Read CHUYA QELLQA La Biblia en Quechua de Ayacucho 2012 Isaías 60 Bible Online

Isaías 60 - CHUYA QELLQA La Biblia en Quechua de Ayacucho 2012 bible

Isaías 60

¹¡Jerusalén llaqta, hatarispa kanchariy! Achkiqnikim chayaramun, Tayta Diospa achkiyninmi kanchariykusunki.

²Kay pachatam tutayay intuykun, tutayaymi nacionkunata pampaykun; qamtam ichaqa Tayta Dios kanchaykusunki, achkiriyninmi hawaykipi qawachikunqa.

³Nacionkunapas achkiynikipim purinqaku, reykunapas kanchaynikipim purinqaku.

⁴Muyuriqnikita qawariy: Llapallankum huñunakuruspa qanman hamuchkanku, qari churikikunam karukunamantaraq hamuchkanku, warmi churikikunatam marqaypi apamuchkanku.

⁵Paykunata qawaykuspam uyaykipas kancharinqa, sonqoykimanpas kusikuymi huntaykunqa; llapa nacionkunapa kapuqninkunatam qanman apamunqaku, lamar qochapa patanpi llaqtakunapa qori-qollqentam qosunki.

⁶Madián lawmantawan Efa lawmantam achkallaña camellokuna huntaykamusunki. Sabá lawmantapas qoritawan inciensotam apamusunki, Tayta Diostam tukuy ruwasqankunamanta hatunchanqaku.

⁷Cedar lawpi llapallan uywakunam qampaq huñumusqa kanqa, Nebaiot lawpi carnerokunam qampaq kanqa, chaykunam altarniypi sumaq ofrenda kanqa, kuyayllapaq temploytam aswanraq sumaqyachisaq.

⁸¿Pikunataq waknaña puyu hina pawaqkunaqa, wasinman kutiq palomakuna hina pawaqkunaqa?

⁹Lamar qochapa patanpi nacionkunam ñoqapi hapipakuspa hamuchkanku, Tarsis lawmanta barcokunam ñawpamuchkanku, miraynikikunata karumanta apamuspam hamuchkanku, qori-qollqenkutawan kuskatam apamuchkanku. Ñoqa Tayta Diosta yupaychaqmi hamuchkanku, reqsisqataña ruwasuqniki Israelpa Chuya Diosninraykum hamuchkanku.

¹⁰Huklaw llaqtayuqkunam perqaykikunata hatarichinqa, paykunapa reyninkunam serviqniki kanqa. Piñakuspaymi ñakarichirqayki, kunanñataqmi kuyapayasqayrayku llakipayasqayki.

¹¹Punkuykikunapas tukuy tiempom kicharayanqa, nacionkunamanta qori-qollqeta apamusunaykipaqmi, vencesqa reyninkunata pusamusunaykipaqmi, tuta punchaw kicharayanqa.

¹²Mana servisuqniki nacionqa chinkachisqam kanqa, chayna nacionqa pasaypaq purmachisqam kanqa.

¹³Temployta kuyayllapaqta ruwanankupaqmi, sarupakunay temployta ancha reqsisqata ruwanankupaqmi, Líbano orqopi cipreskunata, pinokunata, bojes sachakunata qanman apamusunki.

¹⁴Ñakarichiqnikikunapa churinkunam uchuychakuspanku ñawpaqnikiman hamunqaku, usuchisuqnikikunam ñawpaqnikipi qonqoranqaku, paykunam sutichasunki: “Tayta Diospa llaqtan, Israelpa Chuya Diosninpa Sión llaqtan”, nispanku.

¹⁵Saqesqa, cheqnisqa hinaspa manaña pipapas purinan kanaykimantaqa, wiñaypaq reqsisqatam ruwasqayki, miraykunapa kusikunanpaqmi wiñaypaq churasqayki.

¹⁶Nacionkunam allinnin mikuyta qosunki, reykunam qori-qollqenta apamusunki; chaynapim reqsiwanki, ñoqa Tayta Dios salvaqniki kasqayta, Jacobpa Atiyniyuq Diosnin reclamaqniki kasqayta.

¹⁷Broncepa rantinpim qorita qosqayki, fierropa rantinpim qollqeta qosqayki, kullupa rantinpim bronceta qosqayki, rumipa rantinpim fierrota qosqayki. Hawkayaymi qamta pusasunki, allinkunata ruwaymi qamta kamachisunki.

¹⁸Allpaykipiqa wañuchinakuypas manam uyarikunqañachu, tuñichinakuywan purmachinakuypas manam kanqañachu. Murallaykikunatam “Libraqniy” nispa sutichanki, punkuykikunatam “Yupaychana” nispa sutichanki.

¹⁹Punchawpas manañam intichu kanchasuqnikiqa kanqa, tutanpas manañam killachu achkisuqnikiqa kanqa, aswanqa Tayta Diosllañam wiñaypaq achkirisunki, Diosnikim wiñaypaq kancharisunki.

²⁰Intikipas manañam seqaykunqachu, killaykipas manañam chinkaykunqachu, aswanqa Tayta Diosllañam wiñaypaq kanchasunki; llakikipas waqaynikipas tukunqañam.

²¹Runaykikunapas llaqtantinmi allin ruwaqkunaña kanqaku, wiñaypaqmi allpankupi yachanqaku. Paykunam plantakusqaypa ikllipankuna kanqaku, atiyniyta qawachikunaypaq makiywan ruwakusqaykunam kanqaku.

²²Aschalla kaqkunam waranqaman mirarunqa, taksa llaqtachamantam hatun nación hatarinqa. Ñoqa Tayta Diosmi chaytaqa tiemponpi ruwasaq.