Read CHUYA QELLQA La Biblia en Quechua de Ayacucho 2012 Isaías 58 Bible Online

Isaías 58 - CHUYA QELLQA La Biblia en Quechua de Ayacucho 2012 bible

Isaías 58

¹Tayta Diosmi niwarqa: Ama manchakuspa qayaykachakuy, trompeta hina qapariy, mana kasukusqanmanta llaqtanman willay, huchallikusqankumanta Jacobpa mirayninkunaman willay.

²Paykunaqa sapa punchawsi maskawanku, munasqayman hinas kawsayta munanku, allin ruwaq nación hinaraqsi allin arreglota ruwanaypaq mañawanku, ñoqa Diosninkupa kamachikuyniykuna mana saqeruq hinaraqsi ñoqa Diosman asuykamuwayta munanku.

³Chaywanpas niwankuraqmi: ¿Imapaqtaq ayunaymanku mana rikuwachkaptikikuqa? ¿Imapaqtaq ñakariymanku mana kaqpaqpas hapiwachkaptikikuqa? nispanku. Ayunasqaykichik punchawmi munasqaykichikta ruwakunkichik, llapallan llamkapakusuqnikichiktam chay punchawpi ñakarichinkichik.

⁴Ayunaspaykichikmi peleayllapi kakunkichik, ayunaspaykichikmi quejanakuyllapi kakunkichik, wañuchinakuq hinam qamkunaqa takanakunkichik, ayunaspaykichikqa amayá kunan ruwasqaykichikta hinachu ayunaychik, chaynapi mañakusqaykichikpas hanaq pachapi uyarisqa kananpaq.

⁵Qamkunaqa tanteankichik ayunoqa ñakarispa totora hina kumurayana kasqantam, qachqa pachawan pachakuruspa chay punchaw uchpapi wischurayana kasqantam. ¿Chaykuna ruwaytachu qamkuna ayunom ninkichik? ¿Chaykunata ruwaspachu Tayta Diospa agradoypaq ayuno punchawmi ninkichik?

⁶Kaynam agradoypaq ayunoqa: Mana allinkunapa cadenasqankunata kachariymi, yugopa watunta paskachkaq hina runapa ñakariyninta paskaymi, yugota pakichkaq hina ñakariq runakunata kachaykuymi,

⁷yarqasqa runata mikuykachiymi, mana wasiyuqta wasikipi samaykachiymi, mana pachayuqta pachaykachiymi, runamasikita tukuy imapi yanapaykuymi.

⁸Chaynata ruwaptikiqa ruwaynikikunam achikyaq kanchay hinaraq kancharinqa, onqoynikikunamantapas chayllam sanoyanki. Allin ruwasqaykikunam ñawpaqnikita rinqa, ñoqa Tayta Diospa kanchariyniyñataqmi qepaykita hamunqa.

⁹Chayna kaptinqa qayakamuwasqaykitapas uyarisqaykim, yanapanaypaq qayakamuwaptikipas “kaypim kachkani”, nisqaykim. Runamasikita manaña ñakarichiptikiqa, runamasikita millay rimaywan burlakuspa manaña insultaptikiqa,

¹⁰yarqaymanta kaqkunata mikuykachiptikiqa, ñakariqkunata sasachakuyninpi yanapaykuptikiqa achkiy hinam tutayaypi kancharinki, llantuynikipas chawpi punchawpi achkiy hinam rikurinqa.

¹¹Ñoqa Tayta Diosmi sapa punchaw pusasqayki, mana imapa kananpim saksasqata uywasqayki, cuerpoykitam kallpanchasqayki, parqosqa huerta hinam kanki, mana chakiq pukyu hinam kanki.

¹²Miraynikikunam tuñisqa kaqkunata musoqmanta perqanqaku, ñawpaq cimientasqankutam takyachinqaku, hinaptinmi qamta sutichasunki: “Tuñichisqa perqakunata allichaq, purmasqa wasikunata musoqmanta hatarichiq”, nispa.

¹³Sichum samana punchawniypi samaspaykiqa ruwaynikikunata samana punchawniypi mana ruwaspaykiqa, chay punchawta “kusikuna punchaw, Diospaq sapaqchasqa punchaw, kasukuna punchaw” nispa sutichaspaykiqa, manaña munasqaykipi purispa kasukuspaykiqa, nitaq munasqaykita maskaspa yanqakunapi mana purispaykiqa,

¹⁴ñoqa Tayta Diospim kusikuyta tarinki. Hinaptinqa altomanmi hoqarisqayki, ancha reqsisqatam ruwasqayki, taytayki Jacobpa herencian allpapi kawsaykunatam mikuchisqayki. Ñoqa Tayta Diosmi chaynata nini.