Read CHUYA QELLQA La Biblia en Quechua de Ayacucho 2012 Isaías 7 Bible Online

Isaías 7 - CHUYA QELLQA La Biblia en Quechua de Ayacucho 2012 bible

Isaías 7

¹Uziaspa willkan hinaspa Jotampa churin rey Acaz Judá nacionpi munaychakuchkaptinmi Siria nacionpa reynin Rezinwan Israel nacionpa reynin Remaliaspa churin Peka, Jerusalén llaqtata atacarqaku, ichaqa manam venceyta atirqakuchu.

²Chaytam rey Acazman chaynataq ayllunkunaman kaynata willaykurqaku: Siria llaqtawan Efraín llaqtam contraykipi hukllaña kachkanku, nispanku. Hinaptinmi rey Acazqa runankunapiwan, sinchi wayrapa kuyuchisqan sachakuna hinaraq katkatatarqaku.

³Chaymi Isaiasta Tayta Dios nirqa: Churiki [1]Sear-jasubwan kuska hanay lawpi estanqueman lloqsiy hamuq yarqapa hichpampi rey Acazwan tupanaykipaq. Chay estanquem kachkan Taqsaq runapa chakranman riq ñanpa hichpanpi.

⁴Paytam ninki: Cuidakuy hinaspa hawkalla kay ama manchakuychu nitaq sonqoykipas hukmanyachunchu chay iskay qosniq yantakunaraykuqa, Siriapa reynin Rezinpa chaynataq Remaliaspa churin Pekapa sinchi piñakuyninraykuqa.

⁵Siria runakunawan Efraín castakunaqa chaynataq Remaliaspa churin Pekapas llapallankum contraykipi kachkanku. Mana allinta ruwasunaykipaqmi kaynata rimanakurunku:

⁶“Judá nacionta atacaramusunchik, paykunata mancharirachimusunchik, venceramuspa rakinakaramusunchik, rey kananpaq Tabeelpa churinta churaramusunchik”, nispanku.

⁷Ichaqa Tayta Diosmi nin: Chay piensasqankuqa manam cumplikunqachu.

⁸Damasco llaqtaqa Siria nacionpa capitalninmi, Rezinñataqmi Damasco llaqtapa reynin. Soqta chunka pichqayuq watamantam Efraín casta otaq Israel nacionqa manaña nación kanankama chinkachisqa kanqa.

⁹Samaria llaqtaqa Efrainpa otaq Israel nacionpa capitalninmi, Remaliaspa churin Pekañataqmi Samaria llaqtapa reynin. Sichu qamkunapas ñoqapi mana hapipakuspaqa manam unaytaqa takyankichikchu, nispa.

¹⁰Huktawan rimapayaspanmi rey Acazta Tayta Dios nirqa:

¹¹Tayta Diosta mañakuy huk señalta ruwananpaq, uku-ukukunapi ruwananpaq otaq alto-altokunapi ruwananpaqpas, nispa.

¹²Rey Acazñataqmi nirqa: Manam mañakusaqchu, nitaqmi Tayta Diostaqa pruebasaqchu, nispa.

¹³Chaymi Isaías nirqa: Rey Davidpa castankuna, kayta uyariychik: ¿Yanqallapaqchu rikchakapusunkichik runakunata piñachiynikichik? ¿Chaychum Diosniytapas piñachiyta munankichik?

¹⁴Chaynaqa, kikin Diosmi señalta qosunkichik: Manaraq qari reqsiq sipasmi wiksayakuruspan qari wawata wachakunqa. Paytam [2]Emanuelwan sutichanqa.

¹⁵Chay wawam mantequillatawan mielta mikunqa, mana allin kaqta wischuspan allin kaqta akllay yachanankama.

¹⁶Manaraqpas allin kaqta akllaspa mana allin kaqtañataq wischuyta yachachkaptinmi, chay manchakusqayki iskay reykunapa nacionninkuna chunnichisqa kanqa.

¹⁷Tayta Diosmi hatun sasachakuyta kachamunqa, qampaq, llaqtaykipaq chaynataq aylluykikunapaqpas. Judá nacionmanta Israel nacionpa rakikusqan punchawmantapas manam kayna sasachakuyqa karqachu. (Asiria nacionpa reyninmantam kaypiqa rimachkan)

¹⁸Chay tiempopim Tayta Dios silbarispa pusamunqa, Egipto llaqtapa mayun patanpi chuspikunata, Asiria llaqtapi abejakunata.

¹⁹Chayaramuspankum uku-uku wayqokunapi, qaqakunapi, kichka ukukunapi, animalkunapa tomanan pukyukunapipas tiyarunqaku.

²⁰Chay punchawpim Tayta Dios, Eufrates mayupa waklawninkunapi yachaq Asiria tropakunata, alkilasqan navajapaq hapiykuspan, Israel llaqtata rutunqa. Rutunqataqmi umankutapas, barbankutapas chaynallataq penqayninkupi pelokunatapas.

²¹Chay tiempopim, chullalla vaca uywaqpaqpas, chaynataq iskaylla ovejakuna hatalliqpaqpas,

²²achkallaña leche kapunqa, llukllupas mikunankama. Chay nacionpi wañunankumanta llapallan puchuqkunam llukllutawan mielta mikunqaku.

²³Chay tiempopim waranqa uvas plantakunapa wiñanan chakra, waranqa qollqepa chanin chakra, kichkakunapa chaynataq mana allin qorakunapa wiñananmanña tikrakunqa.

²⁴Chay chakramanqa yaykunqaku flechawan armasqa runakunallañam, chay allpapiqa kichkakunawan mana allin qorakunallaña wiñasqanrayku.

²⁵Kichkasapa qorakunata manchakuspankum, azadonwan ñawpaqta llamkananku moqokunamanqa manañam pipas yaykunqachu. Chay chakrakunaqa servikunqa torokunata michinankupaq, hinaspa ovejakuna sarupanallanpaqñam.