Read CHUYA QELLQA La Biblia en Quechua de Ayacucho 2012 Isaías 53 Bible Online

Isaías 53 - CHUYA QELLQA La Biblia en Quechua de Ayacucho 2012 bible

Isaías 53

¹ ¿Pitaq willakusqaykuta cheqapmi nirqa? ¿Pimantaq atiyninta Tayta Dios rikuchirqa?

²Serviqninmi chaki allpapi sapichakuq plantapa ikllipan hina Diospa qayllanpi wiñanqa. Rikchayninpas sumaq kayninpas manam kuyayllapaqñachu karqa, qawariptinchikqa rikchayninpas manam munayllapaqñachu karqa, chaynapi kuyananchikpaq.

³Runakunapapas wischupakusqan qepanchasqan runam karqa, nanaypa huntasqan runam karqa, ñakariypa intuykusqan runam karqa, runakunapapas mana rikuy munasqankum karqa, paytaqa manam kaqpaqpas hapirqanchikchu.

⁴Chaywanpas onqoyninchikkunatam payqa aparqa, nanayninchikkunatam payqa ñakarirqa, ñoqanchikqa Diospuni chaynata ñakarichisqantam nirqanchik, Diospuni chaynata castigaspa ñakarichisqantam piensarqanchik.

⁵Mana kasukusqanchikmantam tuksipasqa karqa, huchanchikkunaraykum chamchapasqa karqa, hawkayayta qowananchikpaqmi ñakarichisqa karqa, heridasqa kasqanwanmi hampisqa karqanchik.

⁶Ovejakuna hinam chinkarurqanchik, sapakamam munasqanchikman pasakurqanchik, ichaqa Tayta Diosmi huchanchikta payman qepiykachirqa.

⁷ Ñakarichiptinkupas uchuychakuykuspam mana kutipakurqachu, nakanapaq carnerota hinam wañuchinankuman aparqaku, millwan rutuchikuq oveja hinam ñakarichiqninkunapa qayllanpi simillanta wichqaykuspan mana imatapas rimarirqachu.

⁸Yanqamanta tumpaspam sentenciarqaku, manam pipas nanachikurqachu, paymantaqa manam pipas llakikurqachu. Kay pachamantam chinkarachirqaku, llaqtaypa huchanmantam wañurachirqaku.

⁹Mana ima huchayuq kachkaptinpas, llullakuyta siminpi mana tarichkaspankupas, mana allin runakunapa chawpinpim wañurachirqaku, mana allin runakunatawan kuskatam pamparurqaku.

¹⁰Tayta Diosmi sinchi nanaywan ñakarichirqa, huchanchikkunaraykum vidanta ofrendata hina wañuyman churaykurqa, ichaqa unay watakunam kawsakunqa, mirayninkunatam rikunqa, Tayta Diosmi paynintakama munasqanta ruwanqa.

¹¹Ñakarisqanpa rurunta qawaspam sinchita kusikunqa; Tayta Diospa serviqninmi achkaqta mana huchayuqtaña ruwanqa, paykunapa mana allin ruwasqankutam apanqa.

¹²Chayraykum ancha reqsisqakunapa chawpinpi payta churasaq, atiyniyuqkunawanmi guerrapi qechusqanta rakinakunqa. Chaynataqa ruwanqa vidanta wañunankama qoykusqanraykum, huchasapakunawan hukllawasqa kasqanraykum, achkaqpa huchankunata qepikuykusqanraykum huchasapakunapaq mañakusqanraykum.