Read CHUYA QELLQA La Biblia en Quechua de Ayacucho 2012 Levítico 6 Bible Online

Levítico 6 - CHUYA QELLQA La Biblia en Quechua de Ayacucho 2012 bible

Levítico 6

¹Moisestam Tayta Dios nirqa:

²Pipas runamasinta engañaspa imapas churachikusqanta otaq prestasqanta hapikuykuq runaqa ñoqa Tayta Diospa contraypim huchallikurun. Contraypitaqmi huchallikurun imapas waqaychachikusqanta hapikuykuq runaqa, suwakuq runaqa, negociopi engañakuq runaqa,

³imatapas tarikuchkaspan negakuruq runaqa, yanqamanta juraq runaqa; chay huchakunaman rikchakuqta ruwaq runaqa,

⁴chaykunamantam huchayuq kanqa. Chaynaqa, suwakusqanta, negociopi engañasqanta, mana paypa kaqta qechukusqanta, waqaychachikusqan hapikuykusqanta, imapas tarikusqanta chaynataq yanqa jurasqanmantapas lliwtam dueñonman kutichipunqa, hinaspam huchanmanta sacrificiota ofrecewasqan punchawpi pichqaman rakisqapa hukninta yapanqa.

⁶Chay runam huchayuq kasqanmanta ñoqa Tayta Diosman huk sano carnerota apamuwanqa. Chay carneropa preciontaqa qanmi churanki, hinaptinmi chay runañataq chay carnero ofrendata sacerdoteman apamunqa.

⁷Chaymi sacerdoteñataq chay runapa huchan pampachasqa kananpaq ñoqa Tayta Diosman ofrecewanqa, chaynapim huchanqa mayqan kaspanpas pampachasqa kanqa, nispa.

⁸Moisestam Tayta Dios nirqa:

⁹Lliw kañana animalkunamanta, Aarontawan churinkunata kaynata kamachiy: Lliw kañana animalqa tukuy tutam altarpi uchpayanankama rupanqa.

¹⁰Sacerdotem linomanta pachawan pachakunqa, churakunqataqmi linomanta calzoncillowanpas. Lliw kañana animal ofrecesqanku rupayta tukuruptinñataqmi uchpanta hoqarispan altarpa waqtanman churanqa.

¹¹Chaymantam huk pachanwan cambiakuspan campamentomanta hawaman, uchpakuna wischunapaq akllasqa sitioman uchpata apanqa.

¹²Altarpi ninaqa amam wañuchisqachu kanqa, aswanqa sapa achikyaytam sacerdote yantata yapanqa, chaypa hawanpim lliw kañana ofrecenanku animaltapas churanqa. Hinaspam ñoqawan allinlla kasqaykichikmanta animalpa wirankunata kañanqa.

¹³Altarpi ninaqa mana tukuytam rupanqa, amam haykapipas wañunqachu.

¹⁴Kaymi kawsay ofrendakunamanta yachachikuy: Aaronpa miraynin sacerdotekunam altarman apamuspanku ñoqa Tayta Diosman ofrecewanqaku.

¹⁵Chay sacerdotekunamanta hukkaqninmi aceitewan chaynataq inciensowan chapusqa harinamanta huk aptiyllata hurqoykuspan altarpa hawanpi kañanqa, chayqa yuyarinapaq ofrendam hinaspa ñoqa Tayta Diospaq miskillaña asnariq ofrendam.

¹⁶Chay ofrendamanta puchuq harinatañataqmi Aaronpiwan mirayninkuna mana levadurayuqta mikunqaku, Diosman asuykuna carpapa ñawpaqninpi, chaypaq akllasqa sitiopi.

¹⁷Mana levadurayuqtam yanunqaku, chay puchuqtam paykunaman qoni kañapuwasqanku ofrendamanta. Chay ofrendaqa hucharayku hinaspa culparayku ñoqapaq chuya ofrendam.

¹⁸Chaynaqa, ñoqa Tayta Diospaq kañapuwasqanku ofrendamantam Aaronpa qari kaq mirayninkuna tocaqninta mikunqaku, kaymi wiñaypaq kamachikuy paykunapaq kanqa. Imapas chay ofrendaman tupaykuqqa ñoqapaq sapaqchasqam kanqa, nispa.

¹⁹Moisestam Tayta Dios nirqa:

²⁰Kaymi Aaronwan churinkuna sapaqchasqa kasqanku punchawpi ñoqa Tayta Diosman ofrecewananku ofrenda: Iskay kilo fino harina; chay ofrendamantam partenta tutapayta ofrecewanqaku, huknin partentañataqmi chisinkuyta; chaynata-qa sapa punchawmi ruwanqaku.

²¹Chay ofrendataqa aceitewan chapuspam sartenpi teqtechinqaku, hinaspam pakipasqata ñoqa Tayta Diosman ofrecewanqaku, chayqa miskillaña asnariq ofrendam.

²²Chaynatataqmi ruwanqa Aaronpa rantinpi mirayninmanta acei-tewan tallispa akllasqa sumo sacerdotepas. Ñoqa Tayta Diosmi kay decretota wiñaypaq qoykichik, chay ofrendataqa lliwtam kañapuwankichik.

²³Sacerdotekunapa kawsaykunamanta llapallan ofrendankum tukunankama kañasqa kanqa. Chaytaqa amam pipas mikunqachu, nispa.

²⁴Moisestam Tayta Dios nirqa:

²⁵Hucharayku ofrendakunamanta yachanankupaq Aarontawan churinkunata kaynata kamachiy: Hucharayku ofrecewasqanku animalqa ñoqa Tayta Diospa ñawpaqniypi wañuchisqam kanqa. Chaytaqa wañuchinqaku lliw kañana animalta wañuchinankupim. Chayqa ñoqallapaqña chuya ofrendam.

²⁶Hucharayku ofrendata ofrecewaqniy sacerdotem chayta mikunqa, Diosman asuykuna carpapa ñawpaqninpi, chaypaq sapaqchasqa sitiopi.

²⁷Imapas chay ofrecesqa animalpa aychanta tupaykuqqa ñoqapaq sapaqchasqam kanqa. Chay animalpa yawarnin pachaman pawaykuptinqa chaypaq sapaqchasqanku sitiopim taqsanqaku.

²⁸Chay ofrenda yanusqanku manka allpamanta kaptinqa pakinqakum, broncemanta kaptinmi ichaqa siksiruspa mayllanqaku.

²⁹Chay ofrendataqa llapallan sacerdotekunallam mikunqaku, chayqa ñoqa-llapaqña sapaqchasqa ofrendam.

³⁰Hucha pampachanapaq ofrecesqa animalpa yawarnin asuykuwananku carpaman apasqa kaptinqa, chay animalpa aychantaqa amam mikunqakuchu. Chay ofrendaqa ninapi kañasqam kanqa.