Read CHUYA QELLQA La Biblia en Quechua de Ayacucho 2012 Isaías 47 Bible Online

Isaías 47 - CHUYA QELLQA La Biblia en Quechua de Ayacucho 2012 bible

Isaías 47

¹Tayta Diosmi kaynata nin: Sipas kaqlla Babilonia llaqta, uraykamuspa ñutu allpapi tiyay. Sipas kaqlla Caldea llaqta, tronoykimanta uraykamuspa pampapi tiyay. Manañam qanmantaqa ninqakuñachu: “Kuyayllapaq sumaq llaqta”, nispaqa.

²Rumimanta molinopi harinata kutay, veloykita hurqokuy, walikita qempikuy, mayukunata qala piernalla chimpay.

³Lliwpa qawasqanmi qalalla purinki, penqaynikim qawakunqa; chayna kanaykikamam vengakusqayki, manam pipas librasunkichu.

⁴Israelta libraq Chuya Diosmi, Tukuy Atiyniyuq Tayta Diosmi nin:

⁵Sipas kaqlla Caldea llaqta upallalla tiyay, tutayaymanña yaykuy; qamtaqa manañam pipas nisunkiñachu: “Nacionkunapi munaychakuq llaqta”, nispaqa.

⁶Runaykunawan piñasqa kaspaymi, penqaypi kanankupaq makikiman hapiykachirqayki. Ichaqa paykunatam mana llakipayarqankichu, yuyaqkunatapas llasaq qepita apachispam ñakarichirqanki.

⁷“Wiñaypaq munaychakuq señoram kasaq”, nispam nirqanki, ichaqa manam kaykunamanta tantearqankichu, nitaqmi imaynam kaykuna tukurunantapas yuyaymanarqankichu.

⁸Mana allin kawsayta kuyaq warmi uyariy, munaychakuspa hawkallaña kakuq warmi, sonqoykipim ninki: “Ñoqallam kani, ñoqa hinaqa manam pipas kanchu, manam haykapipas viudayasaqchu, nitaqmi haykapipas wawaykunaqa wañunqachu”, nispayki.

⁹Layqaña kaptikipas, qatipaqña kaptikipas, qonqaytam huk punchawllapi kay iskay llaki chayamusunki: Viudayaspam mana wawayuqña rikurirunki.

¹⁰Mana allin ruwasqaykikunapi hapipakuspam nirqanki: “Manam pipas rikuwanchu”, nispayki. Yuyaysapa hinaspa yachaysapa kaynikim pantarachisunki. “Ñoqallam kani, ñoqa hinaqa manam pipas kanchu”, nispam nirqanki.

¹¹Ñakariymi chayamusunki, manam maymanta hamusqantapas yachankichu, chay llakimantaqa layqa kaynikipas manam harkasunkichu; qonqayllamantam tuñichisunki, chayna tarikuruytaqa manam yachakurqankichu.

¹²Hinallayá layqakuynikipi purikuy, warma kasqaykimantaraq layqa kaynikipiyá kawsakuy. Icha imallapipas servisunkimanraq, ichapas runakunata manchachiwaqraq.

¹³Umachasuqnikikunaqa aminaykikamam achkallaña karqa. Kunanyá qatipaqkuna hamuchunku, cielokunatawan chaskakunata qawaspa salvasunaykipaq, imam pasakunanmanta killan-killan willasunaykipaq.

¹⁴Paykunaqa qopa hinallam, ninapa rupasqanmi tukurunqaku; ninamantaqa manam lluptiyta atinqakuchu, chay ninaqa manam ladonpi tiyaspa qonikunapaq sansallachu.

¹⁵Chaynam kanqa layqaykikunaqa, warma kasqaykimantaraq layqapusuqnikikunaqa. Sapakamam paykunaqa pantay ñanninkuta pasakunqaku, manam pipas salvayta atisunkichu.