Read CHUYA QELLQA La Biblia en Quechua de Ayacucho 2012 Isaías 34 Bible Online

Isaías 34 - CHUYA QELLQA La Biblia en Quechua de Ayacucho 2012 bible

Isaías 34

¹Nacionkuna, asuykamuspa uyariychik, llaqtakuna, qamkunapas uyariychik. Kay pachapas, chaypi kaqkunapas uyariychik, kay allpapi, chaypi ruruqkunapas uyariychik.

²Tayta Diosmi llapa nacionkunapaq chaynataq tropankunapaqpas piñasqa kachkan, wañuchispa chinkachisqa kanankupaqmi payqa hapiykachin.

³Paykunamanta wañuqkunam wischusqa kaspa pasaypaqta asnarinqa, orqonkunatam yawarninkupas mayu hinaraq kallpanqa.

⁴Llapa chaskakunam wichirinqa, cielokunapas papel hinam qapichukunqa, llapa chaskakunam tutayanqa, imaynam uvaspawan higospa llaqen chakispan wichimusqanta hina.

⁵Hanaq pachapim espaday sinkarunqa, Edomta juzganapaqmi uraykamunqa, wañuypaq ñakasqay llaqtamanmi uraykamunqa. Diospa espadanmi cielomanta Edom nacionpa hawanman wichiykamunqa, ñakasqay llaqtata chinkachinanpaqmi uraykamunqa.

⁶Tayta Diospa espadanmi yawarwan chaynataq wirawan chapukunqa, chapukunqaqa imaynam malta carnerokunata chaynataq cabrakunatapas sacrificiopaq nakasqankupi hinam. Señormi Bosra llaqtapi sacrificiota ruwanqa, Edom llaqtapiñataqmi nana-nanaqta wañuchinqa.

⁷Monte torokuna kaqllam, malta torokunawan poqosqa torokuna kaqllam wañunqaku. Allpankum yawarwan nuyuy-nuyuy kanqa, allpapas wirawan chapukuspam wiswirinqa.

⁸Tayta Diospa vengakunan punchawmi kanqa, Jerusalén llaqtapa kutiykachikunan watam kanqa.

⁹Edom nacionpa mayunkunam breaman tikrakunqa, polvonkunam azufreman tikrakunqa, allpankunam rupachkaq breaman tikrakunqa.

¹⁰Mana wañuspam tuta punchaw rupanqa, wiñaypaqmi qosnin wicharinqa, wiñaypaqmi purmachisqa kanqa, manaña chayninta pipas purinankamam chunninqa.

¹¹Chuseqwan erizollañam chaypiqa yachakunqaku, tukuwan cuervollañam chaypiqa yachanqaku. Tayta Diosmi purmachinanpaq cordelta chutaykunqa, chunnichinanpaqmi plomadata churaykunqa.

¹²Paykunapi munaychakunanpaqqa reypas manañam kanqañachu kamachiqninkunapas tukurunqañam.

¹³Palacionkunapipas kichkakunallaña wiñanqa, mana yaykuy atina llaqtankunapipas kichkayuq qorakunallaña wiñanqa; atoqkunawan avestruzkunallañam chaypiqa yachanqa,

¹⁴manchapa purun animalkunallañam huñunakunqaku, monte cabrakunallañam qaparkachaspa qayanakunqaku, tuta puriq animalkunallañam hawka samakunqaku,

¹⁵tukupas qesachakuspam runtunta oqllaspa toqyachinqa, chiwchinkunata lloqsichispam waqaychanqa, chaypim ullachkukunapas chinantin orqontin huñunakunqa.

¹⁶Tayta Diospa qellqanta leespayá qatipaychik; kay animalkunamantaqa chinanpas orqonpas, manam hukllanpapas parisninqa chinkarqachu. Tayta Diosmi kamachispan Espiritunwan huñunachirqa.

¹⁷Sapa animalmanmi maypim yachananta rikuchirqa, kikinpunim sapa animalman maypi yachanankupaq qoykarirqa, chaypiqa wiña-wiñaypaqmi yachakunqaku.