Read CHUYA QELLQA La Biblia en Quechua de Ayacucho 2012 Jeremías 14 Bible Online

Jeremías 14 - CHUYA QELLQA La Biblia en Quechua de Ayacucho 2012 bible

Jeremías 14

¹Usyay kasqanraykum Jeremiasta Tayta Dios nirqa:

²Judá nacionmi waqachkan, llaqtankunam llakisqa kachkan; runakunam pampakunapi wischurayachkan, Jerusalenmi nanaywan qaparichkan.

³Apukunam criadonkuta yakuman kachanku, qochakunamanmi kallpanku, ichaqa manam yakuta tarimunkuchu; vacío puyñu aysarisqam kutimunku. Mana tarimuspankum penqakuymanta uyankuta tapakunku.

⁴Mana paramusqanraykum allpapas raqrarun, chakrapi llamkaqkunapas penqakuymantam umankuta tapakunku.

⁵Luwichukunapas purunpi wacharuspanmi uñankunata saqerunku, mana mikunankupaq pasto kasqanrayku.

⁶Monte asnokunapas chaki orqokunapim sayachkanku, atoqkuna hinam wayrallataña muskichkanku; pasto mana kaptinmi ñawinkupas tutayachkan.

⁷Dios Taytallayku, huchaykum acusawachkanku, sutikiraykuyá yanapaykullawayku. Mana kasukusqaykuqa nana-nanaqmi, contraykipim huchallikuruniku.

⁸Israelpa hapipakunan Diosnillayku, sasachakuy punchawkunapi salvaqnillayku, ¿imanasqataq kay nacionpi huklaw llaqtayuq hinallaña rikurirunki? ¿Imanasqataq samapakuq hinallaña rikurirunki?

⁹¿Imanasqataq muspaypi runa hina rikurirunki? ¿Imanasqataq allin qari kachkaspa mana ima ruway atiq rikurirunki? Chaywanpas Dios Taytallayku, qamqa ñoqaykuwanmi kachkanki, lliwmi yachanku llaqtayki kasqaykutaqa, amayá saqerullawaykuchu.

¹⁰Tayta Diosmi kay llaqtamanta kaynata nin: Paykunaqa kayman chayman kallpakachayllatam gustanku, chakinkutapas manam samaykachinkuchu. Chayraykum paykunataqa mana chaskisaqchu. Kunanmi mana allin ruwasqankuta yuyarispa huchankumanta cuentata mañasaq, nispa.

¹¹Tayta Diosmi kaynata niwarqa: Amaña kay runakunapaq mañaku-wayñachu.

¹²Ayunaspa mañakuwaptinkupas manam uyarisaqchu. Lliw kañana sacrificionkunatawan kawsaykunamanta ofrendakuna apamuwasqankutapas manam chaskisaqchu. Aswanqa guerrawan, yarqaywan hinaspa peste onqoywanmi paykunataqa tukusaq, nispa.

¹³Chaymi nirqani: ¡Ay, Dios Taytalláy! Llapa profetakunam runakunata nichkanku: Guerrapas yarqaypas manam kanqachu, aswanqa cheqap hawkayaytam qosqaykichik, nispanku.

¹⁴Hinaptinmi Tayta Diosñataq niwarqa: Paykunaqa sutiypi profetizaspan-kupas llullakuchkankum, paykunataqa manam kachamurqanichu nitaqmi rimapayarqanichu. Paykunaqa yanqa revelaciontam, yanqa visionkunatam, sonqonkumanta yanqakuna hurqos-qankutam profetizachkanku.

¹⁵Chayna-qa, ñoqa Tayta Diosmi chay profetakunamanta kaynata nini: Mana kamachichkaptiy sutiypi willakuspa “guerrapas yarqaypas manam kanqachu” niq profetakunaqa guerrapiwan yarqaypim wañunqaku.

¹⁶Chay profetakunapa willakusqankuta uyariqkunapas, war-minkuwan llapa churinkuwan kuskam guerrapiwan yarqaypi wañunqaku. Ayankunapas Jerusalén llaqtapa callenkunapim wischurayanqa, manam pipas pampanqachu. Chaynatam mana allin ruwasqankumanta pagapusaq.

¹⁷Payku-namanmi kaynata ninki: Llaqtay hatun sasachakuypi kasqanmanta, llumpay heridasqa kasqanmanta, tuta punchaw mana samaykuspa weqeykuna sutuchun.

¹⁸Chakrakunaman lloqsispaymi espadawan wañuchisqakunata tarini, llaqtaman yaykuspaymi yarqaymanta wañuqkunata tarini, profetakunawan sacerdotekunam mana reqsisqa nacionkunaman pasakunku.

¹⁹Dios Taytalláy, ¿pasaypaqtachu Judá nacionta qepanchakurunki? ¿Pasaypaqtachu Sión llaqtaykita cheqnikurunki? ¿Imanasqataq manaña hampiy atina kanaykukama castigaruwankiku? Hawkayaytam suyarqaniku, ichaqa sasachakuyllam chayaramuwanku; sanoyachisqa kaytam suyarqaniku, ichaqa manchakuyllapim kachkaniku.

²⁰Dios Taytallayku, mana allinkuna ruwasqaykutam reqsikuniku, taytaykupa mana allinkuna ruwasqankutam reqsikuniku; qampa contraykipim huchallikuruniku.

²¹Sutikiraykuyá ama qepanchakuruwaykuchu, munaychakunayki llaqtataqa amayá yanqacharuychu. Ñoqaykuwan pacto ruwasqaykitayá yuyariy, aswanqa nisqaykikunatayá cumpliykuy.

²²¿Yaqachu huklaw nacionkunapa idolonkuna parachimunman? ¿Yaqachu cielokunapas kikillanmanta paramunman? Dios Taytalláy, qamllam parachimuqqa kanki, ñoqaykuqa qamllapim hapipakuniku, qamllam tukuy chaykunataqa ruwanki, nispa.