Read CHUYA QELLQA La Biblia en Quechua de Ayacucho 2012 Isaías 32 Bible Online

Isaías 32 - CHUYA QELLQA La Biblia en Quechua de Ayacucho 2012 bible

Isaías 32

¹Mana pimanpas sayapakuspa munaychakuq reymi kanqa, kamachikuypi yanapaqninkunapas lliwpaqmi allinkunallata ruwanqa.

²Paykunam sapakama wayramanta harkachikuna hina kanqaku, loco wayra-paramanta harkachikuna hinam kanqaku, chaki allpapi mayukuna hinam kanqaku, sinchi rupaypi qaqapa llantuynin hinam kanqaku.

³Ñawinkutapas allinta kicharispam qawanqaku, rinrinkutapas allinta kicharispam uyarinqaku.

⁴Llutanpi ruwaqkunapas yachaywanñam imatapas ruwanqaku. Wata-wata rimaqkunapas sumaqtañam rimanqaku.

⁵Millay runataqa manañam “allin runam payqa” ninqakuñachu, yanqa rimaq runataq manañam “allin reqsisqa runam payqa” ninqakuñachu.

⁶Qacha sonqo runaqa chayna kayninman hinam riman, huchakuna ruwananpaqmi sonqonpi yuyaymanan, Tayta Diospa contranpim mana allinkunallata riman; yarqasqakunaman mana mikuy qoykuqmi, yakunayasqakunaman mana yaku qoykuqmi.

⁷Millay runaqa mana allinkunallatam ruwan, payqa mana allinkunallatam tantean, chaykunawanmi wakchakunata astawan tuñichin; mana piniyuq runapa allin arreglo mañakusqantam llullakunawan hukmanyachin.

⁸Allin runam ichaqa allinkunallata ruwan, chayraykum payqa hapipakunapaq hina.

⁹Mana ima llakiyuq warmikuna hatariychik, kay nisqayta uyariychik, kikillaykichikpi hapipakuq warmikuna, qamkunaman nisqayta uyariychik.

¹⁰Hawkalla kakuq warmikuna, kaymanta wata masninmanmi manchakuymanta katkatatankichik. Uvas pallaymi qollurunqa, cosechapas manañam kanqañachu.

¹¹Mana llakiyuq warmikuna katkatataychik, hawkallaña kakuq warmikuna manchakuymanta hukmanyaychik. Pachaykichikta lluschukuspa qachqa pachawan churakuychik.

¹²Sumaqllaña kawsay ruruq chakrakunamanta, sumaqllaña uvas ruruq chakrakunamanta, qasqoykichikta takakuspa qaparkachaychik.

¹³Runaykunapa allpanpipas, kusikuypa kanan wasikunapipas, pukllakuypa kanan llaqta ukupipas, kichkakunawan qorakunallañam wiñanqa.

¹⁴Palaciopas chunninqam, achkallaña runayuq llaqtapas chunninqam, mana yaykuy atina murallankunawan torrenkunapas wiñaypaq saqesqam kanqa; chaypiqa monte asnokunallañam kusisqa yachanqaku, uywakunallañam chaypiqa mikunqaku.

¹⁵Chaynaqa kanqa, hanaq pachamanta Diospa Espiritun ñoqanchikman hamunankamam. Hinaptinmi mana imapa qespinan chaki allpapas, lliw kawsaypa qespinanmanña tikrakunqa; tukuy imapa qespinan allpañataqmi aswan allintaraq rurunqa.

¹⁶Chay nacionpiqa mana pimanpas sayapakuywan, allin kaqkuna ruwayllañam munaychakunqa.

¹⁷Allinkuna ruwaymi hawkayaytawan, hawka samakuyta hinaspa hawka kawsakuyta, wiña-wiñaypaq rurunqa.

¹⁸Chaymi llaqtayqa waqaychasqa wasikunapi hawkalla yachakunqaku, mana pipapas ima nisqanmi hawkalla yachanqaku.

¹⁹Montepi sachakunata runtu para tukuruptinpas, llaqtata pampata hinaña ruwaruptinpas,

²⁰ancha kusisqam qamkunaqa kankichik, achkallaña yakuyuq chakrakunapim tarpunkichik, toroykichikwan asnoykichikpas kacharisqam allin pastopi mikunqaku.