Read CHUYA QELLQA La Biblia en Quechua de Ayacucho 2012 Isaías 44 Bible Online

Isaías 44 - CHUYA QELLQA La Biblia en Quechua de Ayacucho 2012 bible

Isaías 44

¹Serviqniy Jacob, akllakusqay Israel llaqta, kunan uyariway.

²Mamaykipa wiksanpi paqarichisuqnikim, unanchasuspayki yanapaqniki Tayta Diosmi kaynata nin: Serviqniy Jacobpa mirayninkuna, akllakusqay [7]Jesurún llaqta, ama manchakuychu.

³Ñoqam chakisqa allpakunaman yakuta chaqchumusaq, chaki allpakunapipas mayukunatam kallpachisaq. Miraynikikunamanmi Espirituyta chaqchurimusaq, qamkunamanta naceqkunatam bendicionniywan huntasaq.

⁴Yakunkama allpapi qorakuna hinam wiñanqaku, mayu patanpi wayawkuna hinam wiñanqaku.

⁵Paykunamantam hukkaqnin ninqa: “Ñoqaqa Tayta Diospam kani”, nispa. Hukninñataqmi ninqa: “Ñoqaqa Jacobpa mirayninmi kani”, nispa. Hukkaqninñataqmi makinpim qellqakunqa: “Ñoqaqa Tayta Diospam kani”, niqta. Hinaspam sutinman yapaykunqa “Israelpa miraynin”, niqta.

⁶Israelta reclamaq reymi, Tukuy Atiyniyuq Tayta Diosmi kaynata nin: Ñoqam kani ñawpaq kaqpas chaynataq qepa kaqpas, ñoqamanta huk Diosqa manam kanchu.

⁷¿Pitaq kanman ñoqa hina? Hatarispa rimachun. ¿Pitaq hamuq punchawkunapi imapas pasakunanmanta chaynataq imapas kananmanta willakurqa?

⁸Ama manchakuychikchu nitaq hukmanyaychikchu. ¿Manachu ñawpaqmantaraq yachayta qorqaykichik hinaspa willarqaykichik? Qamkunam testigoy kankichik. Ñoqallam Diosqa kani manam hukqa kanchu, Ñoqa hina hapipakunapaq sapaq diostaqa manam reqsinichu.

⁹Idolokunata ruwaqkunaqa mana imapaq valeq runakunam, ancha kuyasqanku idolokunapas mana imapaq valeqmi. Chaykunaman hapipakuqkunaqa mana rikukuq hinaspa mana musyakuq roqrukunam, chayraykum penqaypi kanqaku.

¹⁰Diosta hina yupaychanapaq metalta chulluchispa idolokuna ruwaq runaqa tiempontam usuchin.

¹¹Chay idolokuna yupaychaqkunaqa penqaypim tarikunqaku. Idolokuna ruwaqkunaqa wañuruq runakunallam. Llapallankum juzgasqa kanqaku, hinaspam manchakuymanta katkatatanqaku.

¹²Herrerom idolokunata kaynata ruwan: Tenazawan hapispam sansapi metalta pukayanankama rupachispa kallpanman hina martillowan takaspan idolota ruwan. Chay herrero mana mikuspanqa mana kallpayuqmi rikurirun, yakutapas mana tomaspanqa wañunayarunmi.

¹³Carpinteroñataqmi kaynata ruwan: Reglawan tupuruspanmi lapizwan chaynataq compaswan dibujarun, hinaspam formonwan llaqllaspan kuyayllapaqta runa kaqllata ruwan. Tukuruspanmi templopi churaykun.

¹⁴Cedro sachatam kuchun, sachakunapa chawpinpi wiñaq ciprestawan encina sachakunatam hapin, pinotapas parawan wiñananpaqmi plantan.

¹⁵Chaykunawanmi runakuna ninata ratachin, wakinwanmi qonikun, wakinwanñataqmi tantata ruwan, puchuqninmantam idolota llaqllarun, chaypa ñawpaqninpi qonqorakuspan yupaychananpaq.

¹⁶Wakin kullutam sansayachin aychata kankaspan saksanankama mikunanpaq. Qonikuspanñataqmi nin: Kunanqa qoniriruniñam, ninatapas qawaykuniñam, nispa.

¹⁷Puchuq kullumantañataqmi idolota llaqllarun, ñawpaqninpi qonqorakuspanmi yupaychan, hinaspam kaynata mañakun: “Waqaychaykuway, qanmi diosniy kanki”, nispan.

¹⁸Chay runakunaqa manam imatapas yachankuchu nitaqmi yuyaymanankuchu, ñawinkupas mana qawanankupaqmi wichqasqa kachkan, mana entiendenankupaqmi yuyayninkupas tutayasqa kachkan.

¹⁹Manam yachankuchu nitaqmi yuyaymanankuchu. “Kay kullupa partenta rupachispaymi tantata sansanpi ruwarqani, aychatapas kankaruspaymi mikurqani. Parten kullumantañataqmi kay millakuypaq idolota ruwaruni. Kay yupaychasqayqa kullumanta ruwasqallam”, nispa ninankupaqqa.

²⁰Cheqaptapunipas, chayna runaqa uchpallatam mikun, mana allin ruwayninmi sonqonta pantarachin. Chayna ruwaqkunaqa manam salvakuyta atinqakuchu, paykunaqa manam ninkuchu: Alleq makiypi kaqqa ¿manachum pantay? nispaqa.

²¹Jacobpa miraynin Israel llaqta, kaykunata yuyariy: Serviwaqniymi kanki, ñoqam unancharqayki, serviqniymi qamqa kanki; manam haykapipas qonqasqaykichu.

²²Ñoqam mana kasukuynikikunata puyuta hina chinkarachini, lliw huchaykikunatam sullata hina waspirachini. Ñoqaman kutirikamuway, reclamaqnikim kani.

²³Tayta Diospa tukuy kaykuna ruwasqanmanta, hanaq pacha kusikuymanta takiy; uku pacha qapariy; orqokuna kusikuymanta qapariychik, chaypi kaq sachakunapas kusikuymanta takiychik. Jacobpa miraynin Israel llaqtata Tayta Dios reclamasqanmanta chaynata ruwaychik. Israel llaqtanpim payqa hatunchakun.

²⁴Reclamaqniki Tayta Diosmi, manaraqpas nacechkaptiki unanchasuqnikim kaynata nin: Ñoqaqa tukuy imapas unanchaq Tayta Diosmi kani, ñoqam cielokunata mastarirqani, mana pipapas yanapasqanmi kay pachata takyachirqani.

²⁵Pantay profetakunapa nisqantam yanqachani, qatipaqkunatapas penqaymanmi churani; yachaysapapa yuyaymanaynintam roqruyachini, yachaysapapa yachaynintam waspichini.

²⁶Serviqniykunapa rimasqantam ichaqa cumplichini, kachasqaykunapa willakuyninkutapas allintam qespichini, chaymi ima ruwayninkupas allin lloqsin. Jerusalentam nini: Llaqtayankim nispay; Judatañataqmi nini: Kaqllamantam hatarichisqa kanki, tuñichisqa perqaykikunatam musoqmanta hatarichisaq, nispay.

²⁷Ñoqam hatun lamar qochata chakinanpaq kamachini, kallpaq mayuykikunatam chakichini.

²⁸Ñoqam rey Cirota nini: Qanmi michipuwaqniy kanki, munasqayta ruwaqmi kanki, nispay. Jerusalén llaqtatam nini: Musoqmanta hatarichisqam kanki, nispay. Templotapas kaynatam nini: Musoqmanta cimientasqam kanki, nispay.