Read CHUYA QELLQA La Biblia en Quechua de Ayacucho 2012 Isaías 41 Bible Online

Isaías 41 - CHUYA QELLQA La Biblia en Quechua de Ayacucho 2012 bible

Isaías 41

¹Tayta Diosmi kaynata nin: Lamar qochapa patanpi nacionkuna qayllaypi upallaychik, llapa llaqtakuna kallpanchakuychik, huñunakamuychik allinta rimananchikpaq, chaynapi pim cheqap kasqanta yachananchikpaq.

²¿Pitaq intipa qespimunan lawmanta imapipas allinllaña lloqsiq reyta hatarichimurqa? ¿Pitaq nacionkunatapas reynintinta payman hapiykachirqa? Chay reymi paykunapi munaychakuspa espadanwan polvota hina ruwarunqa, flechana arconwan ñuturuspam wayrapa apanan qopata hina cheqechinqa.

³Paymi enemigonkunata utqayllaman qatin, ñantapas hawallanta hinañam kallpan.

⁴¿Pitaq kaykunata ruwarqa? ¿Pitaq qallariyninmanta llapa miraykunata qayamurqa? Ñoqa Tayta Diosmi qallariyninmanta tukupayninkama ruwarqani.

⁵Lamar qochapa patanpi nacionkunam rikuykuspanku mancharikunku, llapallan kay pachapi kaqkunapas pasaypaqtam mancharikunku, paykunam huñunakuruspa hamuchkanku.

⁶Hukninmanta hukninkama kallpanchaspam ninku: ¡Kallpanchakuy! nispanku.

⁷Idolokuna ruwaqmi alhaja ruwaqta kallpanchan, martillowan llaspayachiqmi yunquepi takaqta kallpanchan: “Sumaqmi ruwasqaykiqa kachkan”, nispa. Idolontam clavokunawan mana kuchpakurunanpaq takyachin.

⁸Serviqniy Israelpa mirayninkuna, akllakusqay Jacobpa mirayninkuna, amistadniy Abrahampa mirayninkuna uyariychik,

⁹kay pachapa patanmantaraqmi qamkunata pusamurqaykichik, karu llaqtamantaraqmi qayamuspa nirqaykichik: “Qamkunaqa akllakusqay serviqniymi kankichik, manam qepancharqaykichikchu”, nispay.

¹⁰Amayá manchakuychikchu, qamkunawanmi kachkani, amayá hukmanyaychikchu, ñoqam Diosnikichik kani, kallpanchaspaymi yanapasqaykichik, atiyniyuq makiywanmi pusasqaykichik.

¹¹Qamkunapaq piñakuqkunaqa, lliwmi hukmanyaspa penqaypi tarikunqaku, qamkunawan atipanakuqkunaqa pasaypaq chinkachisqam kanqaku.

¹²Enemigoykikunataqa maskaspapas manañam tarinkichikchu wañuchiy munasuqnikikunaqa pasaypaq chinkachisqam kanqaku.

¹³Ñoqa Tayta Diosmi, Diosnikichik kani, alleq makikichikmanta hapiqnikichikmi kaynata nikichik: “Ama manchakuychikchu, ñoqam yanapasqaykichik”, nispa.

¹⁴Ñoqa Tayta Diosmi nini: Jacobpa mirayninmanta kaq Israel llaqta, mana kallpayuq taksalla kaspapas ama manchakuychu, ñoqam yanapasqayki, Israelpa ñoqa Chuya Diosninmi reclamaqniki kani.

¹⁵Musoq trillanamanmi tikrayki, kirusapa trillanatam ruwayki, orqokunatam pasaypaqta kutanki, moqokunatapas qopata hinam rikurichinki.

¹⁶Wayrachiptikim wayra apanqa, nisyu wayram lliwta cheqerachinqa. Qanmi ichaqa Tayta Diospi kusikunki, Israelpa Chuya Diosninraykum alabakunki.

¹⁷Wakchakunawan mana imayuqkunam yakuta qallunkupas chakisqa maskachkanku, ichaqa manam tarinqakuchu; chaywanpas ñoqa Tayta Diosmi paykunataqa uyarisaq, Israelpa Diosninqa manam qonqasqaykichikchu.

¹⁸Chaki orqokunamantam mayukunata paqchachimusaq, qechwakunapim pukyukunata rikurichisaq chunniqkunatam qochakunaman tikrarusaq, chaki allpakunamantam yakukunata pullpuchimusaq.

¹⁹Cedrokunatawan acacia sachakunatam chunniqpi wiñachisaq, arrayantawan olivos sachakunatam mana imapa kanan allpapi wiñachisaq, pino sachakunatawan ciprés sachakunatam taqra allpapi wiñachisaq.

²⁰Chaynapi haykam rikuqkuna ñoqa Tayta Diospa ruwasqayta yachanankupaq, Israelpa Chuya Diosnin kaspay unanchasqayta musyanankupaq.

²¹Ñoqa Tayta Diosmi kaynata nini: Yaw, idolokuna hamuychik, imapas rimanaykichik kaptinqa rimarikuychik, hamuspa mana chayna kasqanta niwaychik. Ñoqa Jacobpa reyninmi chaynata nini.

²²Hamuspaykichik hamuq punchawkuna imaynam kananmanta willawayku, ñawpaq watakuna imaynam kasqanmanta willawayku, chaykunata yuyaymanaspa reqsinaykupaq hamuq watakuna imapim tukurunanta yachanaykupaq.

²³Hamuq watakuna imaynam kananmanta willawayku, chaynapi dioskuna kasqaykichikta yachanaykupaq, allin kaqta otaq mana allin kaqta ruwaychik, chaynapi hukmanyaspa manchakunaykupaq.

²⁴Qamkunaqa manam imachu kankichik, ruwasqaykichikpas mana valeqmi, pipas qamkunaman hapipakuqqa millakuypaqmi.

²⁵Norte lawmanta hukta hatarirachimuptiymi hamunqa, intipa qespimunan lawmantam sutiyta qayakunqa, kamachikuqkunatam mituta hina sarupanqa, manka ruwaqpa sarusqan mituta hinam sarupanqa.

²⁶¿Pitaq kaykunata yachanaykupaq ñawpaqmantaraq willakurqa? ¿Pitaq kaykuna cheqap kasqanta yachanaykupaq ñawpaqmantaraq rimarirqa? Manam mayqannikichikpas willakurqankichikchu, rimasqaykichiktaqa manam pipas uyarirqachu.

²⁷Ñoqam ñawpaqmantaraq Sión runakunaman yachachirqani, ñoqataqmi Jerusalenmanpas allin noticia willakuqta kacharqani.

²⁸Paykunata qawariptiyqa manam hukllapas yachaywan consejakuq kasqachu kaykunamanta tapukuptiy contestawananpaq.

²⁹Chay idolokunaqa llapallankum mana valeq, ruwasqankupas mana imapaq valeqmi, chaykunaqa mana imayuq toqro ukullam, chaykunaqa wayra ukuyuq idolokunallam.