Read CHUYA QELLQA La Biblia en Quechua de Ayacucho 2012 Isaías 29 Bible Online

Isaías 29 - CHUYA QELLQA La Biblia en Quechua de Ayacucho 2012 bible

Isaías 29

¹Ay, [5]Ariel, Ariel llaqta, Davidpa samarinan llaqta, fiestaykikunapas hinaraqyá iskay-kimsa watakunakama qatinaslla kachun.

²Ariel llaqtata, ñoqam sasachakuyman churasqayki, waqakuypi hinaspa sinchi llakikuypim tarikunki, kañapuwanankupaq altar hinam kanki.

³Muyuriqnikipim campamentoyta hatarichisaq, tropaykunawanmi muyurusqayki, kaspikunawanmi muyuriqnikita qencharusaq, atacanaypaqmi uchkukunata ruwachisaq.

⁴Chaynapim allpaman wichichisqa kanki, qamqa allpamantam rimarimunki, qaparimusqaykipas allpa ukumantam uyarikamunqa, rimasqaykipas wachachachay hinam uyarikunqa.

⁵Enemigoykikunapas ñutu allpaman tikrasqam kanqaku, qatikachasuqnikikunapas wayrapa apanan qopa hinam kanqaku. Qonqayllamantam chaynaqa rikurinqaku.

⁶Tukuy Atiyniyuq Tayta Diosmi, wayra-parawan, loco parawan, llumpay terremotowan, lliw ruparuq lenwachkaq ninawan, enemigoykikunata ñakarichinqa.

⁷Ariel llaqtapa contranpi peleaqkunaqa, achka llaqtakunaña kaspankupas, mosqoy hina pasaruqllam kanqaku. Ariel llaqtapa murallan tuñichiqkunam, sasachakuyman churaqninkunam, chayna kanqaku.

⁸Imaynam yarqachikuq runa mosqoyninpi mikun, rikchariruspanñataq hinalla yarqaymanta tarikun; imaynam yakumanta kaq runa mosqoyninpi yakuta toman, rikchariruspanñataq hinalla yakumanta tarikun, chaynam Sión llaqtapa contranpi peleaq achkallaña nacionkunapas kanqaku.

⁹Qamkunaqa hinallayá sonsorayaychik, mana imapas rikuq ñawsa hinayá kaychik. Vinowan mana sinkachkaspapas, poqosqa aqawan mana machachkaspapas, qamkunaqa sinka hinayá tampikachaychik.

¹⁰Tayta Diosmi qamkunaman sinchi puñunayayta kachaykamusunkichik. Profetakunapa ñawintapas wichqarunmi, visión rikuqkunapa umantapas velowanmi wankurun.

¹¹Chaymi visión rikusqaykichikpas qamkunapaqqa, pasaypaq wichqasqa libro hinaña rikurirun. Sichum leey yachaqman qoykuspa ninqaku: Kayta leey, nispanku; hinaptinmi payñataq ninqa: Wichqasqam kachkan, manam leeyta atiymanchu, nispa.

¹²Sichum mana leey yachaqman librota haywaykuspa ninqaku: Kay librota leey, nispanku; ichaqa paymi ninqa: Manam leeyta yachanichu, nispa.

¹³Señormi nin: Kay runakunaqa hawa sonqollam asuykamuwanku, simillankumantam yupaychamuwanku, sonqonkum ichaqa ñoqamanta karupi kachkan. Paykunaqa runapa yachachisqanman hinallam yupaychawanku.

¹⁴Chayraykum huktawan admirakuypaq milagrokunata ruwaspay kay llaqtata yapamanta hukmanyachisaq. Yachaysapa runankunapa yachayninmi tukurunqa, yuyaysapa runankunapa yuyayninmi waspirunqa, nispa.

¹⁵¡Ay, imaynaraq kanqaku! Tayta Diosmanta mana allin tanteasqankuta pakaqkuna tutayayllapi mana allin ruwaqkuna, paykunam ninku: “Manam pipas rikuwanchikchu, manataqmi pipas musyawanchu”, nispanku.

¹⁶Millakuypaqmi chayna kayqa. ¿Yaqachu manka ruwaq mituwan rikchakunman? ¿Yaqachu mankaqa ruwaqninta ninman: “Manam ruwawarqankichu”, nispa? ¿Yaqachu puyñuqa ruwaqninta ninman: “Manam imatapas yachankichu”, nispa?

¹⁷Manapas unaypim Líbano orqo tukuy imapa qespinan allpaman tikrakunqa. Tukuy imapa qespinan allpañataqmi sachakunapa kanan montemanña tikrakunqa.

¹⁸Chay punchawpiqa mana uyariqkunapas librota leepuptinkum uyarinqaku, ñawsakunapas ancha tutayaypi kachkaspankupas rikukunqakum.

¹⁹Sumaq sonqoyuqkunam Tayta Diospi kusikunqaku, pasaypaq wakchakunam Israelpa Chuya Diosninrayku kusikunqaku.

²⁰Runamasin ñakarichiqpas tukunqam, asipayakuqkunapas chinkanqam, mana allinkunalla maskaqkunapas chinkarunqakum.

²¹Runamasinta yanqamanta cargochaqkunaqa tukurunqam, cortepi nanachikuqman trampa churaqkunaqa chinkarunqam, mana huchayuq runata allin arreglota mana ruwaspa engañaqkunaqa puchukarunqam.

²²Chayraykum Abrahamta libraq Tayta Diosqa Jacobpa mirayninta kaynata nin: Kunanmanta hamuq punchawkunapiqa Jacobpa mirayninkunaqa manañam penqakuypaqchu kanqaku, nitaqmi ayayasqa uyayuqchu kanqaku,

²³aswanqa mirayninkunam llaqtankupi imam ruwasqayta qawaspanku Chuya Dios kasqayta reqsinqaku, hinaspam ñoqata, Israelpa Diosninta manchakuwanqaku.

²⁴Pantaypi kaqkunam yuyayniyuq kayta yachanqaku, runamasinpa qepanpi rimaqkunam yachachikuyta chaskinqaku, nispa.