Read CHUYA QELLQA La Biblia en Quechua de Ayacucho 2012 Isaías 51 Bible Online

Isaías 51 - CHUYA QELLQA La Biblia en Quechua de Ayacucho 2012 bible

Isaías 51

¹Tayta Diosmi nin: Allin ruwayta munaqkuna, Tayta Diosta maskaqkuna, uyariychik. Mayqan qaqamanta pakimusqa kasqaykichiktayá yuyariychik, mayqan rumimanta hurqomusqa kasqaykichiktayá qawariychik.

²Taytaykichik Abrahammanta yuyariychik, mamaykichik Saramanta yuyariychik. Abrahamta qayaptiyqa sapallanraqmi karqa, ichaqa bendecispaymi mirachirqani.

³Tayta Diosmi Sión llaqtata llakipayarinqa, purmasqa llaqtatam kuyapayarinqa, chunniq allpankunatam Edén huertaman tikranqa, mana imapa qespinan allpankunata Tayta Diospa huertanman tikranqa. Chaypiqa ancha kusikuymi kanqa, graciasta qospam takinqaku.

⁴Llaqtalláy chaylla uyariway, runaykuna allinta uyariwaychik: Yachachikuykunam ñoqamanta lloqsimunqa, kamachikuyniymi runakunata kancharinqa.

⁵Allin ruwanay punchawmi hichpamuchkanña, salvanay punchawmi chayamuchkanña, atiyniywanmi llaqtakunapi munaychakusaq. Lamar qochapa patanpi llaqtakunam ñoqamanta suyanqaku, atiyniypim hapipakunqaku.

⁶Cielokunata qawariychik, kay pachatapas qawariychik; cielokunapas qosni hinallam chinkarunqa, kay pachapas mawka pacha hinallam tukurunqa, runankunapas lliwmi puchukarunqa. Salvacionniymi ichaqa wiña-wiñaypaq takyanqa, allinkuna ruwasqayqa mana tukuqmi kanqa.

⁷Allin ruwayta yachaqkuna, yachachikuyniyta sonqoykichikpi hatalliqkuna uyariwaychik: Runakuna kamisuptikichikpas ama hukmanyaychikchu, usuchisuptikichikpas ama llakikuychikchu.

⁸Paykunaqa puyusqa pacha hinam tukurunqaku, urupa mikusqan millwa hinam tukurunqaku. Salvacionniywan allinkuna ruwasqaymi ichaqa wiñaypaq takyanqa.

⁹¡Rikchariy! ¡Tukuy Atiyniyuq Dios Taytalláy, rikchariy! Atiywan pachakuy, ñawpaq watakunapi hina rikchariy, ñawpaq tiempokunapi hina rikchariy. ¿Manachum qamqa lamar qochapi manchakuypaq [8]Rahab sutiyuq animalta tuksiparurqanki?

¹⁰¿Manachum qamqa kachkanki uku-uku lamar qochata chakichispa, salvasqaykikuna chayninta lluptinankupaq ñanta kichaykuq?

¹¹Tayta Diospa kutichimusqankunaqa, kusikuywan qaparispam Sión llaqtaman kutimunqaku, umankupas wiñaypaq kusikuywan coronasqam yaykunqaku. Ancha kusikuyllapiña tarikuptinkum nanaypas llakikuypas paykunamanta chinkanqa.

¹²Tayta Diosmi kaynata nin: Ñoqam kallpanchaqniki kani, ¿imanasqataq runakunata manchakunki? ¿Imanasqataq qora hina chakiruqlla runakunata manchakunki?

¹³¿Hanaq pachata mastarispa kay pachatapas takyachiq unanchasuqniki Tayta Diostachu qonqarunki? ¿Hinallachu ñakarichisuqnikipa piñakuyninta sapa punchaw manchakunki? ¿Maypitaq ñakarichisuqnikipa piñakuynin kachkan?

¹⁴Ñakarichisqa presokunam chaylla kacharisqa kanqaku, calabozopiqa manam wañunqakuchu, mikunankupas manam pisinqachu.

¹⁵Ñoqa Tayta Diosmi lamar qochata kuyurichini, olankunatapas qaparichini. Ñoqaqa Tukuy Atiyniyuq Tayta Dioswan sutichasqam kani.

¹⁶Cielokunatam mastarirqani, kay pachatam takyachirqani. Simikimanmi palabraykunata churarqani, makiypa llantuyninwanmi harkarqayki. Sionpi yachaqkunatam nini: “Llaqtaymi qamqa kanki”, nispay.

¹⁷¡Jerusalén llaqta rikchariy, rikcharispa hatariy! Qanmi Tayta Diospa makinmanta piñakuynin copata chaskirunki, sinkanaykikamam upyarunki, tukunaykikamam vasopi kaqta tomarunki.

¹⁸Llapallan wachakusqayki wawaykikunamantapas manam mayqanpas makikimanta pusasuqniki kanchu, lliw uywasqayki warmakunamantapas manam hukllapas makikimanta pusasuqniki kanchu.

¹⁹Kay iskay sasachakuymi hayparamusunki: Guerrawan purmachisqa kaspa yarqaymanta ñakariy. ¿Pitaq llakipayasunkiman? ¿Pitaq hawkayayta qosunkiman?

²⁰Wawaykikunam manaña kallpayuq rikurirunku, mallapi wichqasqa luwichu hinam callekunapi wischurayachkanku, paykunaqa Diosnikipa piñakuyninwan ñakarichisqam kachkanku.

²¹Chaynaqa, ñakariypa intusqan llaqta, mana vinollawan macharuq llaqta, kayta uyariy;

²²Dios Taytaykim, llaqtanmanta nanachikuq Diosnikim kaynata nin: Tankikachachisuqniki copatam makikimanta qechusqayki, machanaykipaq upyasqayki piñakuyniy vasotam qechusqayki, manañam piñakuyniy vasomantaqa upyankiñachu.

²³Aswanqa ñakarichisuqniki nacionkunamanmi chay vasomanta tomachisaq; paykunam nisuq kanki: “Hawaykita purinaykupaq pakchakuy”, nispanku. Chaymi allpata hina sarupasunaykipaq, ñanta hinam wasaykita pampaman churarqanki.