikuyninkum qollurun, kusikuyllapiña chaqwakuyninkum tukurun, arpakunapa miskillaña waqayninmi upallarun.

⁹Takillawanña vino upyayninkum tukurun, poqosqa aqam tomaqkunapaq qatqeyarun.

¹⁰Chaqwallapiña kaq llaqtam chunnirun, wasikunapas manaña yaykuy atinankukamam wichqakurun.

¹¹Vino tukuruptinmi runakuna callekunapi waqachkanku, lliw kusikuyninkum tanirun, kay pachapim kusikuy chinkarun.

¹²Llaqtam tuñisqa qeparun, punkunkunam pakipakurun.

¹³Kay pachapi nacionkunam kayna kanqa: Imaynam aceitunasta waqtapaspa cosecharusqanku hinam kanqa, otaq uvas cosechayta tukuruptinku maskaparusqanku hinam kanqa.

¹⁴Chaymanta puchuqkunam kusikuywan qaparispa takinqaku, intipa seqaykunan lawmantaraqmi Tayta Diospa hatu-hatun kayninmanta takinqaku.

¹⁵Chayraykuyá intipa qespimunan lawpi kaqkunapas Tayta Diosta hatunchaychik, lamar qocha patanpi kaqkunapas, Israelpa yupaychasqan Tayta Diospa sutinmantam rimarinku.

¹⁶Kay pachapa patankunamantaraqmi kay takita uyarirqaniku: ¡Allinkuna ruwaq hatunchasqa kachun! niqta. Chaymi nirqani: ¡Ay, imañataq kayqa, imañataq kayqa! Iskay uyakunam contrato ruwasqankuta saqerunku, paqway iskay uyañam rikurirunku.

¹⁷Kay pachapi yachaqkuna, manchakuymi suyasuchkankichik, wichinaykichikpaq trampam listollaña kachkan.

¹⁸Chaynapim manchakuymanta lluptiqpas uchkuman wichiykunqa, uchkumanta lloqsiruspa ayqeqtañataqmi trampa hapirunqa, cielokunapi yakukunam taqtakaykamunqa, kay pachapa cimientonkuna katkatatanankama.

¹⁹Kay pacham pasaypaqta ñutupakurunqa, pasaypaqtam chitqapakurunqa, pasaypaqtam katkatatarunqa,

²⁰sinka runa hinam tampikachanqa, chuklla hinam aywikachanqa; huchankuna llumpayta llasasqanraykum manaña hatariyta atinqachu.

²¹Chay punchawmi Tayta Dios ñakarichinqa hanaq pachapi kaqkunatapas, chaynallataq kay pachapi reykunatapas.

²²Lliwta huñuruspanmi paykunata uchkupi presocharunqa, carcelpim wichqarunqa, unay punchawkuna pasaruptinmi paykunata ñakarichinqa.

²³Tukuy Atiyniyuq Tayta Dios, Sión moqopiwan Jerusalenpi munaychakuptinmi, killapas penqakunqaraq, intipas tutayanqaraq; Diospa kanchariynintam ancianonkuna rikunqaku.