Read CHUYA QELLQA La Biblia en Quechua de Ayacucho 2012 Isaías 63 Bible Online

Isaías 63 - CHUYA QELLQA La Biblia en Quechua de Ayacucho 2012 bible

Isaías 63

¹¿Pitaq wak Edom lawmanta, Bosra lawmanta pukankama pachayuq hamuchkan? ¿Pitaq wak allin pachasqa qari-qarillaña hamuchkan? Ñoqa cheqap rimaq Tayta Diosmi hamuchkani, atiyniywan salvaqmi hamuchkani.

²¿Imaynanpitaq pachaykiqa puka? ¿Imaynanpitaq uvas saruqpa pachan hinaqa kachkan?

³ Arí, ñoqaqa sapallaymi saruna uchkupi uvasta sarumurqani, manam pipas yanapawarqachu, ancha rabiasqam sarumurqani, ancha piñasqam llenqamurqani. Yawarninkum pachayman pawaykamuwan, chaymi pachayta lliw qachacharamuwan.

⁴Vengakunay punchawmi chayaramunña, llaqtayta reclamanay punchawmi chayaramunña.

⁵Qawariptiyqa manam pipas yanapaqniy karqachu, mana pipas kallpanchaqniy kasqanraykum admirakurqani. Atiyllaymi vencechiwarqa, piñakuyllaymi kallpanchawarqa.

⁶Piñakuywanmi llaqtakunatapas saruparqani, rabiakuyniywanmi paykunataqa sinkachirqani, yawarninkutapas pampamanmi chaqchurqani.

⁷Tayta Diospa kuyakuyninmantam willakusaq, ñoqanchikrayku tukuy ima ruwasqankunata yuyarispam, Israelta tukuy imapi bendecisqanta yuyarispam, llakipayakuyninman hina ruwasqanmanta yuyarispam, llumpay kuyapayakuyninta yuyarispam takisaq.

⁸Tayta Diosmi nirqa: “Cheqaptapunipas llaqtayqa mana llullakuq churiykunam”, nispa. Chayraykum paykunata salvarqa.

⁹Runankunapa ñakarisqankunatam paypas ñakarirqa. Manam huk angelchu nitaqmi hukkaqnin kachamusqanchu paykunataqa salvarqa, aswanqa kikin Diosmi salvarqa. Diosmi kuyakuyninpi llakipayaspan paykunataqa reclamarqa, hoqarispanmi paykunataqa marqayninpi aparqa, chaynallatam tukuy tiempo ruwarqa.

¹⁰Paykunam ichaqa mana kasukuspanku Chuya Espiritunta llakichirqaku; chayraykum enemigonku hina rikurispa paykunapa contranpiña pelearqa.

¹¹Moisesmantawan llaqtanmanta yuyarispankum tapunakurqaku: ¿Maypitaq kachkan lamar qochamanta michiqninkunatawan ovejankunata salvaq Diosqa? ¿Maypitaq kachkan Moisesman Chuya Espirituta qoq Diosqa?

¹²¿Maypitaq kachkan Moisesta yanapananpaq admirakuypaq atiyninta kachamuqqa? ¿Maypitaq kachkan llaqtanpa qayllanpi lamar qochata kichariqqa? ¿Maypitaq kachkan wiñaypaq reqsisqa kananpaq chaykunata ruwaqqa?

¹³¿Maypitaq kachkan llaqtanta lamar qocha ukunta pusamuqqa? ¿Maypitaq kachkan caballota hina chunniqninta mana urmachispa llaqtanta pusamuqqa? nispanku.

¹⁴Tayta Diospa Espiritunmi paykunata, pampaman uraykuq animalta hina michirqa. Diosnilláy, chaynatam llaqtaykita pusarqanki, chaynatam sutikitapas ancha reqsisqata ruwarqanki.

¹⁵Dios Taytalláy, hanaq pacha suma-sumaq chuya wasikimanta qawarimuy. ¿Maypitaq kachkan atiynikiwan kuyakuynikiqa? ¿Maypitaq kachkan allin sonqo kaynikiqa? ¿Llakipayakuynikichu ñoqaykupaq tukurun?

¹⁶¡Qanmi taytayku kanki! Taytayku Abrahamña qonqawaptinkupas, taytayku Jacobña saqewaptinkupas, Dios Taytallayku qanmi Taytayku kanki, wiñaymanta wiñaykama libraqniykum kanki.

¹⁷Dios Taytalláy, ¿imanasqataq ñannikimanta kachaykuwaspaykiku sonqoykuta rumiyarachinki manaña qamta manchakunaykupaq? Serviqniki Israelpa mirayninkunaraykuyá kutimuwayku.

¹⁸Sapaqchasqayki runaykikunaqa manam unaychu allpaykupi yacharqaniku, chuya wasikitapas enemigoykum sarutyarunku.

¹⁹Qampa mana haykapipas munaychakusqayki hinam kachkaniku, manaña haykapipas sutikiwan sutichasqa hinam kachkaniku.