Read CHUYA QELLQA La Biblia en Quechua de Ayacucho 2012 Isaías 66 Bible Online

Isaías 66 - CHUYA QELLQA La Biblia en Quechua de Ayacucho 2012 bible

Isaías 66

¹ Tayta Diosmi kaynata nin: Hanaq pachaqa tiyanay tronoymi, kay pachañataqmi sarupakunay. ¿Maypitaq wasita ruwapuwankichikman? ¿Maypitaq samarinaypaq allichapuwankichikman?

²Tukuy imapas ñoqapa ruwasqallaymi, chaymi tukuy imapas rikurirqa. Ñoqa Tayta Diosmi chaynata nini. Ñoqaqa nanachikuni humillakuspa wanakuq runakunatam, yachachikuyniy kasukuq runakunatam.

³Ichaqa Torota sacrificapuwaqniymi runatapas wañuchintaq, ovejata kañapuwaqniymi allqotapas nakantaq; kawsaykunata ofrecewaqniymi kuchipa yawarnintapas ofrecentaq; inciensota kañapuwaqniymi idolokunatapas yupaychantaq. Paykunaqa Diospa millakusqanta ruwaspam kusikunku.

⁴Ñoqapas ñakariytam paykunapaq akllasaq, ancha manchakusqankutam paykunaman apamusaq. Qayakuptiymi mana pipas contestawarqachu, rimapayaptiymi mana pipas uyariwarqachu, aswanqa qawachkaptiymi mana allinta ruwarqaku, mana munasqay kaqtam akllakurqaku.

⁵Tayta Diospa nisqanta kasukuqkuna uyariychik. Ñoqata kuyawasqaykichikrayku cheqnispa wischusuqnikichik wawqekichikkunam kaynata ninku: “Tayta Diosyá atiyninta qawachikuchun, chaynapi kusikusqaykichikta qawanaykupaq”, nispanku. Ichaqa paykunam penqayman churasqa kanqaku.

⁶Llaqtapim qayakuy uyarikun, templomantam qayakuy uyarikun, Tayta Diospa qapariyninmi chayqa, enemigonkunamanmi imam ruwasqanman hina pagapuchkan.

⁷Jerusalenmi manaraq tiemponpi wachakurun, manaraq nanaynin hapichkaptinmi qari wawata wachakurun.

⁸¿Pitaq chaynakunata uyarirqa? ¿Pitaq chaynakunata rikurqa? ¿Yaqachu huk punchawllapi allpa pacha wiksayakurunman? ¿Yaqachu huk punchawllapi llaqta paqarirunman? Sión llaqtam ichaqa nanaynin hapiruptin wawankunata chaylla wachakurun.

⁹Ñoqa Tayta Diosmi nini: Ñoqaqa kawsay qokuqmi kani, ¿imaynataq wachakunanta harkakuyman miranankuta munachkaspayqa? nispa.

¹⁰Jerusalén llaqtawan kusikuychik, kuyaqninkuna payrayku llapallaykichik kusikuychik; Jerusalenrayku waqaqkuna kusikunaykichikpaq payman kuskanchakuychik,

¹¹paymi wawanta ñuñuchkaq mama hina saksanaykichikkama consuelasunkichik, saksanaykichikkamam ñuñunkichik, lechewan huntasqa ñuñunkunamantam kusikunkichik.

¹²Ñoqa Tayta Diosmi nini: Hawkayaytam mayuta hina Jerusalenman kacharimusaq, nacionkunapa tukuy ima kapuqnintam lloqllata hina chayachimusaq. Paymi qamkunata mikuchisunkichik, marqayninpi apakachasqam kankichik, wawanta moqonpi tusuchichkaq mama hinam kuyasunkichik.

¹³Imaynam wawanta maman consuelan chaynatam qamkunata consuelasqaykichik, Jerusalén llaqtapim consuelota tarinkichik.

¹⁴Chayta qawaspam sonqoykichik kusikunqa, llanllariq qora hinam tulluykichikpas musoqyanqa. Tayta Diosmi serviqninkunaman atiyninta reqsichinqa, enemigonkunamanmi ichaqa piñakuyninta rikuchinqa.

¹⁵Tayta Diosqa ninapa chawpinpim hamuchkan, carretankunapas kallpasapa viento hinaraqmi hamuchkan; llumpay piñakuynintam kacharimunqa, lenwachkaq nina hina piñakuyninwami castiganqa.

¹⁶Tayta Diosqa ninawanmi juzganqa, guerrawanmi llapallan runakunata juzganqa, Tayta Diosqa achka-achkatam wañuchinqa, nispa.

¹⁷Tayta Diosmi kaynata nin: Idolokunata yupaychanankupaq huertakunapi chuyanchakuqkunam, kuchi aycha mikuqkunam, millakuypaq animalkuna mikuqkunam, ukucha aycha mikuqkunam, llapallanku chinkachisqa kanqaku.

¹⁸Ñoqaqa yachanim mana allinkuna ruwasqankuta, hinaspa yuyaymanasqankutapas. Chayraykum hamuspay llapa nacionkunata huñusaq, tukuy rikchaq rimayniyuq runakunatam huñusaq, paykunam hamuspa atiyniyta qawanqaku.

¹⁹Paykunamanmi huk señalta qosaq. Wañuymanta lluptiqkunatam kay nacionkunaman kachasaq: Tarsis llaqtaman, Libia llaqtaman, flechana arma manejaq Lidia llaqtaman, Tubal llaqtaman Grecia llaqtaman, hinaspa lamar qochapa patankunapi karu nacionkunamanpas. Chaypi kaq runakunaqa manam haykapipas ñoqamanta uyarirqakuchu, nitaqmi atiyniytapas reqsinkuchu. Paykunam chay nacionkunaman atiyniymanta willamunqaku.

²⁰Hinaspam llapa nacionkunamanta llaqtamasikichikkunata pusamunqaku, caballokunapi, carretakunapi, andaskunapi, mulakunapi hinaspa camellokunapi. Paykunatam ñoqa Tayta Diospaq ofrendata hina chuyanchakusqay Jerusalén llaqtaman pusamunqaku. Paykunam kanqaku Israelpa apamusqan ofrenda hina, nispa.

²¹Tayta Diosmi nin: Paykunamantam sacerdotekuna hinaspa levitakuna kanankupaq akllasaq, nispa.

²²Ñoqa Tayta Diosmi nini: Imaynam musoqmanta unanchasqay hanaq pachapas chaynataq allpa pachapas wiñaypaq takyanqa, chaynam miraynikikunawan sutikipas takyanqa.

²³Sapa musoq killapim, sapa samana punchawpim llapa runakuna yupaychawaqniy hamunqaku.

²⁴Lloqsimuspankum contraypi hoqarikuq runakunapa ayankunata qawanqaku. Aychankuta mikuq urukunapas manam wañunqachu, cuerponkuta rupaq ninapas manam tukunqachu. Chaykunaqa llapallan runakunapa millakusqanmi kanqa, nispa. Ñoqa Tayta Diosmi chaynata nini.