Read CHUYA QELLQA La Biblia en Quechua de Ayacucho 2012 Isaías 8 Bible Online

Isaías 8 - CHUYA QELLQA La Biblia en Quechua de Ayacucho 2012 bible

Isaías 8

¹Tayta Diosmi niwarqa: Runakuna leenanpaq hina hatun letrakunawan tablapi qellqay [3]“Maher-salal-hasbaz” niqta.

²Chaytaqa ruwanki sacerdote Uriastawan Jeberequiaspa churin Zacariasta cheqap testigokuna kanankupaq hapiykuspam.

³Chaymantam profetisa warmiywan puñururqani, hinaptinmi wiksayakuruspan huk qari wawata wachakururqa. Chaymi Tayta Dios niwarqa: Chay wawata Maher-salal-hasbazwan sutichay.

⁴Manaraq chay wawa “taytay” otaq “mamay” nispa rimayta yachach-kaptinmi, Damasco llaqtapa chaynataq Samaria llaqtapa qori-qollqenta Asiria nacionpa reynin apakunqa.

⁵Huktawanmi Tayta Dios kaynata niwarqa:

⁶Siria nacionpa reynin Rezinwan kusikuspanku, Remaliaspa churin rey Pekawan kusikuspanku, qasillalla kallpaq Siloé yakuta kay runakuna wischupakusqankuraykum,

⁷Tayta Dios kamachimunqa llimparichkaq Eufrates mayuta, chay mayuqa Asiria nacionpa reyninpa atiyninmi, paymi llimparichkaq mayu hinaraq mastarikuspan haypasqanta patan-patan tuytunqa,

⁸Judá nacionmanpas chayaspanmi kunka kuchunkamaraq huntaykunqa, mastarikuspanñataqmi patan-patan haypaykunqa. ¡Emanuel! Llaqtaykiqa ankapa raprawan pakaykusqa hinam kanqa, nispa.

⁹Nacionkuna huñunakuspa kayta uyariychik, karu llaqtakunapi llapallan runakuna, kayta uyariychik: Armaykichikta alistakuspapas sasachakuypim rikurinkichik, arí, chaynata ruwaspaykichikpas sasachakuypim tarikunkichik.

¹⁰Tanteanakusqaykichikpas manam ruwasqachu kanqa, rimanakuptikichikpas manam cumplikunqachu, ñoqaykuwan Tayta Dios kasqanrayku.

¹¹Tayta Diosmi llumpayta hapiykuwaspan kunawarqa, kay runakunapa kawsasqanman hina mana kawsanaypaq. Paymi kaynata niwarqa:

¹²Kay runakunaqa “kamachikuqpa contranpim hoqarikuchkanku” nisqankutaqa amayá “kamachikuqpa contranpi hoqarikuymi” niychikchu. Paykunapa manchakusqantaqa ama manchakuychikchu.

¹³Tukuy Atiyniyuq Tayta Diosllata chuyapaqqa hapiychik, payllata kasukuspa hatunchaychikpas.

¹⁴Paymi yupaychananku kanqa. Iskaynin nacionkunapaqmi, haytakunanku hinaspa urmachiqninku rumi hina kanqa; Jeru-salén llaqtapi yachaqkunapaqmi, wichichiqninku trampa hina kanqa.

¹⁵Achkaqmi haytakuspa wichiykunqaku, hinaspam wañunqaku. Achkaqmi chay toqllaman wichiykuspa chaqnasqa kanqaku.

¹⁶Isaiasmi discipulonkunata nirqa: Yachachisqaykunata pakasqata hatalliychik, yachachikuykuna qosqayta allinta waqaychaychik.

¹⁷Jacobpa mirayninkunataña Tayta Dios pakakuptinpas, ñoqaqa payllapim hapipakusaq, payllapim suyasaq.

¹⁸Ñoqaqa Tayta Diospa qowasqan churiykunapiwanmi Israel nacionpaq señal kaniku, Sión moqopi yachaq Tukuy Atiyniyuq Tayta Diospa churaykuwasqankuman hina.

¹⁹Sichum runakuna nisunkichik: Espiritistakunata qayakuychik, wachachachaspa upallallamanta rimaq espirituyuqkunata qayakuychik, ¿runakunaqa manachum diosninkuta tapukunmanku? ¿Kawsaqkunaqa manachum wañuqkunapa almanta tapukunmanku? nispanku.

²⁰¡Manam chaynataqa ruwanaychikchu! Aswanqa Diospa yachachikuynintayá tapukuychik, Diospa kamachikuynintayá tapukuychik. Chaykunaman hina mana rimaspankuqa tutayayllapiraqmi kachkanku.

²¹Ñakarichisqa chaynataq yarqaymanta kaspankum runakuna kayman chayman purinqaku. Yarqayninkuraykum llumpayta piñakuspanku reyninkutawan Diosninkuta ñakanqaku, altokunatam piñasqallaña qawanqaku.

²²Pampata qawarispankuñataqmi, ñakariytawan tutayayllata, pasaypaq tutayaytawan sasachakuyllata rikunqaku, hinaspam pasaypaq tutayayllapi kawsanqaku.