Read CHUYA QELLQA La Biblia en Quechua de Ayacucho 2012 Levítico 1 Bible Online

Levítico 1 - CHUYA QELLQA La Biblia en Quechua de Ayacucho 2012 bible

Levítico 1

¹Diosman asuykuna carpamanta qayamuspanmi Israelman nimunanpaq Moisesta Tayta Dios nirqa: Qamkunamanta hukkaqnikichik ofrendata ñoqa Tayta Diosman ofrecewaspanqa, vacamanta otaq ovejamantam apamunqa.

³Sichum lliw kañana sacrificiopaq vacankunamanta apamuspanqa, sumaqnin sano torotam ñoqaman asuykuna carpapa punkunpi ofrecewanqa, chaynapi ñoqa Tayta Dios chaskinaypaq.

⁴Chay ofrendata apamuqmi kañana animalpa umanman makinta churanqa, chaynapim huchankunata pampachanaypaq chaskisaq.

⁵Hina kikinmi chay toropa kunkanta ñoqapa qayllaypi kuchunqa, hinaptinmi Aaronpa miraynin sacerdotekunañataq yawarninta apamuspa altarpa muyuriqninman challanqaku. Chaykunatam ñoqaman asuykuna carpapa punkunpi ruwanqaku.

⁶Chay ofrecewaqniymi lliw kañanapaq animalta nakaruspan taksa-taksatakama kuchuparunqa.

⁷Sacerdote Aaronpa mirayninkunañataqmi yantata altarpa hawanman chupqallata churaspa ninata ratachinqaku,

⁸hinaspam chaypa hawanman taksa-taksatakama kuchusqa animalta umantawan chaynataq wirankunatawan kuskata churanqaku.

⁹Ofrecewananpaq apamuwaqniymi animalpa ukunninkunatawan piernankunata mayllanqa, hinaptinmi sacerdoteñataq lliwta altarpi kañanqaku. Chay ofrendaqa lliw kañanapaq animalmi, hinaspapas ñoqapaq miskillaña asnariq ofrendam.

¹⁰Pipapas ovejamanta otaq cabramanta ofrendan kaptinqa, orqon kaqtam chaynataq sanon kaqtam apamuwanqa;

¹¹hinaspanmi ñoqa Tayta Diospa qayllaypi, altarpa norte lawninpi kuchunqa. Aaronpa miraynin sacerdotekunañataqmi chay animalpa yawarninwan altarpa muyuriqninta challanqaku.

¹²Chay nakasqan animaltam taksa-taksatakama kuchuparunqa, hinaptinmi sacerdoteñataq umantawan wirankunata altarpi yantapa hawanman churanqa.

¹³Ofrecewananpaq apamuwaqniymi animalpa ukunninkunatawan piernankunata mayllanqa, hinaptinmi sacerdoteñataq lliwta altarpi kañaspa ofrecewanqa, chay ofrendaqa lliw kañanapaq animalmi, hinaspapas ñoqapaq miskillaña asnariq ofrendam.

¹⁴Raprayuq animalkunamanta pipapas ofrendan kaptinqa, qoqñuta otaq palomatam ofrecewananpaq apamunqa.

¹⁵Hinaptinmi sacerdote chay raprayuq animalta, altarpi ofrecewanqa. Umanta wiptiruspanmi altarpa hawanpi kañanqa, yawarnintañataqmi altarpa perqanman sutuchinqa.

¹⁶Uytuntawan ukunninkunata hinaspa purankunatañataqmi hurqoruspan, altarpa waqtanpi intipa qespimunan lawpi uchpakuna wischunaman wischunqaku.

¹⁷Sacerdoteñataqmi raprankunamanta hapiykuspan iskayman chitqarunqa, ichaqa amam iskaymanqa rakinarunqachu, hinaspanmi altarpi kañanqa. Chay ofrendaqa lliw kañanapaq animalmi, hinaspapas ñoqapaq miskillaña asnariq ofrendam.