Read CHUYA QELLQA La Biblia en Quechua de Ayacucho 2012 Levítico 21 Bible Online

Levítico 21 - CHUYA QELLQA La Biblia en Quechua de Ayacucho 2012 bible

Levítico 21

¹Moisestam Tayta Dios nirqa: Aaronpa miraynin sacerdotekunata nimuy, ayllunkumanta pipas wañuruptinqa ama asuykunankupaq. Chaynata ruwaspaqa millakuypaqmi kanmanku.

²Asuykuspaqa asuykunmanku mamanpas, taytanpas, churinpas wawqenpas

³otaq manaraq qari reqsiq paninpas wañuruptillanmi, mana qosayuq kasqanraykum paypa ayanmanqa asuykunman; chaynakunallapim sacerdoteqa millakuypaqta ruwakunman.

⁴Hukkaqnin casado ayllun wañuruptinmi ichaqa ayan-man ama asuykunqachu, sichum asuykuspanqa millakuypaqmi kanqa.

⁵Umankutaqa amam kachiy-kachiytaqa rutukunqakuchu nitaqmi barbankupa puntantapas kaptakunqakuchu, cuerponkutapas amataqmi kuchupakunqakuchu.

⁶Paykunaqa ñoqallapaqña sapaqchasqam kanqaku, chayraykum sutiytapas penqaymanqa ama churanqakuchu. Paykunaqa ñoqa Tayta Diospa kañasqa ofrendaykunatawan tantatam ofrecewanku. Chaynaqa, ñoqallapaqña sapaqchasqam kanqaku.

⁷Chuchumika warmiwanqa, abusasqa warmiwanqa otaq qosanpa saqesqan warmiwanqa amam casarakunqakuchu. Sacerdotekunaqa ñoqallapaqña sapaqchasqam kananku.

⁸Chaynaqa, ñoqallapaqña sapaqchay, paykunaqa ñoqa Diosmanmi tantata ofrecewanku, paykunataqa chuyapaqmi hapinki, chaynataqa ruwanki qamkunata chuyanchaq ñoqa Tayta Diospas chuya kasqayraykum.

⁹Sacerdotepa warmi churin penqayman churakuspan chuchumikaña rikuriruspanqa taytantam penqayman churachkan, paytaqa kawsachkaqtam kañanqaku.

¹⁰Sumo sacerdoteqa sapaqchasqa pachawan pachakunanpaq umanman aceitewan tallispa sapaqchasqam karqa, chayraykum llakipi kasqanta qawachikunanpaqqa ama chukchantapas kacharinqachu nitaq pachantapas llikipakunqachu.

¹¹Ayapa kasqanmanqa, taytanña otaq mamanña wañuruptinpas amam yaykunqachu, millakuypaqmi rikurirunman.

¹²Santuarioymantaqa amam lloqsinqachu, amataqmi santuarioytapas penqaymanqa churanqachu. Payqa umanman aceitewan tallispa ñoqallapaqña sapaqchasqam. Ñoqa Tayta Diosmi chaynata nini.

¹³Sumo sacerdoteqa warmitapas mana qari reqsiqtam casaranqa.

¹⁴Viuda warmitaqa, qosanwan rakinasqa warmitaqa, abusasqa warmitaqa otaq chuchumika warmitaqa amam casaranqachu, casaraspaqa casaranqa castanmanta kaq manaraq qari reqsiq warmillatam.

¹⁵Chaynataqa ruwanqa mirayninkunapas chaynataq llaqtamasikunapas mana penqayman churasqa kananpaqmi. Ñoqa Tayta Diosmi paytaqa ñoqallapaqña sapaqchani, nispa.

¹⁶Aaronman ninanpaqmi Moisesta Tayta Dios kaynata nirqa: Pipas miraynikimanta mana sano kaq runaqa manam asuykuwanmanchu ofrenda mikuyniyta ofrecewananpaqqa.

¹⁸Mana sano kaqkunaqa manam asuykuwanmanchu: Ni ñawsapas, wistupas, uyan kallpisqapas, huknin largo makiyuqpas, huknin largo chakiyuqpas,

¹⁹chakin pakisqapas, makin pakisqapas,

²⁰moqo wasapas, moqotipas, mana allin qawakuqpas, seqsipakuyniyuqpas, qarapakuyniyuqpas, nitaq runtun dañasqapas.

²¹Sacerdote Aaronpa mirayninmanta pipas mana sano kaq runaqa amam ñoqa Tayta Diosman kañasqa ofrendataqa ofrecewanqachu, amataqmi asuykuwanqachu.

²²Sacerdotekunapa ofrecewasqanku mikuytawan ñoqallapaqña sapaqchasqa ofrendakunataqa mikunmanmi.

²³Chuyay-chuyay lugarmanmi ichaqa ama yay-kunqachu, nitaqmi altarmanpas asuykunqachu, mana sano kasqanrayku. Chaynata ruwaspanqa santuarioytam qachachanman. Ñoqa Tayta Diosmi sacerdotekunataqa sapaqcharqani, nispa.

²⁴Chaynatam Aaronmanwan mirayninkunaman Moisés willarqa, willarqataqmi Israelpa llapallan mirayninmanpas.