Read CHUYA QELLQA La Biblia en Quechua de Ayacucho 2012 Levítico 9 Bible Online

Levítico 9 - CHUYA QELLQA La Biblia en Quechua de Ayacucho 2012 bible

Levítico 9

¹Pusaq kaq punchawpim Aarontawan churinkunata chaynataq Israel casta ancianokunata Moisés qayarqa.

²Hinaspam Aaronta nirqa: Hucha pampachana ofrendapaqmi huk sano malta torota pusamunki, pusamunkitaqmi lliw kañana sacrificiopaq sano carnerotapas, Tayta Diosman ofrecenaykipaq.

³Israelpa mirayninkunata niy hucha pampachanapaq kaq chivatota pusamunankupaq, pusamuchunkutaq malta torotawan malta carnerotapas. Chaykunaqa lliw kañanapaq huk watayuq sano animalkunam kanqa.

⁴Pusachimuytaq huk torotawan huk carnerotapas. Chaykunataqa Dioswan allinlla kasqankumanta ofrendapaqmi Tayta Diospa qayllanpi wañuchinqaku. Apamunqakutaqmi kawsaykunamanta aceitewan chapusqa ofrendatapas. Tayta Diosmi kunan qamkunaman rikurisunkichik, nispa.

⁵Chaymi paykuna Moisespa kamachisqanman hina aparqaku Tayta Diosman asuykuna carpapa punkunman; hinaspam Israelpa mirayninkuna chaypi huñunakuruspanku Tayta Diospa qayllanpi sayarqaku.

⁶Hinaptinmi Moisés nirqa: Chayta ruwanaykichikpaqmi Tayta Dios kamachikun, chayta ruwaptikichikmi paypa atiynin rikuriykusunkichik, nispa.

⁷Chaymantam Aaronta Moisés nirqa: Altarman asuykuspa hucharayku ofrendaykita chaynataq lliw kañanapaq animaltapas ofrecey, chaynapi huchaykipas chaynataq runakunapa huchanpas pampachasqa kananpaq. Runakunapa ofrendantapas ofreceytaq huchanku pampachasqa kananpaq, ofrecenkiqa Tayta Diospa kamachisqanman hinam, nispa.

⁸Chaymi altarman Aarón asuykurqa, hinaspam malta torota wañuchispan hu-chan pampachasqa kananpaq ofrecerqa.

⁹Aaronpa churinkunañataqmi yawarta apamurqaku, chaymi Aaronqa yawarman dedonta challpuykuspan altarpa waqrachankunaman llusirqa, puchuq yawartañataqmi altarpa sikinman talliy-kurqa.

¹⁰Chaymantam hucha pampachanapaq animalpa wirankunatawan rurunninkunata chaynataq kichpanninpi wiratapas altarpi kañarqa, chaynataqa ruwarqa imaynam Moisesman Tayta Diospa kamachisqanman hinam.

¹¹Aychantawan qarantañataqmi campamentomanta hawaman hurqospa kañarurqa.

¹²Aaronqa wañuchirqataqmi lliw kañanapaq animaltapas, hinaptinmi yawarta churinkuna apamurqaku, chaymi altarpa waqtankunaman Aarón challarqa.

¹³Chaymantañataqmi Aaronman chay lliw kañana animalta apamurqaku, chaytaqa apamurqaku umantawan kuskatam taksa-taksatakama kuchusqata, hinaptinmi altarpi kañarqa.

¹⁴Chaymantam chunchulninkunatawan piernankunata mayllarqa, hinaspam altarpi lliwta kañarurqa.

¹⁵Aaronqa llaqtapa ofrendantapas ofrecerqataqmi huchanku pampachasqa kananpaq; chivatota hapiykuspanmi wañurachirqa hinaspam ofrecerqa imaynam kikinpaq ofrecesqan ofrendata hina.

¹⁶Lliw kañanapaq animaltapas Diospa kamachisqanman hinam ofrecerqa.

¹⁷Ofrecerqataqmi kawsaykunamanta ofrendatapas. Chay ofrendamantam huk aptayta hapiykuspa altarpi kañarqa, tutapayta lliw kañanapaq animaltawan kuskata.

¹⁸Aaronqa torotawan carnerotapas wañuchirqataqmi, chaykunaqa Dioswan allinlla kasqankumanta llaqtapa ofrendanmi karqa. Churinkuna yawarta apamuptinkum altarman chaynataq altarpa muyuriqninmanpas challarqa.

¹⁹Apamurqakutaqmi toropa hinaspa carneropa wirankunata, chupanta, chunchulninpi wirankunata, rurunninta chaynataq kichpanninpi wirankunatapas.

²⁰Aaronñataqmi animalpa qasqonkunapa hawanman chay wirakunata churaspan altarpi kañarurqa.

²¹Qasqonkunatawan alleq piernankunatañataqmi kuyuchisqa ofrendata hina Tayta Diosman ofrecerqa. Chaykunataqa ruwarqa imaynam Moisesman Tayta Diospa kamachisqanman hinam.

²²Aaronmi runakuna lawman makinta hoqarispan paykunapaq Tayta Diospa bendicionninta mañakurqa, hinaspam hucha pampachanapaq animalta, lliw kañana animalta hinaspa Dioswan allinlla kasqankumanta animalta ofreceruspan altarmanta uraykamurqa.

²³Chaymantam Moiseswan Aarón, Diosman asuykuna carpaman yaykurqaku, lloqsiramuspankuñataqmi runakunapaq Diospa bendicionninta mañakurqaku, chaymi Tayta Diospa achkiriynin llapallan runakunaman rikuriykurqa.

²⁴Hinaptinmi Tayta Diospa qayllanmanta lenwachkaq nina lloqsiramurqa, hinaspam lliw kañana animaltawan altarpi wirakunata ruparurqa. Chayta llapallan runakuna qawaykuspankum kusikuymanta qaparispa pampaman pakchakuykurqaku.